സൗഹൃദങ്ങൾ എക്കാലവും നമ്മുടെ അനുഗ്രഹം തന്നെയാണ്. എന്നാൽ നിങ്ങളെ പ്രചോദിപ്പിക്കുന്ന, നിങ്ങളുടെ നന്മ ആഗ്രഹിക്കുന്ന സുഹൃത്തുക്കള്‍ ജീവിതത്തിലെ ഏറ്റവും വലിയ അനുഗ്രഹങ്ങളിലൊന്നാണ്. ആരാണ് നിങ്ങളുടെ ബെസ്റ്റ് ഫ്രണ്ട്? എന്ന ചോദ്യത്തോടുകൂടെ ആരംഭിക്കുന്ന പോസ്റ്റ് ഏറെ ശ്രദ്ധേയമാണ്. ഡോക്ടർ പി. പി വിജയനാണ് ഇത് കുറിച്ചിരിക്കുന്നത്.

ഫേസ്ബുക്ക് കുറിപ്പ് ഇങ്ങനെ;

ആരാണ് നിങ്ങളുടെ ബെസ്റ്റ് ഫ്രണ്ട്?
വര്‍ഷങ്ങള്‍ക്കു മുമ്പ് ഒരു പ്രമുഖ വാരികയുടെ ഓണപ്പതിപ്പില്‍ ഒരു ഫീച്ചര്‍ വന്നു. 'ഏറ്റവും അടുത്ത സുഹൃത്ത്' എന്നതായിരുന്നു വിഷയം. പ്രശസ്തരായ പലരും തുല്യപ്രശസ്തനായ സുഹൃത്തുമായുള്ള അടുപ്പത്തിന്റെ ആഴം പങ്കുവച്ചു. ചിലര്‍ പ്രശസ്തരല്ലാത്ത ബാല്യകാല സുഹൃത്തുക്കളെക്കുറിച്ച് പറഞ്ഞു. ഒരു പ്രമുഖ നടന്‍ മാത്രം പറഞ്ഞു: ''എന്റെ ഏറ്റവും അടുത്ത സുഹൃത്ത് എന്റെ ഭാര്യയാണ്.'' ഭാര്യയെ അടുത്ത സുഹൃത്തായിക്കൂടി കാണാന്‍ കഴിയുന്ന ഭര്‍ത്താക്കന്മാര്‍ സന്തുഷ്ടരാണ്.

ഉത്തമസുഹൃത്തുക്കളുടെ ലക്ഷണമെന്താണ്?

- അവര്‍ പരസ്പരം ആദരിക്കുന്നു.
- കഴിവുകള്‍ അംഗീകരിക്കുന്നു, പ്രശംസിക്കുന്നു, പ്രോത്സാഹിപ്പിക്കുന്നു.
- കോപം, നിരാശത, വിഷാദം എന്നിവ ഉണ്ടാകുമ്പോള്‍ പരസ്പരം ആശ്രയിച്ച് സമാശ്വാസം തേടുന്നു.
- ശുണ്ഠിയും വാശിയുമൊക്കെ സുഹൃത്തിന്റെ സാന്നിദ്ധ്യത്തില്‍ അലിഞ്ഞ് ഇല്ലാതാവുന്നു. ആശയങ്ങള്‍ അടിച്ചേല്‍പ്പിക്കുന്നില്ല.
- ഭിന്നാഭിപ്രായമുള്ളവര്‍, ഭിന്ന വീക്ഷണങ്ങള്‍ ഉള്ളവര്‍, വിരുദ്ധമായ പ്രത്യയശാസ്ത്രങ്ങളിലും വിശ്വാസപ്രമാണങ്ങളിലും അംഗങ്ങളായവര്‍ അവയൊക്കെ നിലനിറുത്തിക്കൊണ്ടു തന്നെ ഉത്തമബന്ധം തുടരുന്നു.
- പരസ്പരം കുറ്റപ്പെടുത്തലില്ല, ചെളിവാരിയെറിയലില്ല.
- പരിഭവമോ സ്വന്തമാക്കി വയ്ക്കാനും കീഴ്‌പ്പെടുത്താനുമുള്ള പ്രവണതയോ ഇല്ല.
- ഒന്നും പിടിച്ചു വാങ്ങാന്‍ ശ്രമമില്ല
- അമിതമായ പ്രതീക്ഷയില്ല, സ്വാര്‍ത്ഥതയില്ല, സ്‌നേഹക്കുറവിനെപ്പറ്റി പരാതിയില്ല.

ഇനിയുമെത്രയോ സവിശേഷതകള്‍ ചൂണ്ടിക്കാട്ടാം, ഉത്തമ സൗഹൃദത്തില്‍. ദമ്പതിമാര്‍ തമ്മില്‍ ഉത്തമസുഹൃത്തുക്കളായിരുന്നാലോ? ദാമ്പത്യം അങ്ങേയറ്റം വിജയകരം എന്നു പറയാം. ദമ്പതിമാര്‍ക്കിടയില്‍ സാധാരണ ഉണ്ടാകുന്ന അസ്വാരസ്യങ്ങള്‍ അവര്‍ നല്ല സുഹൃത്തുക്കളാണെങ്കില്‍ തലപൊക്കുകയേയില്ല. പങ്കാളിയില്‍ നിന്നു വേണ്ടത്ര സ്‌നേഹം കിട്ടുന്നില്ലെന്ന പരാതി ദമ്പതിമാരില്‍ സര്‍വസാധാരണമാണ്. ഒരാള്‍ ഉത്തമസുഹൃത്ത് ആകുന്നത് ആ വ്യക്തിയുടെ സ്‌നേഹം സംശയത്തിനിടയില്ലാത്തെ വിധം ഉറപ്പായിക്കഴിയുമ്പോഴാണ്. പങ്കാളി തന്നെയാണ് ഉത്തമസുഹൃത്തെങ്കില്‍ സ്‌നേഹത്തെക്കുറിച്ചുള്ള സംശയം ഇടയ്ക്കിടെ ഉടലെടുക്കുകയില്ലെന്നു കരുതാം.

ഭിന്ന സാഹചര്യങ്ങളില്‍ വളര്‍ന്ന്, വിരുദ്ധങ്ങളായ വിശ്വാസപ്രമാണങ്ങളും നിലപാടുകളുമുള്ള രണ്ടു വ്യക്തികള്‍ ഒന്നിച്ചു കഴിയുകയും ശരീരവും മനസും പങ്കുവയ്ക്കുകയും കുടുംബം കെട്ടിപ്പടുക്കുകയും ചെയ്യുമ്പോള്‍ വെറുമൊരു സൗഹൃദബന്ധത്തിനപ്പുറത്ത് മറ്റു പല ഘടകങ്ങളും ദമ്പതിമാര്‍ക്കിടയിലേക്ക് കടന്നുവരുന്നു. ഇവയെല്ലാം സന്തുലിതാവസ്ഥയില്‍ നിലനിറുത്തുന്നതില്‍ വിജയിച്ചാല്‍ ദാമ്പത്യം സുഹൃദ്ബന്ധമായി പരിണമിക്കുന്നതിന് പിന്നെ ഏറെ ദൂരമില്ല.

്‌സൗഹൃദമുണ്ടെങ്കില്‍ നല്ല ആശയവിനിമയമുണ്ടാകും ദമ്പതിമാരുടെ പൊരുത്തപ്പെടലില്‍ സഹനവും ക്ഷമയും നിസ്വാര്‍ത്ഥതയും ത്യാഗവുമെല്ലാം അടങ്ങിയിരിക്കുന്നു. അവയെ ശക്തിപ്പെടുത്തുന്നത് ആശയവിനിമയമാണ്. ആലോചിച്ചുനോക്കൂ, പങ്കാളിയില്‍ നിന്ന് വളരെയേറെ പ്രതീക്ഷിച്ചുകൊണ്ടല്ലേ എല്ലാവരും വിവാഹിതരാകുന്നത്. പക്ഷേ കാലം ചെല്ലുന്നതോടെ പ്രതീക്ഷകള്‍ അസ്ഥാനത്തായെന്ന തോന്നലുണ്ടായേക്കാം. അത് മടുപ്പും നൈരാശ്യവും സങ്കടവും ഉളവാക്കുന്നു.
ഇവിടെ ഉണ്ടാകേണ്ടത് യാഥാര്‍ത്ഥ്യബോധമാണ്. പങ്കാളി ആരാണോ അങ്ങനെതന്നെ അംഗീകരിച്ച് ഉള്‍ക്കൊള്ളാന്‍ മനസിനെ പാകപ്പെടുത്തണം. ഭാര്യ,ഭര്‍ത്താവ് എന്ന വ്യക്തിയെപ്പറ്റി താന്‍ തെറ്റായൊരു പ്രതിച്ഛായ കരുപ്പിടിപ്പിക്കുകയായിരുന്നെന്നും അത് ആ വ്യക്തിയുടെ കുറ്റമല്ലെന്നും സ്വയം ബോധ്യപ്പെടണം. നിങ്ങള്‍ നിങ്ങളാണ്, അവര്‍ അവരാണ്. ഒരു വ്യക്തിയില്‍ ഗുണവും ദോഷവും ശക്തിയും ദൗര്‍ബല്യവുമുണ്ട്. ഇത് മനസിലാക്കണം. ദോഷങ്ങളെയും ദൗര്‍ബല്യങ്ങളെയും കൂടി അംഗീകരിക്കുമ്പോഴാണ് ഉത്തമബന്ധങ്ങള്‍ ഉടലെടുക്കുക. വെറും സൗഹൃദമായാലും ദാമ്പത്യമായാലും ഇതാണ് ശരി. ഉപാധികളില്ലാത്ത ആശയവിനിമയത്തിലൂടെ ഇത് സാധ്യമാകും.

ദമ്പതിമാര്‍ തമ്മില്‍ നല്ല സുഹൃത്തുക്കളാണെങ്കില്‍ എത്ര പ്രകോപനമുണ്ടെങ്കിലും കലഹിക്കാനാവില്ല. പങ്കാളിയുടെ അവസ്ഥകളും ആവശ്യങ്ങളും പറയാതെ തന്നെ മനസിലാക്കി പ്രവര്‍ത്തിക്കാനാവും. അതിനൊക്കെ പുറമേ മനസുകള്‍ പരസ്പരം അടുക്കുന്നതോടെ അവ ഏറെക്കഴിയും മുമ്പ് സമാനസ്വഭാവം കൈവരിക്കാനും സാധ്യത ഏറുന്നു. ഏതു വിപരീത കാലാവസ്ഥയിലും സന്ദര്‍ഭത്തിലും ഒരാള്‍ക്കെതിരെ ഉത്തമസുഹൃത്ത് പ്രവര്‍ത്തിക്കുകയില്ല. വേണ്ട സംരക്ഷണവും സുരക്ഷിതത്വവും ആവശ്യപ്പെടാതെതന്നെ നല്‍കാന്‍ തയാറുമായിരിക്കും. അതേപോലെയായിരിക്കും ഉത്തമപങ്കാളികളും. പങ്കാളിയെ ഉത്തമസുഹൃത്ത് ആക്കണമെന്ന് വിചാരിച്ച് ജീവിതത്തില്‍ നിങ്ങള്‍ക്ക് മറ്റു സുഹൃത്തുക്കള്‍ ഉണ്ടാകരുത് എന്ന് അര്‍ത്ഥമില്ല കെട്ടോ. നിങ്ങളെ പ്രചോദിപ്പിക്കുന്ന, നിങ്ങളുടെ നന്മ ആഗ്രഹിക്കുന്ന സുഹൃത്തുക്കള്‍ ജീവിതത്തിലെ ഏറ്റവും വലിയ അനുഗ്രഹങ്ങളിലൊന്നാണ്.