പാലക്കാട്ട് മാര്‍ബിള്‍ ഇറക്കുന്നതിനിടെ അപകടം: രണ്ടു തൊഴിലാളികള്‍ മരിച്ചു
ലോറിയില്‍ നിന്ന് മാര്‍ബിള്‍ ഇറക്കുന്നതിനിടെ മാര്‍ബിളിനിടയില്‍പ്പെട്ട് തൊഴിലാളികള്‍ മരിച്ചു. ചെറുകുളം സ്വദേശികളായ വിശ്വനാഥന്‍, ശ്രീധരന്‍ എന്നിവരാണ് മരിച്ചത്. കയറ്റിറക്കു തൊഴിലാളികളാണ് ഇരുവരും. പാലക്കാട് കോട്ടായി ചെറുകുളത്തിനു സമീപം ഇന്ന് രാവിലെയാണ് അപകടം നടന്നത്. കണ്ടെയ്‌നര്‍ ലോറിയിലെത്തിച്ച മാര്‍ബിള്‍ പുറത്തേക്ക് ഇറക്കാന്‍ ശ്രമിക്കുന്നതിനിടെയാണ് സംഭവം. മാര്‍ബിളിന് ഇടയില്‍ കുരുങ്ങിയ ഇരുവരും തത്സമയം മരിച്ചു. ക്രെയിന്‍ ഉപയോഗിച്ച് മാര്‍ബിള്‍ പാളികള്‍ നീക്കിയതിനു ശേഷമാണ് മൃതദേഹങ്ങള്‍ പുറത്തെടുത്തത്.
അതേസമയം മറ്റൊരു അപകടം ഒഴിവാക്കിയ വീട്ടമ്മയെ ഫയര്‍ഫോഴ്‌സ് ആദരിച്ചു. വീട്ടിനുള്ളില്‍ ഗ്യാസ് സിലിണ്ടര്‍ ലീക്ക് ചെയ്ത് തീ പിടിച്ചപ്പോള്‍ സിലണ്ടര്‍ പുറത്തേക്കെറിഞ്ഞ് അപകടം ഒഴിവാക്കിയ വീട്ടമ്മയെ തിരുവനന്തപുരം വര്‍ക്കല ഫയര്‍ സ്‌റ്റേഷനില്‍ ആദരിച്ചു. കാപ്പില്‍ കിഴക്കേ വിളാകം വീട്ടില്‍ റുഖിയ ബീവിയെ(70)ആണ് ആദരിച്ചത്. ലീക്കായി തീ പിടിച്ച സിലിണ്ടര്‍ വീടിന് വെളിയിലേക്ക് എറിയുകയും ഫയര്‍ ഫോഴ്‌സ് എത്തുന്ന സമയം വരെ ഹോസ് ഉപയോഗിച്ച് സിലിണ്ടര്‍ തണുപ്പിക്കുകയും ചെയ്ത പ്രവര്‍ത്തി വലിയ ഒരു അപകടം ആണ് ഒഴിവാക്കിയത്.
ചടങ്ങില്‍ വര്‍ക്കല അഗ്‌നി രക്ഷാനിലയം അസിസ്റ്റന്റ് സ്‌റ്റേഷന്‍ ഓഫീസര്‍ പി അനില്‍കുമാര്‍, വിനോദ് കുമാര്‍, മുഗേഷ് കുമാര്‍, റജിമോന്‍ എന്നിവര്‍ പങ്കെടുത്തു. വീട്ടമ്മയുടെ പ്രവര്‍ത്തനം പൊതുജനങ്ങള്‍ക്ക് ആകെ മാതൃകയാണെന്നും ഇത്തരം ചെറിയ മുന്‍ കരുതലുകളിലൂടെ വലിയ അപകടങ്ങള്‍ ഒഴിവാക്കാനാകുമെന്നും ഫയര്‍ഫോഴ്‌സ് അധികൃതര്‍ അറിയിച്ചു.
https://www.facebook.com/Malayalivartha
