കനത്ത പാറ വീഴ്ചയ്ക്കും മണ്ണിടിച്ചിലിനും സാധ്യത .... നെല്ലിയാമ്പതി ചുരം റോഡില് കര്ശന യാത്രാ നിയന്ത്രണങ്ങള് ഏര്പ്പെടുത്തി ജില്ലാ കളക്ടർ
പാലക്കാട് ജില്ലയില് കാലവര്ഷം തുടരുന്ന സാഹചര്യത്തിൽ നെല്ലിയാമ്പതി ചുരം റോഡില് കര്ശന യാത്രാ നിയന്ത്രണങ്ങള് ഏര്പ്പെടുത്തി ജില്ലാ ദുരന്തനിവാരണ അതോറിറ്റി ചെയര്പേഴ്സണ് കൂടിയായ ജില്ലാ കലക്ടര് കെ സുധീര് ഉത്തരവിറക്കി. കനത്ത പാറ വീഴ്ചയ്ക്കും മണ്ണിടിച്ചിലിനും സാധ്യത നിലനില്ക്കുന്നതിനാൽ പൊതുജന സുരക്ഷ മുന്നിര്ത്തിയാണ് നിയന്ത്രണം ഏർപ്പെടുത്തിയത്.
നിലവില് ചുരം റോഡിലെ മണ്ണിടിച്ചില് അവശിഷ്ടങ്ങള് നീക്കം ചെയ്ത് ഗതാഗതം പുനഃസ്ഥാപിച്ചിട്ടുണ്ടെങ്കിലും, വീണ്ടും അപകടമുണ്ടാകാനുള്ള സാധ്യത കണക്കിലെടുത്താണ് പുതിയ ഉത്തരവ്. നെല്ലിയാമ്പതി പ്രദേശവാസികളുടെ അത്യാവശ്യഘട്ടങ്ങളിലെ യാത്രകള് ഒഴികെ, പുറത്തു നിന്നുള്ളവര്ക്ക് ചുരത്തിലൂടെയുള്ള പ്രവേശനം പൂര്ണമായും നിരോധിക്കുകയും ചെയ്തു.
ഇനിയൊരു ഉത്തരവുണ്ടാകുന്നത് വരെ വിനോദസഞ്ചാര ആവശ്യങ്ങള്ക്കായുള്ള എല്ലാവിധ യാത്രകളും, ചുരം വഴിയുള്ള ഭാര വാഹനങ്ങളുടെ ഗതാഗതവും കര്ശനമായി നിരോധിച്ചിട്ടുണ്ട്.
പ്രദേശവാസികളുടെ അത്യാവശ്യ യാത്രകള്ക്കും അടിയന്തര വൈദ്യസഹായ ആവശ്യങ്ങള്ക്കുമുള്ള വാഹനങ്ങള്ക്കൊഴികെ മറ്റെല്ലാ വാഹനങ്ങള്ക്കും വൈകുന്നേരം 6 മുതല് രാവിലെ 6 മണിവരെ രാത്രികാല യാത്രാ നിയന്ത്രണവും ഏര്പ്പെടുത്തി. ഈ നിര്ദ്ദേശങ്ങള് ലംഘിക്കുന്നവര്ക്കെതിരെ ദുരന്തനിവാരണ നിയമപ്രകാരം കര്ശനമായ നിയമ നടപടികള് സ്വീകരിക്കുമെന്നും കലക്ടര്.
"
https://www.facebook.com/Malayalivartha
