'എക്‌സപയേര്‍ഡ് പിഎം' എന്ന മമത ബാനര്‍ജിയുടെ വിവാദ പരാമര്‍ശത്തിന് മറുപടിയുമായി ബിജെപി ദേശീയ അധ്യക്ഷന്‍ അമിത് ഷാ രംഗത്തെത്തിയിരിക്കുകയാണ്. അടുത്ത അഞ്ചുവര്‍ഷത്തേക്കു കൂടി നരേന്ദ്ര മോദി പ്രധാനമന്ത്രിയാകുന്നത് കാണാന്‍ തയ്യാറായിക്കോളൂവെന്ന് അമിത് ഷാ, മമത ബാനര്‍ജിയോടായി പറഞ്ഞു.

ഫോനി ചുഴലിക്കാറ്റിന്റെ സ്ഥിതിഗതികള്‍ അന്വേഷിച്ച്‌ താന്‍ ബംഗാള്‍ മുഖ്യമന്ത്രിയെ ഫോണില്‍ വിളിച്ചിട്ട് എടുത്തില്ലെന്ന് മോദി വ്യക്തമാക്കിയിരുന്നു. കാലാവധി കഴിഞ്ഞ പ്രധാനമന്ത്രിയാണ് മോദി എന്നായിരുന്നു മമതയുടെ പരിഹാസം.

'അടുത്തിടെയായി മമത ബാനര്‍ജി പറഞ്ഞു നേരേന്ദ്രമോദിയെ രാജ്യത്തിന്റെ പ്രധാനമന്ത്രിയായി താന്‍ പരിഗണിച്ചിട്ടില്ലെന്ന്. പറയൂ, മമതാ ജി, നിങ്ങള്‍ക്ക് രാജ്യത്തിന്റെ ഭരണഘടനയില്‍ വിശ്വാസം ഉണ്ടോ ഇല്ലയോ? ജനങ്ങള്‍ തെരഞ്ഞെടുക്കുന്നവരാണ് പ്രധാനമന്ത്രിയാകുന്നതെന്നാണ് ഭരണഘടനയില്‍ പറയുന്നത്. നിങ്ങള്‍ അത് അംഗീകരിക്കുമോ ഇല്ലയോ എന്നത് വിഷയമല്ല'- പശ്ചിമബംഗാളിലെ ഘട്ടാല്‍ മണ്ഡലത്തില്‍ തെരഞ്ഞെടുപ്പ് റാലിയെ അഭിസംബോധന ചെയ്ത് അമിത് ഷാ പറഞ്ഞു.

നരേന്ദ്ര മോദി അടുത്ത അഞ്ചുവര്‍ഷവും രാജ്യത്തിന്റെ പ്രധാനമന്ത്രിയാകുന്നത് കാണാന്‍ തയ്യാറായിരുന്നോളൂവെന്നും അമിത് ഷാ കൂട്ടിച്ചേര്‍ത്തു. കഴിഞ്ഞ ദിവസമാണ് നരേന്ദ്ര മോദിയെ രാജ്യത്തിന്റെ പ്രധാനമന്ത്രിയായി താന്‍ പരിഗണിക്കാതിരുന്നതുകൊണ്ടാണ് ഫോനിയെക്കുറിച്ച്‌ ചര്‍ച്ച ചെയ്യാന്‍ തയ്യാറാകാതിരുന്നത് മമത ബാനര്‍ജി പറഞ്ഞത്. രാജ്യത്ത് പുതിയ പ്രധാനമന്ത്രി വരുമ്ബോള്‍ അവരുമായി താന്‍ ചര്‍ച്ച നടത്തുമെന്നും മമത പറഞ്ഞിരുന്നു. മമത ബാനര്‍ജി ചുഴലിക്കാറ്റിന്റെ പേരില്‍ രാഷ്ട്രീയം കളിക്കുന്നു എന്ന് മോദി ആരോപിച്ചതിന് പിന്നാലെയായിരുന്നു മമതയുടെ മറുപടി.

'മോദിയെ ഞാന്‍ രാജ്യത്തിന്റെ പ്രധാനമന്ത്രിയായി പരിഗണിക്കുന്നില്ല. അതിനാലാണ് ഞാന്‍ ചര്‍ച്ചയ്ക്ക് ഇരിക്കാതിരുന്നത്. അയാളുമായി ഒരേ വേദി പങ്കു വെക്കാന്‍ ഞാന്‍ ഇഷ്ടപ്പെടുന്നില്ല. ഞാന്‍ അടുത്ത പ്രധാനമന്ത്രിയുമായി സംസാരിച്ചോളാം. ചുഴലിക്കാറ്റ് ഉണ്ടാക്കിയ നാശങ്ങള്‍ പരിഹരിക്കാന്‍ ഞങ്ങള്‍ക്ക് കഴിയും. തെരഞ്ഞെടുപ്പിന് മുന്നോടിയായി കേന്ദ്രത്തിന്റെ സഹായം ഞങ്ങള്‍ക്ക് വേണ്ട'- എന്നായിരുന്നു മമത പറഞ്ഞത്.