യൂണിവേഴ്‌സിറ്റി കോളേജില്‍ വിദ്യാര്‍ത്ഥിനി ആത്മഹത്യയ്ക്ക് ശ്രമിച്ച സംഭവത്തില്‍ എസ്.എഫ്.ഐ നേതാക്കള്‍ക്കെതിരെ കേസെടുത്തേക്കും. സംഭവത്തില്‍ വിവാദമുണ്ടാക്കാതെ നേതാക്കള്‍ക്കെതിരെ കേസെടുക്കാന്‍ പോലീസിന് നിര്‍ദേശം നല്‍കിയിട്ടുണ്ടെന്നാണ് സൂചന. 

ആത്മഹത്യാ കുറിപ്പിന്റെ അടിസ്ഥാനത്തില്‍ കേസെടുക്കേണ്ടതാണെന്ന് പൊലീസിന് നിയമോപദേശം ലഭിച്ചു. വിദ്യാര്‍ത്ഥിഥിനിയുടെ മൊഴി ഇന്ന് വീണ്ടും രേഖപ്പെടുത്തും. കോളേജ് യൂണിയന്‍ നേതാക്കളുടെ നിരന്തര ശല്യത്തില്‍ പഠനം മുടങ്ങുന്നതിന്റെ വിഷമം ആത്മഹത്യാക്കുറിപ്പായി എഴുതിവച്ചാണ് വിദ്യാര്‍ത്ഥിനി ഞരമ്ബ് മുറിച്ച് ജീവനൊടുക്കാന്‍ ശ്രമിച്ചത്.

സംഘടനാ പ്രവര്‍ത്തനങ്ങളില്‍ പങ്കെടുക്കാന്‍ നേതാക്കളില്‍ നിന്നും സമ്മര്‍ദമുണ്ടായെന്നും ആത്മഹത്യാ പ്രേരണയ്ക്ക് കാരണക്കാര്‍ എസ്.എഫ്.ഐ യൂണിറ്റ് ഭാരവാഹികളും കോളേജ് പ്രിന്‍സിപ്പലും ആണെന്നു പെണ്‍കുട്ടി കുറിപ്പില്‍ ആരോപിച്ചിരുന്നു. അദ്ധ്യാപകരെയും അതിരൂക്ഷമായി കുറ്റപ്പെടുത്തിയിരുന്നു. അതേസമയം, സംഭവത്തില്‍ ആറ്റിങ്ങല്‍ പൊലീസ് മൊഴിയെടുത്തപ്പോള്‍ കേസുമായി മുന്നോട്ട് പോകുന്നില്ലെന്ന് പറഞ്ഞതോടെ അവര്‍ കേസ് അവസാനിപ്പിച്ചു.

എന്നാല്‍, ആത്മഹത്യാശ്രമം നടന്നത് കന്റോണ്‍മന്റ് പൊലീസ് സ്‌റ്റേഷന്‍ പരിധിയിലായതിനാല്‍ ആത്മഹത്യാശ്രമം എന്ന കുറ്റം ചുമത്തി അവിടെ വിദ്യാര്‍ത്ഥിനിക്കെതിരെ കേസെടുത്തു. ഇന്ന് മൊഴിയെടുക്കുമ്‌ബോള്‍ പരാതിയില്ലെന്ന് പെണ്‍കുട്ടി പറഞ്ഞാല്‍ പോലും ഈ വ്യക്തികള്‍ക്കെതിരെ ആത്മഹത്യാ പ്രേരണക്ക് കേസെടുക്കാമെന്നാണ് നിയമോപദേശം. മൊഴിയെടുത്ത ശേഷം ഇക്കാര്യത്തില്‍ അന്തിമതീരുമാനമെടുക്കുമെന്ന് പൊലീസ് അറിയിച്ചു.

ഇക്കഴിഞ്ഞ വ്യാഴാഴ്ച കോളേജില്‍ പോയ പെണ്‍കുട്ടിയെ കാണാനില്ലെന്ന് ബന്ധുക്കള്‍ ആ?റ്റിങ്ങല്‍ പൊലീസില്‍ രാത്രി പരാതി നല്‍കിയിരുന്നു. വെള്ളിയാഴ്ച രാവിലെ 9.30 ഓടെ കോളേജിലെ ജീവനക്കാരാണ് സ്ത്രീകളുടെ വിശ്രമമുറിയില്‍ പെണ്‍കുട്ടിയെ അബോധാവസ്ഥയില്‍ കണ്ടെത്തിയത്. തുടര്‍ന്ന് കന്റോണ്‍മെന്റ് പൊലീസ് മെഡിക്കല്‍കോളേജ് ആശുപത്രിയില്‍ എത്തിച്ചു. പെണ്‍കുട്ടിയില്‍ നിന്ന് ഡോക്ടര്‍ ആത്മഹത്യാക്കുറിപ്പ് കണ്ടെത്തി മെഡിക്കല്‍ കോളേജ് പൊലീസില്‍ ഏല്‍പ്പിക്കുകയായിരുന്നെന്ന് ആറ്റിങ്ങല്‍ എസ്.ഐ പറഞ്ഞു.

ആര്‍ക്കെതിരെയും പരാതിയില്ലെന്ന് ആത്മഹത്യക്ക് ശ്രമിച്ച വിദ്യാര്‍ഥിനി പറഞ്ഞു. ആത്മഹത്യക്ക് ശ്രമിച്ചത് മാനസിക സമ്മര്‍ദം മൂലമെന്ന് പെണ്‍കുട്ടി മൊഴി നല്‍കി. സമരം കാരണം തുടര്‍ച്ചയായി ക്ലാസുകള്‍ മുടങ്ങിയത് സമ്മര്‍ദത്തിലാക്കിയെന്ന് വിദ്യാര്‍ത്ഥിനി വിശദമാക്കി. കോളേജില്‍ പഠനം നല്ല രീതിയില്‍ കൊണ്ട് പോവാന്‍ സാധിച്ചില്ല, പഠനത്തെക്കാള്‍ കൂടുതല്‍ മറ്റ് പരിപാടികളാണ് നടക്കുന്നത്.

അധ്യയന ദിവസങ്ങള്‍ നഷ്ടമായി കൊണ്ടിരുന്നു, ഈ മനോവിഷമമാണ് ആത്മഹത്യയ്ക്ക് പ്രേരിപ്പിച്ചത്. കോടതിയില്‍ ഹാജരാക്കിയ പെണ്‍കുട്ടിയെ ബന്ധുക്കള്‍ക്കൊപ്പം വിട്ടു . അതേസമയം സംഭവത്തില്‍ മനുഷ്യാവകാശ കമ്മിഷന്‍ സ്വമേധയാ കേസെടുത്തു. കരഞ്ഞുപറഞ്ഞിട്ടും പോലും ക്ലാസിലിരുത്താതെ എസ്എഫ്‌ഐ സെക്രട്ടറിയേറ്റ് മാര്‍ച്ചിന് കൊണ്ടുപോയിയെന്ന് തിരുവനന്തപുരം യൂണിവേഴ്‌സിറ്റി കോളേജില്‍ ആത്മഹത്യയ്ക്ക് ശ്രമിച്ച വിദ്യാര്‍ത്ഥിനിയുടെ കുറിപ്പ് വിശദമാക്കിയിരുന്നു.

പരീക്ഷയുടെ തലേ ദിവസം നേരെത്തെ വീട്ടില്‍ പോകാനിറങ്ങിയപ്പോള്‍ തടഞ്ഞു നിര്‍ത്തി ചീത്ത വിളിച്ചുവെന്നും എസ് എഫ് ഐ പ്രവര്‍ത്തകര്‍ ശരീരത്തില്‍ പിടിച്ചു തടഞ്ഞു നിര്‍ത്തിയെന്ന് പെണ്‍കുട്ടി ആത്മഹത്യാ കുറിപ്പില്‍ ആരോപിച്ചിരുന്നു. ആത്മഹത്യ പ്രേരണക്കു കാരണക്കാര്‍ യൂണിവേഴ്‌സിറ്റി കോളജ് പ്രിന്‍സിപ്പലും എസ്എഫ്‌ഐ യൂണിറ്റ് ഭാരവാഹികളുമെന്നും പെണ്‍കുട്ടി കുറിപ്പില്‍ ആരോപിച്ചിരുന്നു. എന്നാല്‍ ഇത് തെറ്റെന്നാണ് പ്രിന്‍സിപ്പലും നേതാക്കളും പറഞ്ഞത്. അതേ സമയം തന്നെ ഈ കുട്ടിസഖാക്കളെ പേടിച്ച് പലരും കോളേജ് തന്നെ മാറിപ്പോയ അവസ്ഥയും ഉണ്ടായിട്ടുണ്ട്.