മിസ്ഡ് കോളിലൂടെ ആദിവാസി പെണ്‍കുട്ടികളുമായി അടുത്ത ശേഷം സ്മാര്‍ട് ഫോണ്‍ വാങ്ങിത്തരാമെന്ന് പ്രലോഭിപ്പിച്ച് ആദിവാസി വിദ്യാര്‍ത്ഥിനികളെ പീഡിപ്പിച്ചതായി പരാതി. ഊട്ടിയില്‍ കൊണ്ടുപോയാണ് പീഢിപ്പിച്ചതെന്ന് പരാതിയില്‍ പറയുന്നു. മാനന്തവാടി എസ്.എം.എസ്. ഡി വൈ എസ് പി കുബേരന്‍ നമ്പൂതിരിയുടെ നേതൃത്വത്തില്‍ പോക്‌സോ നിയമപ്രകാരം രണ്ട് കേസുകള്‍ രജിസ്റ്റര്‍ ചെയ്ത് അന്വേഷണം നടത്തുകയാണ്. പ്രതികളെ എത്രയും വേഗം പിടികൂടാനുള്ള ശ്രമത്തിലാണ് പോലിസ്.

മാനന്തവാടി പോലീസ് സ്‌റ്റേഷന്‍ പരിധിയിലെ എസ്‌റ്റേറ്റിലെ താമസക്കാരായ 17 കാരിയും, പതിനാലുകാരിയുമായ രണ്ട് വിദ്യാര്‍ത്ഥിനികളെയാണ് ഊട്ടിയിലെ സ്വകാര്യ ലോഡ്ജിലെത്തിച്ച് പീഡിപ്പിച്ചതായി പരാതിയുള്ളത്. പ്ലസ് വണ്‍ വിദ്യാര്‍ത്ഥിനിയെ പീഡിപ്പിച്ചതായുംഏഴാം ക്ലാസ് വിദ്യാര്‍ത്ഥിനിയെ പീഡിപ്പിക്കാന്‍ ശ്രമിച്ചെന്നുമാണ് പരാതി. കുട്ടികളുടെ മൊഴികളുടെ അടിസ്ഥാനത്തില്‍ പീഡനം, പീഡനശ്രമം,പോക്‌സോ, പട്ടികജാതി- പട്ടികവര്‍ഗ്ഗ അതിക്രമ നിയമം എന്നിവയുടെ അടിസ്ഥാനത്തിലാണ് കേസ് രജിസ്റ്റര്‍ ചെയ്തത്. കോഴിക്കോട് ജില്ലയിലെ രണ്ട് യുവാക്കളാണ് പ്രതികളെന്ന് സൂചനയുണ്ട്. മാനന്തവാടി എസ്എംഎസ് ഡിവൈഎസ്പി കുബേരന്‍ നമ്പൂതിരിക്കാണ് അന്വേഷണ ചുമതല.  ഇക്കഴിഞ്ഞ ജൂണ്‍ 24ന് വന്ന മിസ്ഡ്ഡ് കോള്‍ വഴിയാണ് പതിനേഴ്കാരിയായ വിദ്യാാര്‍ത്ഥിനിയെ പ്രതികളിലൊരാള്‍ പരിചയപെട്ടത്. പിന്നീട് കൂട്ടുകാരിയായ 14കാരിയെയും പരിചയപ്പെട്ടു. പീന്നീട് നിരന്തര ഫോണ്‍ വിളിയായി. 

ജൂലൈ 16നാണ് കുട്ടികള്‍ താമസിച്ചു വന്നിരുന്ന എസ്‌റ്റേറ്റിലെത്തിയ രണ്ട് യുവാക്കള്‍ ഇരുവരേയും കാറില്‍ കയറ്റി ഊട്ടിയിലേക്ക് കൊണ്ട് പോകുകകയായിരുന്നു. ഊട്ടിയിലെ ലോഡ്ജില്‍ മുറിയെടുത്ത ശേഷം 17കാരിയെ പീഡിപ്പിച്ചതായും, 14കാരിയെ പീഡിപ്പിക്കാന്‍ ശ്രമിച്ചതായും മൊഴിയില്‍ പറയുന്നു. തുടര്‍ന്ന് പിറ്റേദിവസം ഇരുവരേയും ബത്തേരിയില്‍ തിരികെ കൊണ്ടുവിട്ട ശേഷം യുവാക്കള്‍ കാറില്‍ കടന്നുകളഞ്ഞതായും പരാതിയില്‍ പറയുന്നു. സംഭവം പുറത്തായതിനെ തുടര്‍ന്ന് മാനന്തവാടി പോലീസ് പെണ്‍കുട്ടികളുടെ മൊഴിയെടുത്തു. 
മൊബൈല്‍ ഫോണ്‍ കോളുകളും മറ്റും കേന്ദ്രീകരിച്ച് അന്വേഷണം ഊര്‍ജ്ജിതമാക്കിയിട്ടുണ്ട്. പ്രതികള്‍ വിദ്യാര്‍ത്ഥികളോട് വ്യാജപേരുകളാണ് പറഞ്ഞത്. ഫോണ്‍ നമ്പറിന്റെ അടിസ്ഥാനത്തില്‍ പ്രതികളുടെ മേല്‍വിലാസം ഇതിനകം ശേഖരിച്ചു കഴിഞ്ഞിട്ടുണ്ട്. ഇന്നോ നാളെയോ കസ്റ്റഡിയിലാക്കാന്‍ കഴിയുമെന്നാണ് കരുതുന്നത്‌