സംസ്ഥാന പുരസ്കാരം വിതരണം ചെയ്യുന്ന വേദിയിലെ മുഖ്യ അതിഥികള് ആ പുരസ്കാരം ലഭിച്ച ആളുകളാണ് , ഒപ്പം പുരസ്കാരം നല്കുന്ന മുഖ്യമന്ത്രിയും അവരെ മറികടന്ന് മോഹന്ലാലിനെ മുഖ്യാതിഥിയായി കൊണ്ടുവരുന്നത് ശരിയല്ലെന്ന് ഡോ. ബിജു
സംസ്ഥാന ചലച്ചിത്ര പുരസ്ക്കാര വിതരണ ചടങ്ങില് മോഹന്ലാല് മുഖ്യാതിഥിയായി എത്തുന്നതിനെതിരേ പ്രതിഷേധം. മോഹന്ലാല് പങ്കെടുത്താല് ചടങ്ങ് ബഹിഷ്ക്കരിക്കുമെന്ന് സംവിധായകന് ഡോ.ബിജു വ്യക്തമാക്കി. കൂടാതെ മറ്റ് പല സാമൂഹ്യ, സാംസ്കാരിക, ചലച്ചിത്ര പ്രവര്ത്തകരും താമസിക്കാതെ പ്രതിഷേധവുമായി രംഗത്തെത്തും. സംസ്ഥാന പുരസ്കാരം വിതരണം ചെയ്യുന്ന വേദിയിലെ മുഖ്യ അതിഥികള് ആ പുരസ്കാരം ലഭിച്ച ആളുകള് ആണെന്ന് ഡോ. ബിജു ചൂണ്ടിക്കാട്ടി. ഒപ്പം ആ പുരസ്കാരം നല്കുന്ന മുഖ്യമന്ത്രിയും. അവരെയും മറികടന്ന് ഒരു മുഖ്യ അതിഥിയായി വേറൊരു താരത്തെ ക്ഷണിക്കുന്നത് എന്തിനാവും. മികച്ച നടനുള്ള അവാര്ഡ് കിട്ടിയ ഇന്ദ്രന്സ് ഉള്പ്പെടെയുള്ളവര്ക്ക് ഗ്ലാമര് പോരാ എന്നാണോ സാംസ്കാരിക വകുപ്പ് അര്ത്ഥമാക്കുന്നത് . അതുകൊണ്ട് ഒരു സൂപ്പര് താരത്തെ വേദിയില് ആനയിച്ചു ഇവര്ക്ക് മുകളില് ഇരുത്താം എന്നതാണോ സാംസ്കാരിമന്ത്രി ഉദ്ദേശിക്കുന്നതെന്നും അദ്ദേഹം ചോദിക്കുന്നു.
ദേശീയ പുരസ്കാരങ്ങള് രാഷ്ട്രപതി വിതരണം ചെയ്യുന്ന മാതൃകയില് (ഈ വര്ഷത്തേത് ഒഴിച്ച്) പുരസ്കാര ജേതാക്കള് മുഖ്യ അതിഥികള് ആയി മുഖ്യമന്ത്രി പുരസ്കാരം നല്കുന്ന പ്രൗഡമായ ഒരു ചടങ്ങല്ലേ സാംസ്കാരിക വകുപ്പ് സംഘടിപ്പിക്കേണ്ടത്. അല്ലാതെ പുരസ്കാര വിതരണ ചടങ്ങില് ഈ വര്ഷത്തെ അവാര്ഡുകളുമായി യാതൊരു പുല ബന്ധവും ഇല്ലാത്ത ഒരു സൂപ്പര് താരത്തെ മുഖ്യ അതിഥി ആക്കുന്നതിലെ അനൗചിത്യം സാംസ്കാരിക വകുപ്പിന് ഇനിയും എന്താണ് മനസ്സിലാകാത്തത്.അവാര്ഡ് വാങ്ങാന് എത്തുന്ന കലാകാരന്മാരെ പരിഹസിക്കുകയാണ് ഇതിലൂടെ സര്ക്കാര് ചെയ്യുന്നത്.
നടി ആക്രമിക്കപ്പെട്ട വിഷയത്തില് കുറ്റാരോപിതന് ആയ വ്യക്തിയെ പിന്തുണയ്ക്കുന്ന അടിമുടി സ്ത്രീ വിരുദ്ധമായ ഒരു സംഘടനയുടെ പ്രസിഡന്റ്റ് ആണ് ഈ താരം. അദ്ദേഹം പരസ്യമായി ഈ വിഷയത്തില് കുറ്റാരോപിതന് അനുകൂലമായ പ്രസ്താവന നടത്തിയിട്ടുണ്ട്. അങ്ങിനെ ഒരാളെയാണ് മുഖ്യ അതിഥിയായി സര്ക്കാരിന്റെ പുരസ്കാര വിതരണ സാംസ്കാരിക ചടങ്ങില് ക്ഷണിക്കപ്പെടാന് പോകുന്നത്. സാംസ്കാരിക വകുപ്പിന് ഈ കാര്യത്തിലെ അനൗചിത്യവും ആസാംസ്കാരികതയും രാഷ്ട്രീയ മാനവും സാമൂഹിക വശവും ഇതുവരെ ബോധ്യമായിട്ടില്ല.ഇങ്ങനെ ഒരു സദസ്സില് പങ്കെടുക്കാതിരിക്കുക എന്നതാണ് രാഷ്ട്രീയ ബോധമുള്ള സാംസ്കാരിക മൂല്യബോധമുള്ള കലാകാരന്മാര് ചെയ്യേണ്ടത്. അസാനിധ്യവും ഒരു ശക്തമായ രാഷ്ട്രീയ നിലപാട് ആണ്. ഇങ്ങനെ ഒരാള് സംസ്ഥാന പുരസ്കാരം നേടിയ ആളുകളെയും മറികടന്ന് മുഖ്യ അതിഥി ആകുന്ന ഒരു ചടങ്ങാണ് ഇത്തവണ നടക്കുന്നതെങ്കില് ഈ വര്ഷത്തെ സംസ്ഥാന പുരസ്കാരങ്ങള് നിര്ണയിച്ച ജൂറി അംഗങ്ങളില് ഒരാള് എന്ന നിലയില് ആ ചടങ്ങില് പങ്കെടുക്കാതിരിക്കുക എന്നത് ആണ് എന്റെ സാമൂഹിക രാഷ്ട്രീയ സാംസ്കാരിക നിലപാട്.
https://www.facebook.com/Malayalivartha
