കുഴിമന്തി കഴിച്ചതിനെത്തുടർന്നുണ്ടായ ദേഹാസ്വാസ്ഥ്യം മൂലം നഴ്സ് മരിച്ച സംഭവത്തിൽ അസ്വാഭാവികത ആരോപിച്ച് ബന്ധുക്കളും നാട്ടുകാരും. തൃശൂർ വടക്കഞ്ചേരി വാൽക്കുളമ്പ് തട്ടാംകുളമ്പ് ചടപ്പിലികുളമ്പ് മുണ്ടപ്ലാക്കൽ ജോണിന്റെ മകൾ ലെന ജോൺ (25) ആണ് കഴിഞ്ഞ ചൊവ്വാഴ്ച എറണാകുളത്തെ സ്വകാര്യ ആശുപത്രിയിൽ വെച്ച് മരണപ്പെട്ടത്. ഭക്ഷണത്തിലെ വിഷബാധയെന്ന പ്രാഥമിക നിഗമനത്തിനപ്പുറം ബന്ധുക്കൾ ചില സംശയങ്ങൾ ഉന്നയിക്കുന്നു.

കുഴിമന്തി കഴിച്ചതിന് പിന്നാലെ രക്തസമ്മർദ്ദം കുറഞ്ഞു

കുഴിമന്തി കഴിച്ചതിന് പിന്നാലെ രക്തസമ്മർദ്ദം കുറഞ്ഞ ലെനയെ അർഷാദ്, സുഹൈൻ എന്നിവർ ചേർന്നാണ് ആലുവയിലെ നജാസ് ആശുപത്രിയിൽ എത്തിച്ചത്. എന്നാൽ ഇവിടെ വെച്ച് ലെന മരണപ്പെടുകയായിരുന്നു. തുടർന്ന് പെൺകുട്ടിയുടെ ഫോണിൽ നിന്ന് വീട്ടുകാരെ വിളിച്ച യുവാക്കളിൽ ഒരാൾ താൻ 'ഡോക്ടർ' ആണെന്ന് വ്യാജേനയാണ് സംസാരിച്ചത്. ലെന സീരിയസ് ആണെന്ന് ആദ്യം അറിയിച്ച ഇവർ, മിനിറ്റുകൾക്കുള്ളിൽ മരണം സ്ഥിരീകരിച്ച് വീണ്ടും വിളിക്കുകയായിരുന്നു.

രക്ഷപ്പെടാൻ ശ്രമിച്ച യുവാക്കളെ കുടുക്കി നാട്ടുകാർ

ആശുപത്രിയിൽ വെച്ച് മരണം സ്ഥിരീകരിച്ചതോടെ ഒപ്പമുണ്ടായിരുന്ന അർഷാദും സുഹൈനും അവിടെ നിന്ന് മുങ്ങാൻ ശ്രമിച്ചു. എന്നാൽ ഇവരുടെ പെരുമാറ്റത്തിൽ സംശയം തോന്നിയ ആശുപത്രി അധികൃതരും നാട്ടുകാരും സി.സി.ടി.വി ദൃശ്യങ്ങളുടെ സഹായത്തോടെ ഇവരെ തടഞ്ഞുവെക്കുകയും പോലീസിനെ വിവരം അറിയിക്കുകയുമായിരുന്നു.

ദുരൂഹത വർദ്ധിപ്പിക്കുന്ന ഘടകങ്ങൾ

ലെനയുടെ ശരീരത്തിൽ അസ്വാഭാവികമായ പാടുകൾ കണ്ടിരുന്നതായും ഇത് സമ്മർദ്ദം മൂലം ഡോക്ടർമാർ അവഗണിച്ചതായും ബന്ധുക്കൾ ആരോപിക്കുന്നു.

വിദേശത്ത് ജോലിക്ക് പോകാനായി ഐ.ഇ.എൽ.ടി.എസ് (IELTS) പഠിക്കാൻ എറണാകുളത്ത് പോകുന്നു എന്നാണ് ലെന സുഹൃത്തുക്കളോട് പറഞ്ഞിരുന്നത്. എന്നാൽ ഒരു വർഷം മുൻപേ ലെന ഈ കോഴ്സ് പാസായതാണെന്ന വിവരം ഇപ്പോൾ പുറത്തുവന്നിട്ടുണ്ട്. അതേസമയം, നഴ്സിംഗുമായി ബന്ധപ്പെട്ട സർട്ടിഫിക്കറ്റുകൾ വാങ്ങാനാണ് മകൾ പോയതെന്നാണ് പിതാവ് ജോൺ പറയുന്നത്.

വീട്ടിൽ നിന്നും പോയ ലെനയെ ആലുവയിലെ ഓസോൺ ഹോട്ടലിൽ മൂന്ന് ദിവസത്തോളം താമസിപ്പിച്ചിരുന്നതായി വിവരമുണ്ട്. ഈ ദിവസങ്ങളിൽ അവിടെ എന്താണ് സംഭവിച്ചതെന്നും ലെന ആരുടെ കൂടെയായിരുന്നു എന്നതിനെക്കുറിച്ചും പോലീസ് ഹോട്ടൽ രേഖകൾ പരിശോധിച്ചുവരികയാണ്.

കളമശ്ശേരി മെഡിക്കൽ കോളേജിൽ പോസ്റ്റ്മോർട്ടം നടപടികൾ പൂർത്തിയാക്കി മൃതദേഹം ബന്ധുക്കൾക്ക് വിട്ടുകൊടുത്തു. ലെനയെ ആശുപത്രിയിൽ എത്തിച്ച യുവാക്കൾക്ക് പെൺകുട്ടിയുമായുള്ള ബന്ധമെന്താണെന്നും മരണത്തിന് പിന്നിൽ മറ്റ് ഇടപെടലുകൾ ഉണ്ടോ എന്നും പോലീസ് വിശദമായി അന്വേഷിച്ചു വരികയാണ്.ചില മാധ്യമങ്ങളിൽ, 'ലവ് ജിഹാദ്' ആരോപണം കൂടി ഉയർന്നതോടെ കേസ് അതീവ ഗൗരവത്തോടെയാണ് അധികൃതർ കൈകാര്യം ചെയ്യുന്നത്.