പാട്ട് നിര്ത്തുമെന്നോ, മലയാളത്തില് പാടില്ലെന്നോ ഒരിക്കലും പറഞ്ഞിട്ടില്ലെന്ന് വിജയ് യേശുദാസ്
കഴിഞ്ഞ കുറച്ചുദിവസങ്ങളില് സോഷ്യല് മീഡിയയില് ഏറെ ചര്ച്ചയായത് പിന്നണി ഗായകന് വിജയ് യേശുദാസിന്റെ ഒരു പ്രസ്താവനയായിരുന്നു. മലയാള സിനിമയില് ഇനി പാടില്ലെന്നായിരുന്നു അദ്ദേഹം പറഞ്ഞത്. എന്നാല് ഇക്കാര്യങ്ങളില് നിലപാട് വിശദീകരിച്ച് രംഗത്തെത്തിയിരിക്കുകയാണ് വിജയ് യേശുദാസ്. പാട്ട് നിര്ത്തുമെന്നോ, മലയാളത്തില് പാടില്ലെന്നോ ഒരിക്കലും പറഞ്ഞിട്ടില്ലെന്ന് വിജയ് യേശുദാസ് വ്യക്തമാക്കി. ക്ലബ് എഫ്എമ്മിന് നല്കിയ അഭിമുഖത്തിലാണ് വിജയ് യേശുദാസ് ഇക്കാര്യം പറഞ്ഞത്.
ഒരു അഭിമുഖത്തില് പറഞ്ഞ കാര്യങ്ങളില് ഒരു ഹെഡര് മാത്രം അടര്ത്തിയെടുത്ത് മാര്ക്കറ്റിങ്ങിന് ഉപയോഗിക്കുകയായിരുന്നുവെന്ന് വിജയ് യേശുദാസ് പറഞ്ഞു. 'ആ അഭിമുഖം വായിച്ചാല് മാത്രമെ ഞാന് എന്താണ് പറഞ്ഞതെന്ന് മനസിലാകൂ. അത് വായിപ്പിക്കാന് വേണ്ടിയാണല്ലോ ഇങ്ങനത്തെ ഹെഡര് ഇടുന്നത്. പാട്ട് നിര്ത്തുകയാണെന്നോ മലയാളത്തില് പാടില്ലെന്നോ ഒരിക്കലും പറഞ്ഞിട്ടുമില്ല' വിജയ് യേശുദാസ് പറഞ്ഞു. കുറച്ചുകൂടി സൂക്ഷിച്ചുമാത്രമായിരിക്കും മലയാളത്തിലെ പാട്ടുകള് തെരഞ്ഞെടുക്കുകയെന്നു വിജയ് യേശുദാസ് വ്യക്തമാക്കുന്നു. അതാണ് താന് പറയാന് ശ്രമിച്ചത്. മലയാളത്തെ അപേക്ഷിച്ചു മറ്റു ഇന്ഡസ്ട്രികളില് കൂടുതലായി ശ്രദ്ധ പതിപ്പിക്കുമെന്നും വിജയ് യേശുദാസ് പറയുന്നു.
പ്രതിഫല കാര്യത്തിലുള്ള വിയോജിപ്പ് രേഖപ്പെടുത്താനാണ് താന് ശ്രമിച്ചതെന്ന് പറയുന്നു. മ്യൂസിക് ഇന്ഡസ്ട്രിയിലുള്ളവര്ക്ക് പ്രതിഫലം കുറച്ചുനല്കുന്ന രീതിയാണ് മലയാള സിനിമയിലുള്ളത്. സമത്വം എന്നൊന്ന് ഇവിടെയില്ല. താന് ജോലിക്കുള്ള പ്രതിഫലം മാത്രമെ ആവശ്യപ്പെടുന്നുള്ളുവെന്നും വിജയ് യേശുദാസ് പറഞ്ഞു. ചില സൂപ്പര്ഹിറ്റ് ഗാനങ്ങള് ആലപിച്ച ഗായകരും, അത് ചിട്ടപ്പെടുത്തിയ സംഗീത സംവിധായകരുമൊക്കെ ഇപ്പോള് വളരെയധികം കഷ്ടപ്പെട്ടാണ് ജീവിക്കുന്നത്. തട്ടുകടകളുടെ പിന്നില് താമസിക്കുന്നവരും ഇക്കൂട്ടത്തിലുണ്ട്. കുറച്ചുകൂടി മെച്ചപ്പെട്ട സാഹചര്യം മ്യൂസിക് ഇന്ഡസ്ട്രിയിലുള്ളവര് അര്ഹിക്കുന്നുണ്ടെന്നും വിജയ് യേശുദാസ് പറഞ്ഞു.
https://www.facebook.com/Malayalivartha
