അത്രമേല് സ്നേഹിച്ചിരുന്നു... വീട്ടിലെ ഒരംഗത്തെ പോലും ഇത്രയും സ്നേഹിച്ചിട്ടില്ല; ഇത്രയും സ്നേഹം നല്കി പെട്ടെന്ന് പോയ് മറയുമെന്ന് വിചാരിച്ചില്ല
തൃശൂരില് തെച്ചിക്കോട്ടുകാവ് രാമചന്ദ്രന് വേണ്ടി ആന പ്രേമികള് വാദിക്കുമ്പോള് അങ്ങ് പാലക്കാട് മണ്മറഞ്ഞ ആനയെയോര്ത്ത് അലമുറയിടുകയാണ്. അത്രമേല് ആനകളെ സ്നേഹിക്കുന്ന ഒരുകൂട്ടര് ഉണ്ട്. കഴിഞ്ഞ ദിവസം സോഷ്യല് മീഡിയയില് ഒരു പാപ്പാന്റെ കരച്ചില് വൈറലായി മാറിയിരുന്നു. താന് ജീവനു തുല്യം സ്നേഹിച്ച ഒരു ആനയ്ക്കായി നെഞ്ചുപൊട്ടി നിലവിളിക്കുന്ന ഒരു കാഴ്ച എല്ലാവരേയും വേദനിപ്പിച്ചു. അത്രയ്ക്കും വികാരനിര്ഭരമായിരുന്നു ആ കരച്ചില്.
കുഞ്ഞന് എന്ന് ആരാധകരും പ്രിയപ്പെട്ടവരും സ്നേഹത്തോടെ വിളിക്കുന്ന ചെര്പുളശേരി പാര്ത്ഥന് എന്ന കൊമ്ബന്റെ അന്ത്യയാത്രയിലെ നിമിഷങ്ങളായിരുന്നു അത്. ചടങ്ങുകള് പൂര്ത്തിയാക്കി ജനം അവനു യാത്രനല്കുമ്ബോഴാണു പാപ്പാന് അവന്റെ മുഖത്തു കെട്ടിപ്പിടിച്ചു കരഞ്ഞത്. ആനയോളം തന്നെ സ്നേഹം തിരിച്ചും കൊടുത്തു പ്രിയ കുഞ്ഞന്റെ വേര്പാടു തളര്ത്തിയ ആനപ്രേമികളെ ഈ കരച്ചിലും ഉള്ളുലയ്ക്കുകയാണ്.
തൃശൂര് പൂരത്തിനു കൊടിയേറിയ ദിനത്തില് തന്നെയാണ് ആനപ്രേമികളെ സങ്കടത്തിലാക്കി ചെര്പുളശേരി പാര്ത്ഥന് ചരിഞ്ഞത്. കേരളത്തില് ഏറെ ആരാധകരുള്ള കൊമ്ബനായിരുന്നു 44 വയസുള്ള പാര്ത്ഥന്. തൃശൂര് പൂരത്തിനു കണിമംഗലം ശാസ്താവിന്റെ തിടമ്ബേറ്റാറുള്ളത് പാര്ത്ഥന് ആയിരുന്നു.
അസുഖത്തെ തുടര്ന്ന് ഏറെ നാളായി ചികിത്സയിലായിരുന്നു. ചെര്പുളശേരി എസ്കെ തറവാട്ടിലെ ആനയാണ് പാര്ത്ഥന്. പൂരങ്ങള്ക്കു പാര്ത്ഥന്റെ വരവ് ആരാധകര് ആവേശമാക്കാറുണ്ട്. പാലക്കാടിന്റെ പാര്ത്ഥന്, കുഞ്ഞന്, ഇളമുറ തമ്ബുരാന് എന്നൊക്കെയാണ് ആരാധകര് സൈബര് ഇടങ്ങളില് ആനയെ വിശേഷിപ്പിക്കാറുള്ളത്.
അസാധ്യ തലയെടുപ്പും, അഴകും, നല്ല സ്വഭാവശുദ്ധിയും നിമിത്തം നിരവധിയാളുകളുടെ ഇഷ്ടതോഴനാണ് പാര്ത്ഥന്. മൂന്നര മാസത്തോളം നീണ്ടു നില്കുന്നതാണ് നീരുകാലം. നല്ല ഉയരം, ഉയരത്തെ വെല്ലുന്ന തലയെടുപ്പ്, നല്ല സ്വാഭാവം, പ്രായത്തിന്റെ ആനുകൂല്യം ഇവയെല്ലാം പാര്ത്ഥന്റെ മേന്മകളാണ്. എങ്കിലും നടനീരിന്റെ പ്രശ്നം ആനയെ കാര്യമായി തളര്ത്തി. ഇതാണ് ആനയുടെ ജീവനെടുത്തത്.
പാര്ത്ഥനെപ്പറ്റി പറയാന് ആന പ്രേമികള്ക്ക് നൂറ് നാവാണ്. പൂമുള്ളി തറവാട്ടിലെ പാര്ത്ഥനില് ചെര്പ്പുളശ്ശേരിയിലെ ശബരി ഗ്രൂപ്പുകാര് ആകൃഷ്ടരായി. ഇരുപത് ലക്ഷം രൂപയ്ക്കു കച്ചവടം. അന്നത്തെ കാലത്ത് രണ്ടോ മൂന്നോ ഒത്ത ആനയെ വാങ്ങിക്കാന് ആ പണം തന്നെ ധാരാളം.
പൂമുള്ളിത്തറവാട്ടില് നിന്നും അങ്ങനെ പാര്ത്ഥന്, ചെര്പ്പുളശ്ശേരി പാര്ത്ഥനായി. നിറഞ്ഞ ആനത്തറവാട്ടിലെ ഇളമുറത്തമ്പുരാന്റെ ഉദയം. അവന് വളരാന് തുടങ്ങി, ഒപ്പം അഴകും തലയെടുപ്പും വര്ദ്ധിച്ചു. കുളി കഴിഞ്ഞാല് പത്തു മിനിറ്റ് തലയെടുപ്പ് പരിശീശലനം. കണിശമായ ആ പരിശീലന രീതികള് പിന്നീട് പാര്ത്ഥന്റെ തലയെടുപ്പിന്റെ പ്രൗഢിയായി പ്രതിഫലിച്ചു.
രാജശേഖരനും അനന്തപദ്മനാഭനും അടക്കി വാഴുന്ന ചെര്പ്പുളശ്ശേരി തറവാട്ടിലെ ഏറ്റവും താരമൂല്യമുള്ള ആന എന്ന വിശേഷണം വൈകാതെ പാര്ത്ഥന് സ്വന്തമാക്കി. ഇളമുറത്തമ്പുരാനില് നിന്നും ഉലകനായകചക്രവര്ത്തിയായി മാറിയ വീരപരിവേഷം. ആനപ്പണിയിലെ നിരവധി അഗ്രഗണ്യര് വഴി നടത്തിയ ആനയാണ് പാര്ത്ഥന്. കിടന്ന കിടപ്പില് നിന്നും പെട്ടന്ന് ചാടിയെഴുനേല്ക്കുന്ന ഒരു സ്വഭാവമുണ്ടായിരുന്നു മുന്പ്. ചിട്ടയായ ശിക്ഷണത്തിലൂടെയും മേല്നോട്ടത്തിലൂടെയും അതിനും കുറവ് സംഭവിച്ചു. സ്വാഭാവശുദ്ധിയുടെ കാര്യത്തില് മുന്പന്തിയില് നില്ക്കുന്ന ആനയാണ് പാര്ത്ഥന്. കൂട്ടാനക്കൂത്തേറ്റിട്ടും കൈവിട്ടുപോകാതെ നിന്ന പ്രകൃതം. ചട്ടക്കാരോട് അങ്ങേയറ്റം വിധേയത്വം പ്രകടമാക്കുന്ന സ്വഭാവം.
പൂരങ്ങളുടെ പൂരമായ തൃശൂര് പൂരത്തില് പൂരനായകന് തിരുവമ്പാടി ശിവസുന്ദറിന്റെ ഇടത്തെ കൂട്ടിന് അര്ഹത നേടിയ പാര്ത്ഥന്, പിന്നീട് ആനകേരളത്തിലെ അതികായന് സാക്ഷാല് കണ്ടമ്പുള്ളി ബാലനാരായണന്റെ പിന്ഗാമിയായി കണിമംഗലം ശാസ്താവിനെ ശിരസ്സിലേറ്റിയും പൂരങ്ങളുടെ പൂരത്തിന് എഴുന്നെള്ളി.
മത്സരപ്പൂരങ്ങളില് വെന്നിക്കൊടി പാറിച്ച പാരമ്പര്യമുണ്ട് പാര്ത്ഥന്. സാക്ഷാല് അര്ജുനന് എന്ന പേരിനെ അന്വര്ത്ഥമാക്കുന്ന പോരാട്ടവീര്യം. ഒരിക്കല് എത്തനൂര് കുമ്മാട്ടിയില് മംഗലാംകുന്ന് കര്ണ്ണന്റെ പകരക്കാരനായെത്തി തെച്ചിക്കോട്ടുകാവ് രാമചന്ദ്രനോടൊപ്പം തലയെടുപ്പോടെ നിന്ന വീരനായകനാണ് പാര്ത്ഥന്. പിന്നീടൊരിക്കല് മാങ്ങോട്ടുകാവില് തെച്ചിക്കോട്ടുകാവ് രാമചന്ദ്രനും മംഗലാംകുന്ന് കര്ണ്ണനുമെല്ലാം ഉള്ളപ്പോള് തന്നെ പ്രധാന തിടമ്പേറ്റി ഉത്സവം നയിച്ച ഖ്യാതിയും പാര്ത്ഥനുണ്ട്.
https://www.facebook.com/Malayalivartha
