കല്യാണ മാസത്തിലെ ശുഭ മുഹൂര്ത്തങ്ങള് ആര്ക്കും വേണ്ട; മഴക്കെടുതിയില് വലഞ്ഞ് വിവാഹങ്ങള് കൂട്ടത്തോടെ മാറ്റിവച്ചു; പല വധൂവരന്മാരും ദുരിതാശ്വാസക്യാമ്പില്; മക്കളുടെ വിവാഹത്തിനായി ഒരുക്കി വച്ച സര്വതും നഷ്ടപ്പെട്ടവരുടെ വേദന കരളലിയിപ്പിക്കുന്നത്
ചിങ്ങമാസം പൊതുവേ കല്യാണ മാസമെന്നാണ് അറിയപ്പെടുന്നത്. എന്നാല് പ്രളയ കെടുതി വന്നതോടെ വിവാഹം ഉറപ്പിച്ചവരുടെ അവസ്ഥയും ദുരിതത്തിലായി. ബഹുഭൂരിപക്ഷവും കല്യാണം മാറ്റിവച്ചു. ഇതിനിടെ ക്യാംപില് വച്ച് നടത്തിയ കല്യാണം വാര്ത്തയായി.
സംസ്ഥാനത്ത് നൂറുകണക്കിനു വിവാഹങ്ങളാണ് ഇന്നലെ മാറ്റിവച്ചത്. ഗുരുവായൂരില് നടക്കാനിരുന്ന 200 വിവാഹമാണു മാറ്റിവച്ചത്. അപ്പോള് മറ്റിടങ്ങളിലെ അവസ്ഥ പറയേണ്ടല്ലോ. ചിങ്ങമാസത്തിലെ ഏറ്റവും നല്ല മുഹൂര്ത്തങ്ങളിലൊന്നായ അനിഴം നക്ഷത്രം ഇന്നലെയായിരുന്നു.
സ്കൂള് അവധി തുടങ്ങിയതിനു ശേഷവും ഓണത്തിനു മുമ്പും വിവാഹം നടത്താനുള്ള ബന്ധുമിത്രാദികളുടെ തീരുമാനമാണു പ്രളയത്തില് പൊലിഞ്ഞത്. നേരത്തേ തീരുമാനിച്ച് പന്തലും ഡെക്കറേഷനും മറ്റും പൂര്ത്തിയാക്കി വരുന്നതിനിടെയായിരുന്നു പേമാരിയും വെള്ളപ്പൊക്കവും വിഘ്നമായത്. വിവാഹം മാറ്റിവച്ചതോടെ ഗുരുവായൂരില് കല്യാണപ്പാര്ട്ടികള് ഹോട്ടല്മുറി ബുക്കിങ് റദ്ദാക്കി. നെടുമ്പാശേരി വിമാനത്താവളം അടച്ചതിനാല് വിദേശത്തുനിന്ന് പല പ്രതിശ്രുത ദമ്പതികള്ക്കും എത്താനായില്ല. പിന്നീട് കരിപ്പൂര്, തിരുവനന്തപുരം വിമാനത്താവളങ്ങളിലേക്ക് വരാന് നിശ്ചയിച്ചെങ്കിലും വാഹനഗതാഗതം പലയിടത്തും തടസമെന്നു വ്യക്തമായതോടെ യാത്ര റദ്ദാക്കുകയായിരുന്നു.
മൂവാറ്റുപുഴ കടുംപിടി സ്വദേശി വെള്ളാപ്പിള്ളില് പ്രദീപിന്റെ ഇന്നലെ നടക്കേണ്ട വിവാഹം മാറ്റിവച്ചു. അടിമാലിയിലുള്ള വധുവിന് മൂവാറ്റുപുഴയിലെ വിവാഹം നടക്കേണ്ട ഓഡിറ്റോറിയത്തില് എത്താന് കഴിയുമായിരുന്നില്ല. അടിമാലിയില്നിന്നു മൂവാറ്റുപുഴയിലേക്കു ഗതാഗതം അസാധ്യമായിരുന്നു. വിവാഹം നടത്താനിരുന്ന ഓഡിറ്റോറിയം മൂവാറ്റുപുഴയാറിലെ വെള്ളംകയറി മൂടി.
നിലമ്പൂര് എരിഞ്ഞിമങ്ങാട് യത്തീംഖാനയില് ദുരിതാശ്വാസക്യാമ്പില് വധു അഭയം തേടിയതിനു പുറമേ കോട്ടയം സ്വദേശിയായ വരനു പ്രളയം മൂലം എത്താനായില്ല. ഇതു മൂലവും വിവാഹം നീട്ടിവയ്ക്കേണ്ടിവന്നു. ചാലിയാര് പഞ്ചായത്തിലെ മതില്മൂല കോളനിയിലെ യുവതിയുടെ വിവാഹമാണു മാറ്റിവച്ചത്. മൂവാറ്റുപുഴ ഏനാനല്ലൂര് കുത്തുകല്ലിങ്കല് ശശിയുടെ മകന്റെ ഇന്നലെ നടക്കേണ്ട വിവാഹവും മാറ്റിവച്ചു. മഴക്കെടുതിമൂലം പലരും വിവാഹം ആര്ഭാടമാക്കേണ്ടതില്ലെന്ന തീരുമാനവും എടുത്തിട്ടുണ്ട്. നിശ്ചയിച്ച വിവാഹംമാറ്റിവച്ചതു പലര്ക്കും അറിയിക്കാനും കഴിഞ്ഞിട്ടില്ല. വൈദ്യുതി ഇല്ലാത്തതിനാല് മൊബൈല് ഫോണ് റീച്ചാര്ജ് ചെയ്യാനാകാത്തതാണ് കാരണം. ഏറ്റവും അടുത്ത ബന്ധുമിത്രാദികളെപ്പോലും ഇക്കാര്യം അറിയിക്കാനായില്ലെന്നു കുത്തുകല്ലിങ്കല് ശശി പറഞ്ഞു.
https://www.facebook.com/Malayalivartha
