ആനകളെ ഇല്ലാതാക്കി ആചാരങ്ങളെ തകര്‍ക്കാനുള്ള ശ്രമമാണ് തെച്ചിക്കോട്ടുക്കാവ് രാമചന്ദ്രന്റെ വിലക്കിന് പിന്നിലെന്ന് പി.സി. ജോര്‍ജ് എംഎല്‍എ. തെച്ചിക്കോട്ടുക്കാവ് രാമചന്ദ്രന്റെ വിലക്കിന് പിന്നില്‍ കൃത്യമായ അജണ്ടയുണ്ടെന്നും ജോര്‍ജ് പറഞ്ഞു. തൃശൂര്‍ പൂരത്തിന് തെച്ചിക്കോട്ടുക്കാവ് രാമചന്ദ്രനെ വിലക്കിയ ഉത്തരവിനെതിരെ ആര്‍എസ്എസ് സംഘടിപ്പിച്ച പ്രതിഷേധ സമരം ഉദ്ഘാടനം ചെയ്ത് സംസാരിക്കുകയായിരുന്നു പി.സി. ജോര്‍ജ്.

തൃശൂര്‍ പൂരത്തിന്റെ പ്രശ്‌നങ്ങള്‍ നിയമസഭയില്‍ അവതരിപ്പിക്കുമെന്നും നൈഷ്ഠിക ബ്രഹ്മചാരിയെ അപമാനിച്ചതിലുള്ള ഫലം ഇടതുമുന്നണി തിരഞ്ഞെടുപ്പില്‍ അനുഭവിക്കുമെന്നും പി.സി. ജോര്‍ജ് പറഞ്ഞു. തിരുവനന്തപുരത്തും പത്തനംതിട്ടയിലും ബിജെപി വിജയിച്ചുകഴിഞ്ഞു. തൃശ്ശൂരില്‍ അട്ടിമറി വിജയം പ്രതീക്ഷിക്കാം. തിരഞ്ഞെടുപ്പ് ഫലം വരുമ്‌ബോള്‍ പിണറായി വിജയന്‍ ധാര്‍മികത മുന്‍നിര്‍ത്തി മുഖ്യമന്ത്രിപദം രാജിവെക്കേണ്ടി വരുമെന്നും ജോര്‍ജ് കൂട്ടിച്ചേര്‍ത്തു.

അതേസമയം തെച്ചിക്കോട്ടുകാവ് രാമചന്ദ്രന്റെ വിലക്ക് തുടരുന്ന സാഹചര്യത്തതില്‍ ആന ഉടമകള്‍ ഇന്ന് തൃശൂരില്‍ യോഗം ചേരും. തെച്ചിക്കോട്ടുകാവ് രാമചന്ദ്രനെ ലഭിച്ചില്ലെങ്കില്‍ പകരം മറ്റൊരു ആനയെ ആ സ്ഥാനത്ത് കൊണ്ടുവരാനുള്ള തീരുമാനവും ഉണ്ടാകും. പൂരത്തോട് അനുബന്ധിച്ചുള്ള മറ്റുകാര്യങ്ങളും യോഗത്തില്‍ ചര്‍ച്ചയാകും.

തെച്ചിക്കോട്ടുകാവ് രാമചന്ദ്രനെ പൂരമടക്കമുള്ള ഉത്സവങ്ങള്‍ക്ക് എഴുന്നള്ളിക്കാന്‍ അനുവദിക്കില്ലെന്നു മന്ത്രി കെ.രാജു സോഷ്യല്‍ മീഡിയയിലൂടെ അറിയിച്ചിരുന്നു. ഇതോടെ ആന ഉടമകളും സര്‍ക്കാരും തമ്മിലുള്ള തര്‍ക്കം രൂക്ഷമായി. തൃശൂര്‍ പൂരം നടത്തിപ്പിനെത്തന്നെ ഇതു ബാധിച്ചേക്കും.
തെച്ചിക്കോട്ടുകാവു ദേവസ്വം ആനയെ പീഡിപ്പിക്കുകയാണെന്നും ജീവനു വില കല്‍പിക്കാത്തവരാണെന്ന ആരോപണവും മന്ത്രിയുടെ പോസ്റ്റിലുണ്ട്. ആനയെ എഴുന്നള്ളിക്കാന്‍ അനുവദിക്കണമെന്ന ഹര്‍ജി 11നു ഹൈക്കോടതി പരിഗണിക്കുന്നുണ്ട്.

ഈ ആനയെ എഴുന്നള്ളിക്കാന്‍ അനുവദിച്ചില്ലെങ്കില്‍ ഇനിയുള്ള ഉത്സവങ്ങള്‍ക്ക് ആനകളെ നല്‍കില്ലെന്ന് ആന ഉടമസ്ഥ സംഘം മുന്നറിയിപ്പു നല്‍കിയിരുന്നു. ഗുരുവായൂരില്‍വച്ചു പിറകില്‍ പടക്കം പൊട്ടിച്ചപ്പോള്‍ വിരണ്ടോയിയ തെച്ചിക്കോട്ടുകാവു രാമചന്ദ്രന്‍ 2 പേരുടെ മരണത്തിനിടയാക്കിയിരുന്നു. 

അതേസമയം തെച്ചിക്കോട്ട് രാമചന്ദ്രന്‍ ആനയുടെ വിലക്ക് നീക്കില്ലെന്ന നിലപാടിലുറച്ച് തൃശൂര്‍ കളക്ടര്‍ ടിവി അനുപമയും രംഗത്തെത്തി. അപകടകരമായ സാഹചര്യം ഒഴിവാക്കിയെ തീരുവെന്നും തീരുമാനം പുനഃപരിശോധിക്കേണ്ട കാര്യമില്ലെന്നും അനുപമ വ്യക്തമാക്കി. ആന അക്രമാസക്തനാണെന്നും അതിനാല്‍ എഴുന്നള്ളിപ്പിന് കൊണ്ടുവരുന്നത് ശരിയല്ലെന്നും കളക്ടര്‍ പറഞ്ഞു.

2007 മുതല്‍ ഇതു വരെ ഏഴ് പേരെ തെച്ചിക്കോട്ട്കാവ് രാമചന്ദ്രന്‍ കുത്തിക്കൊന്നിട്ടുണ്ട്. രണ്ട് ആനകളെയും കുത്തിക്കൊന്നിട്ടുണ്ട്.

അതുകൊണ്ട് ഉത്സവപറമ്പില്‍ ആനയെ എഴുന്നെള്ളിക്കുമ്പോഴുള്ള അപകടകരമായ സാഹചര്യം ഒഴിവാക്കിയെ തീരുവെന്നും കളക്ടര്‍ വ്യക്തമാക്കി.

തെച്ചിക്കോട്ട് രാമചന്ദ്രനെ ഉത്സവത്തിന് എഴുന്നള്ളിക്കണമെന്ന ആവശ്യം അംഗീകരിക്കാന്‍ കഴിയുന്നതല്ലെന്നും അപകടകാരികളായ ആനകളെ ജനങ്ങളുടെ ഇടയിലേക്ക് എഴുന്നള്ളിച്ചു കൊണ്ടു വരുന്നത് സൃഷ്ടിക്കാവുന്ന ദുരന്തം പറഞ്ഞറിയിക്കാന്‍ കഴിയാത്തതാണെന്നും നേരത്തെ വനംമന്ത്രി കെ. രാജു വ്യക്തമാക്കിയിരുന്നു.