സർവീസിലുള്ള അധ്യാപകർക്ക് വേണ്ടി പ്രത്യേകമായി നടത്തുന്ന കേരള ടീച്ചർ എലിജിബിലിറ്റി ടെസ്റ്റ് 2026-ന്റെ വിജ്ഞാപനം പുറത്തിറക്കി പൊതുവിദ്യാഭ്യാസ വകുപ്പ്. കെ-ടെറ്റ് പരീക്ഷയ്ക്ക് അപേക്ഷിക്കുന്നതിനുള്ള ഫീസ് ജനറൽ വിഭാഗത്തിന് ഇരട്ടിയും സംവരണവിഭാഗത്തിന് മൂന്നിരട്ടിയുമാക്കി.

നിലവിൽ കെ-ടെറ്റ് പരീക്ഷയെഴുതുന്നതിന് പൊതുവിഭാഗം അപേക്ഷകർക്ക് 500 രൂപയും എസ്.സി., എസ്.ടി., ഭിന്നശേഷി വിഭാഗക്കാർക്ക് 250 രൂപയുമാണ് അപേക്ഷാ ഫീസ്. എന്നാൽ പ്രത്യേകമായി നടത്തുന്ന പരീക്ഷയിൽ പൊതുവിഭാഗക്കാർ 1000 രൂപയും സംവരണ വിഭാഗക്കാർ 750 രൂപയും നൽകണം. സംസ്ഥാനത്ത് 75015 അധ്യാപകർ കെ-ടെറ്റ് യോഗ്യത നേടാൻ ബാക്കിയുണ്ടെന്നാണ് സർക്കാർ കണക്കുകളുള്ളത്.

ഇവരിൽ ഭൂരിഭാഗവും ഫെബ്രുവരി 21, 23 തീയതികളിൽ നടന്ന പരീക്ഷ എഴുതിയവരാണ്. അതിന്റെ ഫലം വരുന്നതിനു മുമ്പ് പുതിയ പരീക്ഷയുടെ പ്രഖ്യാപനം വന്നതുകൊണ്ട് യോഗ്യത നേടാൻ ബാക്കിയുള്ളവർ മുഴുവൻ അപേക്ഷിക്കേണ്ടതായി വരും.

പരീക്ഷാഭവനാണ് കെ-ടെറ്റ് പരീക്ഷാച്ചുമതലയുള്ളത്. 26 മുതൽ അപേക്ഷ സമർപ്പിക്കാവുന്നതാണ്. മാർച്ച് ഏഴാണ് അവസാന തീയതി. പരീക്ഷാതീയതി പ്രഖ്യാപിച്ചിട്ടില്ല.