തൃശൂര്‍ പൂരത്തിന് തെച്ചിക്കോട്ട്കാവ് രാമചന്ദ്രന് വിലക്കേര്‍പ്പെടുത്തിയ കളക്ടറുടെ നടപടിയല്‍ പ്രതിഷേധിച്ച് മേയ് 11 മുതല്‍ ഒരു പരിപാടികള്‍ക്കും ഉത്സവങ്ങള്‍ക്കും ആനകളെ നല്‍കില്ലെന്ന ആന ഉടമകളുടെ പിടിവാശിക്ക് ഗുരുവായൂര്‍ ദേവസ്വം ബോര്‍ഡിന്റെ കനത്ത തിരിച്ചടി. പൂരത്തിന് ദേവസ്വത്തിന്റെ കീഴിലുള്ള എല്ലാ ആനകളെയും നല്‍കുമെന്ന് ഗുരുവായൂര്‍ ദേവസ്വം അധികൃതര്‍ വ്യക്തമാക്കി. ഇതോടെ ആന ഉടമകള്‍ വെട്ടിലായി. തിരുവിതാംകൂര്‍, മലബാര്‍ ദേവസ്വങ്ങളുടെ കീഴിലുള്ള ആനകളെയും കൂടി വിട്ടുനല്‍കിയാല്‍ പൂരം കെങ്കേമമാകുമെന്ന ആത്മവിശ്വാസത്തിലാണ് തിരുവമ്പാടി, പാറമേക്കാവ് ദേവസ്വങ്ങള്‍. 

അതേസമയം ആന ഉടമകള്‍ തീരുമാനം പുനപ്പരിശോധിക്കണമെന്ന് മന്ത്രി വി എസ് സുനില്‍കുമാര്‍ ആവശ്യപ്പെട്ടു. വിലക്കും പൂരവുമായി ബന്ധമില്ലെന്നും മന്ത്രി പറഞ്ഞു. പാറമേക്കാവ് , തിരുവമ്പാടി ദേവസ്വം അധികൃതരോട് ആന ഉടമകളുമായി ചര്‍ച്ച നടത്താന്‍ പറഞ്ഞിട്ടുണ്ടെന്നും മന്ത്രി പറഞ്ഞു. ആവശ്യമെങ്കില്‍ താനും ചര്‍ച്ച നടത്തുമെന്നും മന്ത്രി പറഞ്ഞു. ആരോഗ്യപരമായ പ്രശ്‌നങ്ങളുള്ളതിനാല്‍ തെച്ചിക്കോട്ട്കാവ് രാമചന്ദ്രനെ പങ്കെടുപ്പിക്കാന്‍ പറ്റില്ലെന്നാണ് കളക്ടര്‍ തീരുമാനിച്ചത്. എന്നാല്‍ മന്ത്രിതല യോഗം ഇത് പുനപ്പരിശോധിക്കാന്‍ തീരുമാനിച്ചെങ്കിലും സര്‍ക്കാര്‍ അട്ടിമറിച്ചെന്നാണ് ആന ഉടമകളുടെ ആരോപണം. ആനകളെ പീഡിപ്പിച്ച് ഉടമകള്‍ കോടികള്‍ ഉണ്ടാക്കുന്നുവെന്ന വനം മന്ത്രിയുടെ ഫെയിസ്ബുക്ക് പോസ്റ്റ് പ്രതിഷേധാര്‍ഹമാണെന്നും അവര്‍ പറയുന്നു. മന്ത്രി കാര്യം അറിയാതെയാണ് വിമര്‍ശനങ്ങള്‍ ഉന്നയിക്കുന്നതെന്നും അവര്‍ പറയുന്നു. 

വനംവകുപ്പ് ഉദ്യോസ്ഥര്‍ വനം മന്ത്രിയെ തെറ്റിദ്ധരിപ്പിച്ചെന്ന് ഉടമകള്‍ ആരോപിച്ചു. സര്‍ക്കാര്‍ അനുകൂല തീരുമാനം എടുക്കുമെന്നാണ് പ്രതീക്ഷിക്കുന്നത്. ആന ഉടമകളെല്ലാം തീരുമാനത്തില്‍ ഉറച്ച് നില്‍ക്കുമെന്നും സംഘടന നേതാക്കള്‍ പറഞ്ഞു. ഉടമകള്‍ക്ക് കാശുണ്ടാക്കാനുള്ള മാര്‍ഗം മാത്രമല്ല ആനയെന്നും തെച്ചിക്കോട്ടുകാവ് രാമചന്ദ്രന്റെ വിലക്ക് പിന്‍വലിക്കും വരെ ബഹിഷ്‌കരണം തുടരുമെന്നും സംഘടന ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചിരുന്നു. അവശതകള്‍ രൂക്ഷമായതിനെ തുടര്‍ന്നാണ് തെച്ചിക്കോട്ടുകാവ് രാമചന്ദ്രനെ ഉത്സവത്തിന് എഴുന്നള്ളിക്കുന്നതില്‍ നിന്നും ഒഴിവാക്കണമെന്ന ചീഫ് വൈല്‍ഡ് ലൈഫ് വാര്‍ഡനാണ് ഉത്തരവിറക്കിയത്. 

അപകടകാരിയും കടുത്ത ആരോഗ്യപ്രശ്‌നങ്ങളുമുള്ള ആനയാണ് തെച്ചിക്കോട്ടുകാവ് രാമചന്ദ്രന്‍. പലതവണ മുന്നറിയിപ്പ് നല്‍കിയിട്ടുള്ളതാണ്. എഴുന്നള്ളിപ്പുകളില്‍ നിന്ന് ഒഴിവാക്കി ആനയ്ക്ക് വിശ്രമം നല്‍കണമെന്ന് നിര്‍ദേശിച്ചിട്ടുള്ളതാണ്. അത് ലംഘിച്ചാണ് ആനയെ ഉപയോഗിച്ചിരുന്നത്. കഴിഞ്ഞ ഫെബ്രുവരിയില്‍ ഗുരുവായൂരിലെ ഗൃഹപ്രവേശ ചടങ്ങിന് എഴുന്നള്ളിച്ച് നിര്‍ത്തിയിരുന്ന രാമചന്ദ്രന്‍ പടക്കം പൊട്ടിയ ശബ്ദം കേട്ട് ഭയന്ന് ഇടഞ്ഞോടി. രണ്ടു പേര്‍ മരിച്ചിരുന്നു. തുടര്‍ന്ന് അഞ്ചംഗ സമിതിയെ സര്‍ക്കാര്‍ അന്വേഷണത്തിനു നിയോഗിച്ചിരുന്നു. അവര്‍ നല്‍കിയ റിപ്പോര്‍ട്ടിനെ തുടര്‍ന്ന് ആനയുടെ പ്രായം, ആരോഗ്യനില, അപകടസ്വഭാവം എന്നിവ ചൂണ്ടിക്കാട്ടി എഴുന്നള്ളിപ്പുകളില്‍ നിന്നും ഒഴിവാക്കണമെന്ന് ആവശ്യപ്പെട്ട് ജില്ല കളക്ടര്‍മാര്‍ക്ക് നിര്‍ദേശം നല്‍കുകയായിരുന്നു.