രാജ്യാന്തര ചലച്ചിത്ര മേളയെ ശ്രദ്ധേയമാക്കി നോ ഫാദേഴ്സ് ഇന് കശ്മീര്
ബ്രിട്ടനില് ജനിച്ച കശ്മീര് വേരുകളുള്ള കൗമാരക്കാരിയായ നൂര് തന്റെ വേരുകള് തേടി വരുന്ന പിതാക്കന്മാരില്ലാത്ത കശ്മീര് അഥവാ 'നോ ഫാദേഴ്സ് ഇന് കശ്മീര്' ഇരുപത്തിനാലാമത് അന്താരാഷ്ട്ര ചലചിത്രോത്സവത്തിന്റെ നാലാം ദിവസത്തില് പ്രേക്ഷക ശ്രദ്ധ പിടിച്ചു പറ്റി.
അപ്രത്യക്ഷരായ പിതാക്കന്മാരുടെ രഹസ്യങ്ങള് അറിയാനുള്ള ആകാംഷയേക്കാള് വിദേശീയതയാല് മനം മടുത്ത പ്രാദേശിക കശ്മീര് ബാലനായ മജിദും അവളോടൊപ്പം ചേരുന്നു. ഇന്തോപാക് അതിര്ത്തിയിലെ ഒരു നിരോധിത പ്രദേശത്തേക്ക് നൂര് മജീദുമായി പോകുന്നു. അവിടെ അവര് കാണരുതാത്ത ഒരു രഹസ്യം കാണുകയും അവരെ ഒരു സൈനിക പട്രോളിംഗ് സംഘം പിടികൂടുകയും ചെയ്യുന്നു. ബ്രിട്ടീഷുകാരിയായതിനാല് നൂര് മോചിതയായെങ്കിലും ചോദ്യം ചെയ്യലിനായി മജിദിനെ തടഞ്ഞുവെക്കുന്നതും അതിന്റെ അനന്തരഫലങ്ങളിലുമാണ് ചിത്രം അവസാനിക്കുന്നത്.'
കഴിഞ്ഞ ഏപ്രിലില് ഇന്ത്യയില് പുറത്തിറങ്ങിയ ചിത്രം അടുത്ത വര്ഷം ആദ്യം യു.കെയിലും യു.എസിലും പുറത്തിറക്കാനുള്ള തയ്യാറെടുപ്പിലാണ് ബംഗാളി സംവിധായകന് അശ്വിന് കുമാര്. കഴിഞ്ഞ മാസം യുകെ മാധ്യമങ്ങള്ക്കായി സംഘടിപ്പിച്ച പ്രദര്ശനത്തില് ചിത്രം ഏറെ പ്രശംസ നേടിയിരുന്നു. 'ലിറ്റില് ടെററിസ്റ്റ്' എന്ന തന്റെ ചിത്രത്തിലൂടെ ഇന്ത്യയില് നിന്നുള്ള ഏറ്റവും പ്രായം കുറഞ്ഞ ഓസ്കാര് നോമിനി എന്ന നേട്ടം അശ്വിന്റെ പേരിലാണ്.
തിങ്കളാഴ്ച പ്രദര്ശിപ്പിച്ചവയില് ദക്ഷിണ കൊറിയയില് തരംഗമായ സസ്പെന്സ് ത്രില്ലര് ഡോര് ലോക്ക്, സൊളാനസിന്റെ സൗത്ത്,ടോം വാലറിന്റെ ദ കേവ്,1982, ദ ഹോള്ട്ട്, ഹവ്വാ മറിയം ആയിഷ, വേര്ഡിക്റ്റ്, ആദം, ബലൂണ് എന്നീ ചിത്രങ്ങള് കയ്യടി നേടി. ഏകാകിയായ ക്യുങ് മിന്റെ അപ്പാര്ട്ട്മെന്റെില് ഒരു അപരിചിതന് നടത്തുന്ന കൊലപാതകമാണ് ഡോര് ലോക്ക് എന്ന ചിത്രത്തിന്റെ ഇതിവൃത്തം. ലീ ക്വാണ് ആണ് ഈ ഹൊറര് ത്രില്ലറിന്റെ സംവിധായകന്. ലോകത്തിന്റെ വൈവിധ്യം അടയാളപ്പെടുത്തുന്ന 63 ചിത്രങ്ങളാണ് ഇന്നലെ പ്രദര്ശിപ്പിച്ചത്.
https://www.facebook.com/Malayalivartha