പാമ്പുകടിയേറ്റതിനു ശേഷം തുടര്ചികിത്സ നടത്തുകയായിരുന്ന യുവാവിനെ കൊണ്ടുപോകാനെത്തിയ ആംബുലന്സ് പാതി വഴിയില് എത്തി മടങ്ങിയത് വിവാദമാകുന്നു
നാദാപുരം ഗവ. ആശുപത്രിയില് ചികിത്സയ്ക്കെത്തിയ രോഗിയെ കൊണ്ടുപോവാന് എത്തിയ ആംബുലന്സ് പാതി വഴിയില് മടങ്ങിപ്പോയത് വിവാദമാകുന്നു. രക്തസമ്മര്ദ്ദം കുറഞ്ഞതിനെ തുടര്ന്നാണ്, രണ്ടുമാസം മുമ്പ് പാമ്പ് കടിയേറ്റ പരപ്പുപാറ സ്വദേശി നാദാപുരം ഗവ. ആശുപത്രിയില് കഴിഞ്ഞദിവസം ചികിത്സയ്ക്കെത്തിയത്.
അവിടെ എത്തിയപ്പോള് ഉടന് വിദഗ്ധ ചികിത്സ നല്കണമെന്ന് ഡോക്ടര് ആവശ്യപ്പെട്ടതിനെ തുടര്ന്ന് നാദാപുരത്തെ ആംബുലന്സ് ഡ്രൈവര്മാരെ വിളിച്ചെങ്കിലും നാല് ആംബുലന്സുകളും വര്ക്ക് ഷോപ്പിലായിരുന്നു. പിന്നീട് വടകര സഹകരണ ആശുപത്രിക്ക് മുമ്പില് പാര്ക്ക് ചെയ്യുന്ന ആംബുലന്സിനോട് നാദാപുരത്ത് എത്താന് ആവശ്യപ്പെടുകയായിരുന്നു.
പതിനഞ്ച് മിനിറ്റ് കൊണ്ട് നാദാപുരം എത്തുമെന്ന് പറഞ്ഞ ആബെുലന്സിനെ വീണ്ടും വിളിച്ചപ്പോള് പുറമേരി കുനിങ്ങാട് റോഡിലെത്തിയെന്ന് അറിയിക്കുകയും ചെയ്തു. പിന്നീട് പത്തുമിനിറ്റിനുശേഷം വീണ്ടും വിളിച്ചപ്പോള് മടങ്ങിപ്പോവുകയാണ്, നാദാപുരത്തുനിന്ന് രോഗികളെ കൊണ്ട് പോവാന് കഴിയില്ലെന്നാണത്രെ അറിയിച്ചത്. തുടര്ന്ന് എടച്ചേരി തലായിയിലെ ആംബുലന്സ് വിളിച്ചാണ് രോഗിയെ കൊണ്ടുപോയത്. അപ്പോഴേക്കും മുക്കാല് മണിക്കൂറിലധികം രോഗി നാദാപുരം ആശുപത്രിയില് തന്നെ കഴിയേണ്ടി വന്നു.
https://www.facebook.com/Malayalivartha