ഗാസയില് ഇസ്രയേല് ഡ്രോണ് ആക്രമണത്തില് ഹമാസ് കമാന്ഡറും മകനും ഉള്പ്പെടെ അഞ്ചു മരണം
യുദ്ധം തുടരുന്ന ഗാസയില് ഇസ്രയേല് നടത്തിയ ഡ്രോണ് ആക്രമണത്തിലും ഷെല്ലാക്രമണത്തിലും ഹമാസ് കമാന്ഡര് ഉള്പ്പെടെ അഞ്ചു പേര് കൊല്ലപ്പെട്ടു. ഗാസ സിറ്റിക്ക് സമീപമുള്ള അല് റിമാലില് കാറിന് നേരെ ഉണ്ടായ മിസൈല് ആക്രമണത്തിലാണ് ഹമാസ് കമാന്ഡര് ഇയാദ് അല് ഷാന്ബരിയും അദ്ദേഹത്തിന്റെ മകന് സലാഹും കൊല്ലപ്പെട്ടത്. ആക്രമണത്തില് സാരമായി പരിക്കേറ്റ ആറുപേരെ ആശുപത്രിയില് പ്രവേശിപ്പിച്ചു.
ഗാസയിലെ സിവില് ഡിഫന്സ് ഏജന്സി നല്കുന്ന വിവരമനുസരിച്ച്, അല് റിമാലിലൂടെ സഞ്ചരിക്കുകയായിരുന്ന വാഹനത്തിന് നേരെ ഇസ്രയേല് ഡ്രോണ് ആക്രമണം നടത്തുകയായിരുന്നു. ഇയാദ് അല് ഷാന്ബരിക്കും മകനും പുറമെ വാഹനത്തിലുണ്ടായിരുന്ന മറ്റ് രണ്ടുപേര് കൂടി കൊല്ലപ്പെട്ടിട്ടുണ്ട്. ഇവരെക്കുറിച്ചുള്ള കൂടുതല് വിവരങ്ങള് ലഭ്യമായിട്ടില്ല. പ്രദേശത്തെ ഭീകരപ്രവര്ത്തനങ്ങള് ലക്ഷ്യമിട്ടാണ് ആക്രമണം നടത്തിയതെന്ന് ഇസ്രയേല് പ്രതിരോധ സേന സ്ഥിരീകരിച്ചെങ്കിലും കൂടുതല് വിശദാംശങ്ങള് വെളിപ്പെടുത്തിയിട്ടില്ല.
ഗാസയിലെ മറ്റൊരു പ്രധാന കേന്ദ്രമായ ഖാന് യൂനിസില് ഇസ്രയേല് നടത്തിയ ആക്രമണത്തില് ആദില് അല് നജ്ജാര് എന്ന ഒന്പതു വയസ്സുകാരന് കൊല്ലപ്പെട്ടു. സാധാരണക്കാരെയും കുട്ടികളെയും ബാധിക്കുന്ന വിധത്തില് ഇസ്രയേല് ആക്രമണം തുടരുന്നത് വലിയ പ്രതിഷേധങ്ങള്ക്കാണ് അന്താരാഷ്ട്ര തലത്തില് വഴിയൊരുക്കുന്നത്.
ഒക്ടോബറില് വെടിനിര്ത്തല് പ്രഖ്യാപനം നിലവില് വന്നിരുന്നെങ്കിലും ഗാസയില് ആക്രമണങ്ങള്ക്ക് ശമനമുണ്ടായിട്ടില്ലെന്നാണ് പുറത്തുവരുന്ന റിപ്പോര്ട്ടുകള് സൂചിപ്പിക്കുന്നത്. ഹമാസ് കരാര് ലംഘിച്ചുവെന്ന് ഇസ്രയേലും, ഇസ്രയേല് സമാധാന നീക്കങ്ങളെ അട്ടിമറിക്കുന്നുവെന്ന് ഹമാസും പരസ്പരം ആരോപിക്കുന്നു. വെടിനിര്ത്തല് പ്രഖ്യാപനത്തിന് ശേഷവും ദിനംപ്രതിയെന്നോണം ഉണ്ടാകുന്ന വ്യോമാക്രമണങ്ങള് മേഖലയിലെ സമാധാന ചര്ച്ചകളെ പ്രതിസന്ധിയിലാക്കിയിരിക്കുകയാണ്.
https://www.facebook.com/Malayalivartha
