പുതിയ അധ്യയന വർഷത്തിന്റെ ആദ്യ ദിനത്തിൽ സ്കൂളിലേക്ക് പോകാൻ തയ്യാറെടുക്കുന്നതിനിടെ ഹൃദയാഘാതം സംഭവിച്ച് ചികിത്സയിലായിരുന്ന മലയാളി വിദ്യാർഥി റിയാദിൽ അന്തരിച്ചു. റിയാദ് ന്യൂ മിഡിൽ ഈസ്റ്റ് ഇന്റർനാഷനൽ സ്കൂളിലെ പ്ലസ് വൺ വിദ്യാർഥി ഹനീൻ അബ്ദുസമദ് (15) ആണ് മരിച്ചത്. തീവ്രപരിചരണ വിഭാഗത്തിൽ ചികിത്സയിൽ തുടരുന്നതിനിടെ ചൊവ്വാഴ്ച വൈകിട്ടോടെയായിരുന്നു അന്ത്യം. കഴിഞ്ഞ ഏപ്രിൽ അഞ്ചിനാണ് ഹനീന് ദേഹാസ്വാസ്ഥ്യം അനുഭവപ്പെട്ടത്. പ്ലസ് വൺ ക്ലാസിലേക്ക് പോകാനായി യൂണിഫോം ധരിച്ച് ഒരുങ്ങുന്നതിനിടെ വീട്ടിൽ കുഴഞ്ഞുവീഴുകയായിരുന്നു.

ഉടൻ തന്നെ പ്രിൻസസ് നൂറ യൂണിവേഴ്സിറ്റി ക്യാംപസിലെ കിങ് അബ്ദുള്ള ബിൻ അബ്ദുൽ അസീസ് യൂണിവേഴ്സിറ്റി ഹോസ്പിറ്റലിൽ പ്രവേശിപ്പിച്ചെങ്കിലും നില വഷളാവുകയായിരുന്നു. മലപ്പുറം കൊണ്ടോട്ടി ഐക്കരപ്പടി സ്വദേശി പാണമ്പ്ര കൊട്ടമ്പറമ്പത്ത് അഡ്വ. പി.കെ. ഹബീബ് റഹ്മാന്റെയും (കാലിക്കറ്റ് യൂണിവേഴ്സിറ്റി ജീവനക്കാരൻ), ഡോ. കെ. ഷയീന്റെയും (അസിസ്റ്റന്റ് പ്രഫസർ, പ്രിൻസസ് നൂറ യൂണിവേഴ്സിറ്റി) മകനാണ്. പത്താം ക്ലാസ് വിജയത്തിന് ശേഷം അതേ സ്കൂളിൽ തന്നെ പ്ലസ് വണ്ണിന് ചേർന്ന ഹനീൻ, മാതാവിനും ഇളയ സഹോദരിക്കും കൂട്ടായി റിയാദിൽ തന്നെ തുടരാൻ തീരുമാനിക്കുകയായിരുന്നു. പഠനത്തിലും ഫുട്ബോളിലും ഖുർആൻ ഹൃദിസ്ഥമാക്കുന്നതിലും ഒരേപോലെ മികവ് പുലർത്തിയ ഹനീന്റെ വിയോഗം പ്രവാസി സമൂഹത്തിന് വലിയൊരൊ വേദനയായി മാറിയിരിക്കുകയാണ്.