മുഖ്യമന്ത്രിയുടെ ദുരിതാശ്വാസനിധിയിലേക്ക് സി.എം.ഡി.ആര്‍.എഫ് ഓണ്‍ലൈന്‍ പേമെന്റ് ഗേറ്റ് വേ മുഖേന ബുധനാഴ്ച വൈകിട്ട് ആറുമണിവരെ ലഭിച്ചത് 129 കോടി രൂപ. ഇതിനുപുറമേ സ്‌റ്റേറ്റ് ബാങ്ക് ഓഫ് ഇന്ത്യയിലെ സി.എം.ഡി.ആര്‍.എഫ് അക്കൗണ്ടില്‍ ചൊവ്വാഴ്ച വരെ 259 കോടി രൂപയും ലഭിച്ചു. രണ്ടുദിവസങ്ങളില്‍ ഓഫീസുകളില്‍ നേരിട്ട് സംഭാവനയായി ലഭിച്ച ചെക്കുകളും മറ്റും ഇതില്‍പ്പെടില്ല.

donations.cmdrf.kerala.gov.in എന്ന വെബ്‌സൈറ്റ് വഴി രാജ്യത്തിനകത്തും പുറത്തുമുള്ളവര്‍ക്ക് ഓണ്‍ലൈനായി പണമടയ്ക്കാനുള്ള സംവിധാനം ഏര്‍പ്പെടുത്തിയത് സിഡിറ്റാണ്. ഇതുവരെ മൂന്നുലക്ഷത്തില്‍പരം പേര്‍ ഈ സൗകര്യം ഉപയോഗപ്പെടുത്തി പണമടച്ചു. 181 രാജ്യങ്ങളില്‍ നിന്നുമുള്ളവര്‍ ഓണ്‍ലൈനായി സംഭാവന നല്‍കിയവരില്‍പെടുന്നു. വെബ്‌സൈറ്റിലുള്ള ഏഴു ബാങ്ക് പേയ്‌മെന്റ് ഗേറ്റ്‌വേകളും നാല് യുപി.ഐകളും വഴി 90.4 കോടി രൂപയാണ് ലഭിച്ചത്. ഇതിനുപുറമേ ഈ വെബ്‌സൈറ്റിലുള്ള പേ റ്റി.എം ലിങ്ക് വഴി 17 ലക്ഷം പേ.റ്റി.എം ഉപഭോക്താക്കളില്‍ നിന്നുമായി 38.6 കോടി രൂപയും ഇതുവരെ ലഭിച്ചു.