അറബ് നാടകപ്രതിഭയും കുവൈത്തി നടനും ആധുനിക നാടക പ്രസ്ഥാനത്തിന്റെ സ്ഥാപകരില്‍ ഒരാളുമായ മുഹമ്മദ് അബ്ദുള്‍റഹ്മാന്‍ അല്‍ മുനെ (95) അന്തരിച്ചു.

അറബ് ലോകത്തെ നാടക, -സിനിമാരംഗത്ത് അറുപതിലേറെ വര്‍ഷം സജീവ സാന്നിധ്യമായിരുന്നു. പെട്ടെന്നുണ്ടായ ആരോഗ്യപ്രശ്‌നത്തെതുടര്‍ന്ന് ആശുപത്രിയില്‍ ചികിത്സയിലിരിക്കെയാണ് അന്ത്യം.

അരനൂറ്റാണ്ടിലേറെ നീണ്ട കലാജീവിതത്തില്‍ നാടകം, ടെലിവിഷന്‍, സിനിമ എന്നീ മേഖലകളിലായി അനവധി അനശ്വര കഥാപാത്രങ്ങളെ അവതരിപ്പിച്ചു. ഏകദേശം 60-ല്‍ അധികം ടിവി പരമ്പരകളില്‍ ശ്രദ്ധേയ വേഷങ്ങള്‍ ചെയ്തു. മദിനത് അല്‍ അമന്‍, ദുറൂബ് അല്‍ റൊജോല, ടാഷ് വാര്‍ഷ്, ഹാല്‍ മനായര്‍, ദ മിഡ്വൈഫ്, ബെയ്ത് അല്‍ അവാം, സാഹിര്‍ അല്‍-ലൈല്‍, സീക്രട്ട്സ് ബിഹൈന്‍ഡ് ദ സണ്‍ തുടങ്ങിയവയിലെ പ്രകടനങ്ങള്‍ ഏറെ പ്രശംസ നേടുകയും ചെയ്തു.

1963 മുതല്‍ 2015 വരെയുള്ള പല അപൂര്‍വ കുവൈത്തി ചിത്രങ്ങളിലും അദ്ദേഹം അഭിനയിച്ചു. 2018-ല്‍ പുറത്തിറങ്ങിയ 'അബ്രത്ത് ശര'യിലാണ് അവസാനമായി അദ്ദേഹം വേഷമിട്ടത്.