തമിഴ്‌നാട്ടിലെ രാഷ്ട്രീയ മാറ്റത്തിന് പിന്നാലെ തന്നെയും കുടുംബത്തെയും അധിക്ഷേപിക്കാന്‍ ശ്രമിച്ചയാള്‍ക്ക് ചുട്ട മറുപടിയുമായി നടി ജ്യോതിക. ഡിഎംകെ ഭരണകാലത്തെയും താരത്തിന്റെ സാമൂഹിക ഇടപെടലുകളെയും കളിയാക്കിക്കൊണ്ടുള്ള കമന്റിനായിരുന്നു ജ്യോതികയുടെ മറുപടി.

തമിഴ്‌നാട്ടില്‍ ഡിഎംകെ അധികാരം ഒഴിഞ്ഞ സാഹചര്യത്തില്‍ ഇനി ജ്യോതികയും കുടുംബവും ആക്ടിവിസം വഴി പണം സമ്പാദിക്കാന്‍ ഇറങ്ങുമെന്നായിരുന്നു ഒരാളുടെ പരിഹാസം. 'ഇന്റലിജന്റ് ഫൂള്‍' എന്ന ഇന്‍സ്റ്റഗ്രാം അക്കൗണ്ടില്‍ നിന്നായിരുന്നു അധിക്ഷേപം നിറഞ്ഞ കമന്റ് വന്നത്. 'അക്കാ, നിങ്ങള്‍ ഇനി ആക്ടിവിസത്തിലേക്ക് ഇറങ്ങണം. ഡിഎംകെ അധികാരത്തില്‍ നിന്നും പുറത്തായല്ലൊ. ഇനി എല്ലാ വിഷയങ്ങളിലും കരഞ്ഞുകൊണ്ട് നിങ്ങള്‍ക്കും കുടുംബത്തിനും നന്നായി പണമുണ്ടാക്കാം. ഡിഎംകെ ഭരണകാലത്ത് ഇതെല്ലാം നിങ്ങള്‍ മറന്നിരിക്കുകയായിരുന്നല്ലൊ' എന്നായിരുന്നു കമന്റ്.

'ഇന്റലിജന്റ് ഫൂള്‍ എന്നത് നിങ്ങള്‍ക്ക് ചേര്‍ന്ന പേര് തന്നെയാണ്' എന്നായിരുന്നു താരത്തിന്റെ മറുപടി. ജ്യോതിക കുറിച്ച കമന്റ് സോഷ്യല്‍ മീഡിയ ഒന്നടങ്കം ഏറ്റെടുത്തു. തന്റെ പ്രൊഫൈലിന് നല്‍കിയ പേര് പോലെ 'ബുദ്ധിയുള്ള വിഡ്ഢിയായാണ്' അയാള്‍ പെരുമാറുന്നതെന്നാണ് ജ്യോതിക പരിഹസിച്ചത്.

മറുപടി വൈറലായതോടെ നിരവധി ആരാധകര്‍ ജ്യോതികയെ പിന്തുണച്ചുകൊണ്ട് രംഗത്തെത്തി. അനാവശ്യമായ രാഷ്ട്രീയ വിവാദങ്ങളിലേക്ക് താരത്തെ തള്ളവിടാന്‍ നോക്കുന്നവര്‍ക്കുള്ള തക്കതായ മറുപടിയാണിതെന്നും ആരാധകര്‍ കുറിച്ചു. മുന്‍പും തഞ്ചാവൂര്‍ സര്‍ക്കാര്‍ ആശുപത്രിയുടെ ശോചനീയാവസ്ഥ അടക്കമുള്ള വിഷയങ്ങളില്‍ പരസ്യമായ നിലപാടെടുത്ത് ജ്യോതിക ശ്രദ്ധ നേടിയിരുന്നു.