ഐപിഎല്ലിൽ സൺറൈസേഴ്സ് ഹൈദരാബാദിനെ 82 റൺസിന് പരാജയപ്പെടുത്തി ഗുജറാത്ത് ടൈറ്റൻസ് പോയിന്റ് ടേബിളിൽ ഒന്നാമതായി. 169 റൺസ് വിജയലക്ഷ്യവുമായി കളത്തിലിറങ്ങിയ ഹൈദരാബാദിന് 14.5 ഓവറിൽ 86 റൺസ് നേടാനേ സാധിച്ചുള്ളൂ.

28 റൺസ് വഴങ്ങി മൂന്ന് വിക്കറ്റുകൾ നേടിയ ഗുജറാത്തിന്റെ ക​ഗിസോ റബാഡയാണ് കളിയിലെ താരം. ടോസ് നേടിയ സൺറൈസേഴ്സ് ഹൈദരാബാദ് ഗുജറാത്തിനെ ബാറ്റിങ്ങിന് അയക്കുകയായിരുന്നു.

ആദ്യം ബാറ്റ് ചെയ്‌ത ഗുജറാത്ത് സായ് സുദർശന്റെയും വാഷിങ്ടൺ സുന്ദറിന്റെയും അർധസെഞ്ച്വറികളുടെ മികവിൽ 20 ഓവറിൽ അഞ്ച് വിക്കറ്റ് നഷ്ടത്തിൽ 168 റൺസെടുത്തു. 44 പന്തിൽ 61 റൺസെടുത്ത സായ് സുദർശനാണ് ഗുജറാത്തിന്റെ ടോപ് സ്‌കോറർ. വാഷിങ്ടൺ സുന്ദർ 33 പന്തിൽ 50 റൺസെടുത്ത് അവസാന ഓവറിൽ പുറത്തായപ്പോൾ നിഷാന്ത് സിന്ധു 14 പന്തിൽ 22 റൺസെടുത്തു

ഹൈദരാബാദിനായി പ്രഫുൽ ഹിംഗെ 17 റൺസിന് രണ്ട് വിക്കറ്റെടുത്തപ്പോൾ സാക്കിബ് ഹുസൈൻ 37 റൺസിന് രണ്ട് വിക്കറ്റെടുത്തു. 169 റൺസ് എന്ന ലക്ഷ്യം അനായാസം മറികടക്കാമെന്ന സൺറൈസേഴ്സിന്റെ ആത്മവിശ്വാസം തകർക്കുന്ന പ്രകടനം പുറത്തെടുത്ത് ഗുജറാത്ത് ബൗളർമാർ.