പ്രശസ്ത ഛായാഗ്രാഹകന്‍ മെല്ലി ഇറാനി അന്തരിച്ചു. 94 വയസ്സായിരുന്നു അദ്ദേഹത്തിന്. ചെന്നൈയിലായിരുന്നു അന്ത്യം. അനുഭവങ്ങള്‍ പാളിച്ചകള്‍, യക്ഷി, അടിമകള്‍, വാഴ്വേമായം,അരനാഴികനേരം,ശരപഞ്ജരം, ഭൂമിദേവി പുഷ്പിണിയായി,പഞ്ചമി,ലാവ,അങ്കുരം,ഇടവഴിയിലെ പൂച്ച മിണ്ടാപ്പൂച്ച,വളര്‍ത്തുമൃഗങ്ങള്‍,പൂച്ചസന്യാസി,വെള്ളം,തുടങ്ങിയ അനേകം ചിത്രങ്ങള്‍ക്ക് അദ്ദേഹം ദൃശ്യഭാഷയൊരുക്കി.

ഇന്ത്യന്‍ സിനിമയിലെ ആദ്യകാല ക്യാമറാമാനായ ആദി എം.ഇറാനിയുടെ മകനായി 1932 ഓഗസ്റ്റ് 5ന് ബോംബെയിലായിരുന്നു ജനനം. പിതാവില്‍ നിന്ന് ഛായാഗ്രഹണത്തിന്റെ ആദ്യപാഠങ്ങള്‍ പഠിച്ചു.1961ല്‍ ജ്ഞാനസുന്ദരി എന്ന ചിത്രത്തിലൂടെയാണ് മലയാളത്തിലേക്ക് എത്തുന്നത്. കെ.എസ്.സേതുമാധവന്‍, ഹരിഹരന്‍ തുടങ്ങിയ സംവിധായകരുടെ സ്ഥിരം സഹപ്രവര്‍ത്തകനായി. സംവിധായകരുടെ മനസ് അറിഞ്ഞ് ക്യാമറ ചലിപ്പിക്കാനുള്ള അപൂര്‍വമായ ശേഷിയും അദ്ദേഹത്തിനുണ്ടായിരുന്നു. മലയാളത്തിലെ അനശ്വര ഗാനങ്ങള്‍ പലതും മെല്ലി ഇറാനിയുടെ ക്ലാസിക് ഫ്രെയിമുകളുടെ നിറവിലാണ് പിറന്നത്.

പ്രവാചകന്മാരേ പറയൂ,കല്യാണി കളവാണി,അഗ്‌നിപര്‍വതം പുകഞ്ഞു,ഉജ്ജയിനിയിലെ ഗായിക,ചലനം ചലനം, നീലഗിരിയുടെ സഖികളേ,പാരിജാതം തിരുമിഴി തുറന്നു,താഴമ്പൂ മണമുള്ള,പൂന്തേനരുവീ,ശ്രാവണ ചന്ദ്രിക, സ്വര്‍ണചാമരം വീശിയെത്തുന്ന,വിളിച്ചു ഞാന്‍ വിളികേട്ടു,സാമ്യമകന്നോരുദ്യാനമേ,ചന്ദ്രകിരണം ചാലിച്ചെടുത്തൊരു,ചന്ദ്രകളഭം ചാര്‍ത്തിയുറങ്ങും തീരം,ചന്ദ്രികയിലലിയുന്നു ചന്ദ്രകാന്തം,പാതിരാത്തണുപ്പ് വീണു,നനഞ്ഞ നേരിയ പട്ടുറുമാല്‍, കാറ്റു വന്നു കള്ളനെപ്പോലെ എന്നിങ്ങനെ നീളുന്ന അദ്ദേഹത്തിന്റെ മാസ്മരിക സൃഷ്ടികള്‍.