വെറ്ററിനറി സര്‍വകലാശാലയുടെ പശു ഫാമില്‍ വൈദ്യുതോപകര ണങ്ങള്‍ പ്രവര്‍ത്തിക്കുന്നത് ചാണകത്തില്‍ നിന്നുള്ള വൈദ്യുതിയില്‍...!
പശു പാല്‍ തരുന്ന ഒരു വളര്‍ത്തുമൃഗമാണെന്നാണ് പഴയ സ്‌കൂള്‍ പാഠം. ഇനി പശു നമുക്ക് പാലും വെളിച്ചവും തരുമെന്നു തിരുത്തിവായിക്കണം.
വെറ്ററിനറി സര്‍വകലാശാലയുടെ പശു ഫാമില്‍ കറവയന്ത്രവും പുല്ലുവെട്ടുന്നതിനുള്ള യന്ത്രവുമെല്ലാം പ്രവര്‍ത്തിക്കുന്നത് ചാണകത്തില്‍ നിന്ന് ഉല്‍പാദിപ്പിക്കുന്ന വൈദ്യുതി ഉപയോഗിച്ചാണ്. ചുരുക്കത്തില്‍ കുറച്ചു പശുക്കളുണ്ടെങ്കില്‍ വൈദ്യുതി ബില്ലും ലാഭിക്കാമെന്നു സാരം .
ഒരു പശുവില്‍ നിന്നും ഒരു ദിവസം 20 കിലോ ചാണകം ലഭിക്കുമെന്നാണ് കണക്ക്. ഏറെ പശുക്കളുള്ള വലിയ ഫാമുകള്‍ക്കാണ് പദ്ധതി കൂടുതല്‍ പ്രയോജനപ്പെടുന്നത്. 400 കിലോ ചാണകം പ്ലാന്റില്‍ ഉപയോഗിച്ചാല്‍ 100 വാള്‍ട്ടിന്റെ 30 ബള്‍ബുകള്‍ അഞ്ചുമുതല്‍ എട്ടുമണിക്കൂര്‍ വരെ പ്രവര്‍ത്തിപ്പിക്കാം. വാട്‌സ് കുറഞ്ഞ സിഎഫ്എല്‍ ബള്‍ബുകളാണെങ്കില്‍ അതിലും കൂടുതല്‍ പ്രവര്‍ത്തിപ്പിക്കാം. ചാണകത്തില്‍ നിന്നു ലഭിക്കുന്ന മീഥെയ്ന്‍ വാതകം ജനറേറ്ററില്‍ ഉപയോഗിച്ചാണ് വൈദ്യുതി ഉണ്ടാക്കുന്നത്.
നിശ്ചിത തുക സര്‍വകലാശാലയില്‍ അടയ്ക്കുന്നവര്‍ക്കായി ബയോഗ്യാസ് പ്ലാന്റ് നിര്‍മാതാക്കളില്‍ നിന്നും ക്വട്ടേഷന്‍ ക്ഷണിച്ചു. സര്‍വകലാശാലയുടെ സ്‌കൂള്‍ ഓഫ് ബയോ എനര്‍ജിയില്‍ നേരിട്ടെത്തുന്നവര്‍ക്ക് സൗജന്യമായി പരിശീലനം ലഭിക്കും. കര്‍ഷകരുടെ ആവശ്യപ്രകാരമുള്ള പ്ലാന്റ് സ്ഥാപിക്കുന്നതിനു സൗകര്യങ്ങളൊരുക്കും. ഡോ. ആന്റണി പല്ലന്‍ (9995351137), കോ ഓര്‍ഡിനേറ്റര്‍ ഡോ. ദീപക് മാത്യു (9446956208) എന്നിവരുടെ നേതൃത്വത്തിലാണു പരിശീലനം.
https://www.facebook.com/Malayalivartha
