പശ്ചിമബംഗാള് വോട്ടെടുപ്പില് വ്യാപക ക്രമക്കേടുകള് നടക്കുന്നതായി പരാതി
പശ്ചിമബംഗാളില് രണ്ടാംഘട്ട വോട്ടെടുപ്പ് പുരോഗമിക്കവെ വിവിധയിടങ്ങളില് വ്യാപക ക്രമക്കേടുകള് നടക്കുന്നതായി പരാതി. വോട്ടെടുപ്പിന് മുന്പേ തന്നെ രാഷ്ട്രീയ സംഘര്ഷങ്ങളാല് ശ്രദ്ധയാകര്ഷിച്ച ഫാള്ട്ട നിയോജകമണ്ഡലത്തിലാണ് പോളിംഗ് ദിനത്തിലും ഗുരുതരമായ ആരോപണങ്ങള് ഉയരുന്നത്. ബിജെപി സ്ഥാനാര്ത്ഥിയുടെ ചിഹ്നത്തിന് നേരെയുള്ള ബട്ടണ് അമര്ത്താന് കഴിയാത്ത വിധം ക്രമക്കേട് നടത്തിയെന്നാണ് പ്രധാന ആരോപണം.
ഫാള്ട്ട മണ്ഡലത്തിലെ ചില ബൂത്തുകളില് വോട്ടിങ് യന്ത്രത്തിലെ ബിജെപി സ്ഥാനാര്ത്ഥിയുടെ ബട്ടണ് ടേപ്പ് ഉപയോഗിച്ച് മറച്ച നിലയിലാണെന്ന് ബിജെപി നേതാക്കള് ആരോപിച്ചു. ഇതുമായി ബന്ധപ്പെട്ട ദൃശ്യങ്ങളും അവര് പുറത്തുവിട്ടിട്ടുണ്ട്. ബിജെപിക്ക് പുറമെ സിപിഎം സ്ഥാനാര്ത്ഥിയുടെ ചിഹ്നത്തിന് നേരെയുള്ള ബട്ടണും ഇത്തരത്തില് ടേപ്പ് ഒട്ടിച്ച് പ്രവര്ത്തനരഹിതമാക്കിയ നിലയിലാണെന്ന് ചിത്രങ്ങള് സൂചിപ്പിക്കുന്നു. എന്നാല് ഈ സംഭവത്തില് സിപിഎം ഇതുവരെ ഔദ്യോഗികമായി പ്രതികരിച്ചിട്ടില്ല.
വിവിധ ബൂത്തുകളില് തൃണമൂല് കോണ്ഗ്രസ് പ്രവര്ത്തകര് സംഘടിതമായി വോട്ടിങ് യന്ത്രങ്ങളില് ക്രമക്കേട് നടത്തുകയാണെന്ന് ബിജെപി സ്ഥാനാര്ത്ഥി ദേബാങ്ഷു പാണ്ഡ ആരോപിച്ചു. പലയിടങ്ങളിലും ബിജെപിക്ക് വോട്ട് രേഖപ്പെടുത്താന് വോട്ടര്മാര്ക്ക് സാധിക്കുന്നില്ലെന്നും അദ്ദേഹം പറഞ്ഞു. ഫാള്ട്ടയില് തൃണമൂല് സ്ഥാനാര്ത്ഥി ജഹാംഗീര് ഖാനും യുപിയിലെ പോലീസ് ഉദ്യോഗസ്ഥനായ അജയ് പാല് ശര്മ്മയും തമ്മില് കഴിഞ്ഞ ദിവസമുണ്ടായ തര്ക്കം നിലനില്ക്കെയാണ് പുതിയ വിവാദങ്ങള് ഉടലെടുത്തിരിക്കുന്നത്.
ആരോപണങ്ങള് ഉയര്ന്ന സാഹചര്യത്തില് പശ്ചിമബംഗാള് തിരഞ്ഞെടുപ്പ് കമ്മീഷന് അന്വേഷണം ആരംഭിച്ചു. വോട്ടിങ് യന്ത്രങ്ങളില് ബോധപൂര്വം ക്രമക്കേട് നടന്നതായി തെളിഞ്ഞാല് പ്രസ്തുത ബൂത്തുകളില് റീപോളിംഗ് നടത്തുമെന്ന് തിരഞ്ഞെടുപ്പ് കമ്മീഷണര് അറിയിച്ചു. കമ്മീഷന്റെ റിപ്പോര്ട്ടിനായി രാഷ്ട്രീയ പാര്ട്ടികള് ഉറ്റുനോക്കുകയാണ്.
https://www.facebook.com/Malayalivartha
