ഉപ്പും മുളകിലൂടെ പ്രേക്ഷകര്‍ക്ക് പ്രിയങ്കരിയായി മാറിയ താരമാണ് ജൂഹി റുസ്തഗി. അവിചാരിതമായാണ് ജൂഹി അഭിനയ രംഗത്തേക്കെത്തുന്നത്. സുഹൃത്തിന്റെ പിറന്നാളാഘോഷത്തില്‍ പങ്കെടുക്കാന്‍ പോയതിന് ശേഷമായാണ് ജൂഹിയെ തേടി സംവിധായകന്റെ കോളെത്തിയത്. പേടിയോടെയായിരുന്നു അഭിനയിച്ച് തുടങ്ങിയത്.

തന്റെ ജീവിതത്തിലെ ഏറ്റവും സങ്കടകരമായ അവസ്ഥയിലൂടെയാണ് ജൂഹി ഇപ്പോള്‍ കടന്നു പോകുന്നത്. ഈ അടുത്തായിരുന്നു ജൂഹിയുടെ അമ്മ മരണപ്പെട്ടത്. അപ്രതീക്ഷിത വിയോഗത്തില്‍ ആകെ തകര്‍ന്ന ജൂഹിയെക്കുറിച്ച് ചോദിച്ചെത്തിയിരിക്കുകയാണ് ആരാധകര്‍.

മകനൊപ്പം ബൈക്കില്‍ സഞ്ചരിക്കുമ്പോഴായിരുന്നു ജൂഹിയുടെ അമ്മ ഭാഗ്യലക്ഷ്മിയുടെ മരണത്തിന് ഇടയാക്കിയ അപകടമുണ്ടാകുന്നത്. സംഭവ സ്ഥലത്ത് വച്ചു തന്നെ ഭാഗ്യലക്ഷ്മി മരണപ്പെടുകയായിരുന്നു. എന്നാല്‍ മരണ വാര്‍ത്ത ജൂഹിയോട് എങ്ങനെ പറയണമെന്ന് അറിയാതിരുന്ന ബന്ധുക്കള്‍ തുടക്കത്തില്‍ മരണം മറച്ചുവെക്കുകയും അപകടം നടന്നുവെന്ന് മാത്രമായിരുന്നു പറഞ്ഞത്. അമ്മയും സഹോദരനും ആശുപത്രിയിലാണെന്നായിരുന്നു ആദ്യം ജൂഹി അറിഞ്ഞത്. പിന്നാലെയാണ് മരണ വാര്‍ത്ത താരം അറിയുന്നത്.

ജീവനറ്റ അമ്മയുടെ ശരീരത്തെ കെട്ടിപ്പിടിച്ച് കിടന്ന് കരയുന്ന ജൂഹിയുടെ ചിത്രങ്ങളും വീഡിയോകളുമെല്ലാം മലയാളികളെല്ലാം വേദനയോടെയാണ് ഏറ്റെടുത്തത്. ആ കാഴ്ച കണ്ടവരാരും മറക്കാനിടയില്ല. ഇതിന്റെ ചിത്രങ്ങളും വീഡിയോകളുമെല്ലാം സോഷ്യല്‍ മീഡിയയിലും ചർച്ചയായിരുന്നു. സ്‌കൂളില്‍ പഠിക്കുമ്പോഴാണ് ജൂഹിയ്ക്ക് അച്ഛനെ നഷ്ടമാകുന്നത്.

അന്നു മുതല്‍ ജൂഹിയേയും സഹോദരനേയും കൈ പിടിച്ച് നടത്തിച്ചത് അമ്മയായിരുന്നു. മക്കളെക്കുറിച്ച് ഒരുപാട് പ്രതീക്ഷകളുണ്ടായിരുന്നു ഭാഗ്യലക്ഷ്മി. ഉപ്പും മുളകും പരമ്പരയുടെ ചിത്രീകരണത്തിനായി ജൂഹിയോടൊപ്പം അമ്മ എന്നും എത്തിയിരുന്നു.

എന്നാൽ, ജൂഹി ഇപ്പോഴും ഷോക്കിലാണ്, ഫോണെടുത്തെങ്കിലും ഒന്നും മിണ്ടുന്നില്ല, അവളെ എങ്ങനെയാണ് ആശ്വസിപ്പിക്കേണ്ടത് എന്നറിയില്ലെന്നായിരുന്നു ഓണ്‍സ്‌ക്രീന്‍ അമ്മയായ നിഷ സാരംഗ് പറഞ്ഞത്. ഭാഗ്യലക്ഷ്മിയുമായി നല്ല കൂട്ടായിരുന്നു ഞാന്‍. ഉപ്പും മുളകും ലൊക്കേഷനിലായാലും മറ്റ് പരിപാടികള്‍ക്കായാലും എപ്പോഴും ജൂഹിക്ക് കൂട്ടായി അമ്മയുണ്ടാവുമെന്നും നിഷ വേദനയോടെ പറഞ്ഞു. ദൂരെയാണ് ലൊക്കേഷനെങ്കില്‍ സഹോദരനാണ് കൂട്ട് പോവുന്നത്.

ജൂഹിയുടെ അമ്മയെ അവസാനനോക്ക് കാണാനായി ഉപ്പും മുളകും പരമ്പരയിലെ താരങ്ങളായ അല്‍സാബിത്തും നിഷ സാരംഗും നേരിട്ടെത്തിയിരുന്നു. ഇപ്പോഴിതാ പരമ്പരയില്‍ ലച്ചുവിന്റെ ചേട്ടന്‍ വിഷ്ണുവിനെ അവതരിപ്പിച്ച ഋഷിയുടെ വാക്കുകള്‍ സോഷ്യല്‍ മീഡിയയില്‍ ചര്‍ച്ചയായി മാറിയിരിക്കുകയാണ്.

ശിവാനി പങ്കുവച്ചൊരു വീഡിയോക്ക് ഋഷി കമന്റ് ചെയ്തിരുന്നു. ഇതിനിടെയാണ് ചിലര്‍ ജൂഹിയെക്കുറിച്ചുള്ള ചോദ്യവുമായി എത്തിയത്. ലച്ചു ഇപ്പോള്‍ എങ്ങനെയാണെന്നായിരുന്നു ചിലരുടെ ചോദ്യം. ഇതിന് നടന്‍ നല്‍കിയ മറുപടി അവള്‍ ഓക്കെയായി വരികയാണെന്നും ഞങ്ങളെല്ലാം അവളുടെ കൂടെയുണ്ടെന്നുമായിരുന്നു. മുടിയന്റെ മറുപടി കണ്ടപ്പോള്‍ ആശ്വാസമായി. പ്രതീക്ഷയേകുന്ന വാക്കുകളാണ് അതെന്നുമായിരുന്നു ആരാധകര്‍ കുറിച്ചത്.