ആന സ്‌നേഹത്തിന് പുരാണ കഥകളോളം പഴക്കമുണ്ട്. അതൊരിക്കലും പറഞ്ഞാല്‍ തീരില്ല. കഥകളില്‍ മാത്രം കേട്ടിരുന്ന ആന സ്‌നേഹം ഇന്നലെ വയനാട്ടിലെ ജനങ്ങള്‍ നേരിട്ടുകണ്ടു. കുട്ടിക്കുറുമ്പന്റെ ജനനത്തിനായി ഐകമത്യം മഹാബലമായി എത്തിയത് 11 ആനകളാണ്. മനുഷ്യ സ്‌നേഹം ഈ ആനകള്‍ക്ക് മുമ്പിലെന്ത് എന്ന് തോന്നും പോലത്തെ കാഴ്ചയായിരുന്നു അത്. 

പഴയ വൈത്തിരിയില്‍നിന്നു രണ്ടു കിലോമീറ്റര്‍ മാറി വനത്തോടു ചേര്‍ന്ന കാപ്പിത്തോട്ടത്തിലാണ് സംഭവം. ഈ സ്ഥലത്ത് കാട്ടാന പ്രസവിച്ചതോടെ കുട്ടിക്കു സുരക്ഷയൊരുക്കി തോട്ടത്തിലും സമീപത്തുമായി നിലയുറപ്പിച്ചത് 11 ആനകളടങ്ങിയ കൂട്ടം. മുള്ളന്‍പാറ പഴയ വികെ പ്ലാന്റേഷന്റെ ഭാഗമായ കാപ്പിത്തോട്ടത്തിലായിരുന്നു കാട്ടാനയുടെ പ്രസവം. തോട്ടത്തില്‍ നിലയുറപ്പിച്ച കാട്ടാനക്കൂട്ടത്തിനിടയില്‍ മണിക്കൂറുകള്‍ മാത്രം പ്രായമുള്ള കുട്ടിയാന ഇന്നലെ രാവിലെയാണ് നാട്ടുകാരുടെ ശ്രദ്ധയില്‍പ്പെട്ടത്. 

സംഭവം പുറത്തറിഞ്ഞതോടെ വന്‍ ജനക്കൂട്ടമാണ് ജനിച്ച കുട്ടിക്കുറുമ്പനെ കാണാന്‍ എത്തിയത്. ആനകള്‍ക്ക് പ്രകോപനമുണ്ടാക്കരുതെന്ന് വനപാലകര്‍ നിര്‍ദേശം നല്‍കി. അങ്ങനെയെന്തെങ്കിലും ഉണ്ടായാല്‍ ആനകള്‍ ആക്രമണകാരികളാകുമെന്നാണ് വിലയിരുത്തല്‍. 11 ആനകള്‍ ഇളകിയാലുണ്ടായ അവസ്ഥ പറയേണ്ടല്ലോ... 

മുള്ളന്‍പാറയില്‍ പതിവായി ഇറങ്ങുന്ന കൂട്ടത്തില്‍പ്പെട്ട ആനയാണ് പ്രസവിച്ചതെന്നു പ്രദേശവാസികള്‍ പറഞ്ഞു. നാല് കുട്ടിയാനകളും ഉള്‍പ്പെടുന്നതാണ് തോട്ടത്തിലുള്ള കൂട്ടം. കാപ്പിത്തോട്ടത്തോടു ചേര്‍ന്നുള്ള ചെങ്കുത്തായ തേയിലക്കാടും മറികടന്നുവേണം ആനകള്‍ക്കു വനത്തിലെത്താന്‍. കുട്ടിയാനയ്ക്കു കയറ്റം കയറാന്‍ പ്രാപ്തിയാകുംവരെ കൂട്ടം തോട്ടത്തിലും സമീപത്തുമായി നിലയുറപ്പിക്കാനാണ് സാധ്യതയെന്നു വനപാലകര്‍ പറഞ്ഞു. ആനക്കൂട്ടം വനപാലകരുടെ നിരീക്ഷണത്തിലാണ്. ആളുകള്‍ ആനകള്‍ക്കടുത്തേക്കു പോകുന്നതു ഒഴിവാക്കുന്നതിന് വനം വകുപ്പ് ജാഗ്രത പുലര്‍ത്തുന്നുണ്ട്. എത്രയുംവേഗം ആനകളെ കാട്ടിലേക്കു തുരത്താനാണ് വനപാലകരുടെ പദ്ധതി.