ബാഹുബലിയില്‍ ശിവകാമിക്കായി രാജമൗലി ആദ്യം സമീപിച്ചത് ശ്രീദേവിയെയായിരുന്നു. എന്നാല്‍ ശ്രീദേവിയുടെ നിബന്ധനകള്‍ അംഗീകരിക്കാന്‍ കഴിയാതെ വന്നപ്പോള്‍ രമ്യ കൃഷ്ണനെ ഈ സ്ഥാനത്തേയ്ക്ക് തിരഞ്ഞെടുക്കുകയായിരുന്നു. കൂടാതെ ചിത്രത്തില്‍ നിന്നും ശ്രീദേവി പിന്‍മാറിയത് അനുഗ്രഹമായി തോന്നുന്നുവെന്നും രാജമൗലി പറഞ്ഞിരുന്നു. രാജമൗലിയുടെ ഈ വാക്കുകള്‍ മാധ്യമങ്ങളിലും സോഷ്യല്‍ മീഡിയയിലും സിനിമാ ലോകത്തും വലിയ ചര്‍ച്ചയായെങ്കിലും ശ്രീദേവി ഇതേകുറിച്ച് പ്രതികരിച്ചിരുന്നില്ല. എന്നാല്‍ താരത്തിന്റെ പുതിയ ചിത്രമായ മോമിന്റെ പ്രചരണവുമായി ബന്ധപ്പെട്ട് ഒരു മാധ്യമത്തിന് നല്‍കിയ അഭിമുഖത്തില്‍ രാജമൗലിക്ക് മറുപടിയുമായി ശ്രീദേവി രംഗത്തെത്തി.

താന്‍ 10 കോടി ചോദിച്ചു, ഒരു ഹോട്ടലിന്റെ മുഴുവന്‍ നിലയും തനിക്ക് വിട്ടുതരണമെന്ന് ആവശ്യപ്പെട്ടു. സിനിമയിലെ ഷെയും, പോരാതെ 10 വിമാന ടിക്കറ്റുകളും ചോദിച്ചു. ഇതല്ലേ രാജമൗലിയുടെ ആരോപണം എന്നായിരുന്നു ശ്രീദേവി പ്രതികരിച്ചത്. താന്‍ വിവിധ ഭാഷകളിലായി 300-ലധികം സിനിമകളില്‍ അഭിനയിച്ചിട്ടുണ്ടെന്നും ഇത്തരം വലിയ ആവശ്യങ്ങള്‍ നിരത്തിയിട്ടാണ് താന്‍ സിനിമയില്‍ വിജയിച്ചതെന്ന് നിങ്ങള്‍ക്ക് തോന്നുന്നുണ്ടോയെന്നും ശ്രീദേവി ചോദിക്കുന്നു. തന്നോട് സംസാരിച്ചത് രാജമൗലിയല്ല നിര്‍മ്മാതാവാണെന്നും അദ്ദേഹത്തെ ചിലപ്പോള്‍ നിര്‍മ്മാതാവ് തെറ്റിദ്ധരിപ്പിച്ചതാകാമെന്നും അതെകുറിച്ച് തനിക്കറിയില്ലെന്നും ശ്രീദേവി പറയുന്നു. കൂടാതെ തന്റെ ഭര്‍ത്താവ് ഒരു നിര്‍മ്മാതാവാണെന്നും അദ്ദേഹത്തിന് ഒരു നിര്‍മ്മാതാവിന്റെ ബുദ്ധിമുട്ടുകള്‍ നന്നായി അറിയാമെന്നും അതുകൊണ്ട് ഇവര്‍ പറഞ്ഞതൊന്നു അദ്ദേഹം ആവശ്യപ്പെട്ടിട്ടില്ലെന്നും രാജമൗലി അന്തസ്സുള്ള വ്യക്തിയാണെന്നാണ് താന്‍ കേട്ടിട്ടുള്ളതെന്നും പക്ഷേ ഈ വാക്കുകള്‍ തന്നെ വേദനിപ്പിച്ചതായും ശ്രീദേവി പറഞ്ഞു. 

ശ്രീദേവിയുടെ തുറന്നു പറച്ചില്‍ ചര്‍ച്ചയായതോടെ ഖേദം പ്രകടിപ്പിച്ച് രാജമൗലിയും രംഗത്തെത്തി. ജനങ്ങള്‍ക്ക് ആരുടെ വാക്കുകള്‍ വേണമെങ്കിലും വിശ്വസിക്കാന്‍ അവകാശമുണ്ടെന്നും പക്ഷേ ഒരു കാര്യം താന്‍ പറയാം, താന്‍ ഒരിക്കലും ആ കാര്യങ്ങള്‍ പൊതുസ്ഥലത്ത് പറയാന്‍ പാടില്ലായിരുന്നെന്നും തനിക്ക് ശ്രീദേവിയോട് കടുത്ത ബഹുമാനമുണ്ടെന്നും മുംബൈ കീഴടക്കിയ തെന്നിന്ത്യയില്‍ താരങ്ങളുടെ പ്രതീകമാണ് ശ്രീദേവിയെന്നും രാജമൗലി പറഞ്ഞു. അതോടൊപ്പം മോം വലിയ വിജയമായി തീരട്ടെയെന്നും രാജമൗലി പറഞ്ഞു.