കാറുകളില്‍ നിന്ന്‌ പാഴ്‌ വസ്‌തുക്കള്‍ വലിച്ചെറിയുന്നവര്‍ക്കെതിരെ നടപടിയെടുക്കുമെന്ന്‌ ദുബായ്‌ മുന്‍സിപ്പാലിറ്റി
ദുബായില്‍ കാറുകളില്‍ നിന്ന്‌ പാഴ്‌ വസ്‌തുക്കള്‍ വലിച്ചെറിയുന്നതിനെതിരെ മുന്‍സിപ്പാലിറ്റി രംഗത്ത്‌. ഈയൊരു ദുശ്ശീലത്തിനെതിരെ കര്‍ശന നടപടിയെടുക്കുമെന്നും കഴിയുന്നതും കാറുകള്‍ക്കകത്തു തന്നെ മാലിന്യക്കൊട്ടകള്‍ സ്ഥാപിക്കാന്‍ ഉടമ ശ്രദ്ധിക്കണമെന്നും അധികൃതര്‍ ആവശ്യപ്പെട്ടു.
കാറുകളില്‍ നിന്ന്‌ ബോട്ടിലുകളും ടിഷ്യൂപേപ്പറുകളും സിഗററ്റ്‌ കുറ്റികളും പുറത്തേക്ക്‌ ഇടുന്നത്‌ പതിവാണ്‌. ടാക്‌സി കാറുകളിലെ ഡ്രൈവര്‍മാരാണ്‌ ഇക്കാര്യത്തില്‍ മുന്നില്‍ നില്‍ക്കുന്നത്‌. കാറുകളുടെ അകത്ത്‌ ചെറിയൊരു മാലിന്യക്കുട്ടയോ ബാഗോ സൂക്ഷിക്കുന്നത്‌ ഈ ദുശ്ശീലത്തിന്‌ പരിഹാരമാകുമെന്ന്‌ മാലിന്യ നിര്‍മ്മാര്‍ജ്ജന വകുപ്പ് ഡയറക്‌ടര്‍ എഞ്ചിനീയര്‍ അബ്‌ദുല്‍ മജീദ്‌ സെയ്‌ഫായി പറഞ്ഞു.
നിയമലംഘകരില്‍ നിന്ന്‌ 500 ദിര്‍ഹം മുതലുള്ള പിഴ ഈടാക്കും. വാഹനമോടിക്കുന്ന ഡ്രൈവര്‍മാര്‍ക്കായിരിക്കും കുറ്റത്തിന്റെ ഉത്തരവാദിത്വം. കാറുകളില്‍ നിന്ന്‌ പാഴ്‌ വസ്‌തുക്കള്‍ വലിച്ചെറിയുന്നവരെ നിരീക്ഷിക്കാനായി ഉദ്യോഗസ്ഥരെ നിയോഗിച്ചിട്ടുണ്ട്‌. കൂടാതെ, ഐദുബായ്‌ സ്‌മാര്‍ട്‌ ആപ്ലിക്കേഷന്‍ മുഖേന കുറ്റകൃത്യങ്ങള്‍ റിപ്പോര്‍ട്ടു ചെയ്യുന്ന ആയിരക്കണക്കിന്‌ ആളുകളും മുന്‍സിപ്പാലിറ്റിയുടെ സഹായത്തിനുണ്ട്‌. ഓരോ നിയമലംഘനത്തിനും ഡ്രൈവര്‍മാരില്‍ നിന്നാണ്‌ പിഴ ഈടാക്കുക.
കുട്ടികളെ ശുചിത്വശീലങ്ങള്‍ പഠിപ്പിക്കുന്നതിന്‌ രക്ഷിതാക്കളും അധ്യാപകരും മുന്‍കൈയ്യെടുക്കണം. എല്ലാപേര്‍ക്കും ജീവിക്കാനും വ്യാപാരം ചെയ്യാനും പറ്റുന്ന നഗരമാക്കി ദുബായിയെ നിലനിര്‍ത്തേണ്ടതുണ്ടെന്നും എഞ്ചിനീയര്‍ മജീദ്‌ സെയ്‌ഫായി പറഞ്ഞു.
https://www.facebook.com/Malayalivartha
