എന്താ ഞാന് ചെയ്ത തെറ്റ്? എസ്.എന്.ഡി.പി യോഗം വാര്ഷിക പൊതുയോഗത്തില് കത്തിക്കയറി വെള്ളാപ്പള്ളി നടേശന്; ആര്. ശങ്കറിനെ തകര്ത്ത പ്രേതങ്ങള് ഇപ്പോഴും വിളയാടുന്നു; സ്ഥാനാര്ത്ഥികളെ നിര്ണയിച്ചതില് സവര്ണ മേധാവിത്വം
എസ്.എന്.ഡി.പി യോഗം വാര്ഷിക പൊതുയോഗത്തില് ഉള്ളിലുള്ള കാര്യങ്ങള് വെട്ടിത്തുറന്ന് പറഞ്ഞ് യോഗം ജനറല് സെക്രട്ടറി വെള്ളാപ്പള്ളി നടേശന്. ആര്. ശങ്കറിനെ തകര്ത്ത പ്രേതങ്ങള് യോഗത്തെയും ട്രസ്റ്റിനെയും ഇപ്പോഴും വേട്ടയാടുന്നതായി വെള്ളാപ്പള്ളി പറഞ്ഞു. ചേര്ത്തല എസ്.എന് കോളേജില് യോഗത്തിന്റെ 113ാമത് വാര്ഷിക പൊതുയോഗത്തില് സ്വാഗതം പറയുകയായിരുന്നു അദ്ദേഹം.
ആര്. ശങ്കറിനെ തകര്ത്തതിലൂടെ എന്തു നേടി? ഒന്നും നേടിയില്ല. തൊടുപുഴക്കാരനായ വക്കീലിന്റെ ഡ്യൂപ്പാണ് യോഗത്തിനെതിരെ ഇപ്പോള് കേസുമായി നില്ക്കുന്നത്. പഴയ പ്രേതങ്ങള് പുതിയ രൂപത്തില്
ഇപ്പോഴും വിളയാടുന്നു. യോഗത്തില് റിസീവറെ വയ്ക്കണമെന്നാണ് അവര് പറയുന്നത്. സോളിസിറ്റര് ജനറലായിരുന്നയാള്ക്കാണ് യോഗം വക്കാലത്ത് നല്കിയിരിക്കുന്നത്. മോഹഭംഗം വന്ന ചില നേതാക്കള് ഒത്തുകൂടി അനാവശ്യമായ കേസുകള് നല്കി യോഗത്തിന്റെ ഓജസും തേജസും തകര്ക്കാനാണ് ശ്രമിക്കുന്നത്. ഇതിലൂടെ എസ്.എന്.ഡി.പി യോഗത്തിന്റെ കൂട്ടായ്മ തകര്ക്കുന്നു. ഈഴവ സമുദായ നേതാക്കള്ക്കെതിരെ കോലം കത്തിക്കലും ധര്ണയും നടക്കുന്നതുപോലെ മറ്റ് സമുദായങ്ങളില് നടക്കുന്നുണ്ടോ? നമ്മുടെ സംഘടനാ ശക്തി തകര്ക്കുകയാണ് ലക്ഷ്യം.
സ്ഥാനാര്ത്ഥികളെ നിര്ണയിച്ചതില് സവര്ണ മേധാവിത്വം ഉണ്ടെന്നും വെള്ളാപ്പള്ളി പറഞ്ഞു. എല്ലാവരാലും കബളിപ്പിക്കപ്പെട്ട സമുദായമായി ഈഴവ സമുദായം മാറി. മൂന്ന് മുന്നണികളും സ്ഥാനാര്ത്ഥിയെ നിര്ണയിച്ചതില് നടത്തിയത് സവര്ണ മേധാവിത്വമാണെന്ന് പറഞ്ഞാല് നിഷേധിക്കാനാകുമോ? ലോക് സഭാ തിരഞ്ഞെടുപ്പില് പത്തനംതിട്ടയിലും വയനാട്ടിലും താത്പര്യമില്ലെന്ന് എന്.എസ്.എസ് പറഞ്ഞപ്പോള് ആരെങ്കിലും എതിര്ത്ത് മിണ്ടിയോ? സമത്വ മുന്നേറ്റ യാത്ര നടത്തിയപ്പോള് എന്നെ ജയിലിലടയ്ക്കാന് ശ്രമിച്ചു. ആഭ്യന്തര മന്ത്രിയായിരുന്ന രമേശ് ചെന്നിത്തല എനിക്കെതിരെ കേസെടുക്കാന് ഉത്തരവിട്ടു. ചെന്നിത്തലയ്ക്ക് എങ്ങനെ ആഭ്യന്തര മന്ത്രി സ്ഥാനം കിട്ടി? ചങ്ങനാശേരിയില് നിന്ന് കല്പ്പിച്ചതനുസരിച്ച് ഉമ്മന്ചാണ്ടി ചെന്നിത്തലയ്ക്ക് ആ പദവി നല്കി.
ശബരിമല പ്രശ്നം വന്നപ്പോള് എന്നെ കുരിശിലേറ്റി. ഞാന് ഒരുപാട് വേദനിച്ചു. ശബരിമല പ്രശ്നത്തില് തെരുവിലിറങ്ങരുതെന്ന് താന് പറഞ്ഞത് പുന്നപ്ര വയലാര് സമരം മുന്നിലുള്ളതുകൊണ്ടായിരുന്നു. ആ സമരത്തില് മരിച്ചവരില് 90 ശതമാനവും ഈഴവരായിരുന്നു. ശബരിമല പ്രശ്നത്തില് ജയിലിലായ സുരേന്ദ്രന് പുറത്തിറങ്ങാന് എത്ര നാളെടുത്തു? മറ്റുള്ളവര് എത്ര പെട്ടെന്നാണ് ജാമ്യം കിട്ടി പുറത്തിറങ്ങിയത്. എനിക്കെതിരെ എന്തെല്ലാം വിമര്ശനമാണ് സോഷ്യല് മീഡിയയില് വന്നത്. എന്താണ് ഞാന് ചെയ്ത തെറ്റ്? എസ്.എന്.ഡി.പി യാേഗവും ബോര്ഡും കൗണ്സിലും ചര്ച്ച ചെയ്ത തീരുമാനങ്ങളാണ് ഞാന് പറഞ്ഞത്. അല്ലാതെ വെള്ളാപ്പള്ളി നടേശന്റെ അഭിപ്രായമല്ലെന്നും വെള്ളാപ്പള്ളി പറഞ്ഞു.
സാമുദായിക സംവരണം ഇല്ലാതാക്കാനുള്ള നീക്കത്തില് നിന്ന് കേന്ദ്ര, സംസ്ഥാന സര്ക്കാരുകള് പിന്തിരിയണമെന്നും എയ്ഡഡ് മേഖലയിലടക്കം സാമുദായിക സംവരണം വ്യാപിപ്പിക്കണമെന്നും എസ്.എന്.ഡി.പി യോഗം വാര്ഷിക പൊതുയോഗം പ്രമേയത്തില് ആവശ്യപ്പെട്ടു.
സംവരണം ഇല്ലാതാക്കുന്ന തരത്തില് സാമ്ബത്തിക സംവരണം നടപ്പാക്കാനുള്ള കേന്ദ്ര, സംസ്ഥാന സര്ക്കാരുകളുടെ നീക്കത്തില് യോഗം ഉത്കണ്ഠയും പ്രതിഷേധവും രേഖപ്പെടുത്തി. പതിറ്റാണ്ടുകളായി സാമുദായിക സംവരണം നടപ്പാക്കിയിട്ടും വിദ്യാഭ്യാസ, തൊഴില്, ഭരണ രംഗങ്ങളില് പിന്നാക്ക പ്രാതിനിധ്യം ജനസംഖ്യാനുപാതികമായി കൈവരിക്കാന് ഇപ്പോഴും സാധിച്ചിട്ടില്ലെന്നിരിക്കെ സാമുദായിക സംവരണത്തെ ഇല്ലാതാക്കുന്ന നീക്കങ്ങളില് നിന്നു സര്ക്കാര് പിന്തിരിയണം. ദേവസ്വം ബോര്ഡുകളുടെ കീഴിലുള്ള ശബരിമല അടക്കമുള്ള പ്രമുഖ ക്ഷേത്രങ്ങളിലെ മേല്ശാന്തി നിയമനത്തിന് പൂജാവിധികള് പഠിച്ച എല്ലാ ഹൈന്ദവര്ക്കും സാമുദായിക വ്യത്യാസമില്ലാതെ അര്ഹതയുണ്ടായിരിക്കണമെന്ന ചട്ടം നടപ്പാക്കാന് സര്ക്കാര് അടിയന്തര നടപടി സ്വീകരിക്കണമെന്നും യോഗം അഭിപ്രായപ്പെട്ടു.
https://www.facebook.com/Malayalivartha
