പ്രളയ കെടുതിയിൽ അകപ്പെട്ട കേരളത്തെ കരകയറ്റുന്നതിനായി മുഖ്യമന്ത്രിയുടെ ദുരിതാശ്വാസ നിധിയിലേക്ക് ഫണ്ട് കണ്ടെത്താന്‍ ഫേസ്ബുക്കില്‍ എന്റെ വക പത്ത് രൂപ ചലഞ്ച്. ദുരിതാശ്വാസ നിധിയിലേക്ക് 10 രൂപ അയച്ച്‌ സ്‌ക്രീന്‍ ഷോട്ട് പോസ്റ്റ് ചെയ്ത് 10 ഫ്രണ്ട്‌സിനെ മെന്‍ഷന്‍ ചെയ്താണ് ചലഞ്ചിന് ക്ഷണിക്കുന്നത്. അവര്‍ പൈസ അയച്ച്‌ സ്‌ക്രീന്‍ ഷോട്ട് കമന്റ് ചെയ്യുന്നു. ചലഞ്ച് ഏറ്റെടുത്തയാളും അവരുടെ ഫ്രണ്ട്‌സിന്റെ ചലഞ്ചിനു ക്ഷണിക്കുന്നു. ഇതിനോടകം തന്നെ നിരവധി പേര്‍ ഈ ചലഞ്ച് ഏറ്റെടുത്തു കഴിഞ്ഞു. '#എന്റെ വക പത്തുരൂപ' '#10Rupachallenge' എന്നീ ഹാഷ് ടാഗുകളിലാണ് ചലഞ്ച് സൈബര്‍ ലോകം ഏറ്റെടുത്തിരിക്കുന്നത്.

അതേസമയം പ്രളയത്തില്‍ വീട് നഷ്ടപ്പെട്ടവരുടെ പുനരധിവാസം ഉറപ്പാക്കുമെന്ന് മുഖ്യമന്ത്രി പിണറായി വിജയന്‍ പറഞ്ഞു. രാവിലെ എട്ട് മണിയോടെ തിരുവനന്തപുരത്തു നിന്നും പുറപ്പെട്ട മുഖ്യമന്ത്രിയും റവന്യുമന്ത്രിയും ഉദ്യോഗസ്ഥരും അടങ്ങുന്ന സംഘം അഞ്ച് ദുരിതാശ്വാസ ക്യാമ്പുകള്‍ സന്ദര്‍ശിച്ചു. പ്രളയക്കെടുതി നേരിട്ട് വിലയിരുത്തുന്നതിനായിരുന്നു മുഖ്യമന്ത്രിയുടെ സന്ദര്‍ശനം.