ഇതാണോ നുമ്മ പറഞ്ഞത്... പ്രളയദുരിതാശ്വാസ പ്രവര്‍ത്തനങ്ങളുമായി ബന്ധപ്പെട്ട് മുഖ്യമന്ത്രി നല്‍കിയത് പൊള്ളയായ വാഗ്ദാനങ്ങളെന്ന് തുറന്ന് കാട്ടി കേന്ദ്രമന്ത്രി വി. മുരളീധരന്‍; മുഖ്യമന്ത്രിയുടെ ഉള്ളു പൊള്ളയായ വാഗ്ദാന കുമ്പാരത്തിന്റെ യാഥാര്‍ത്ഥ്യം ജനം തിരിച്ചറിയുകയാണ്; മഹാപ്രളയത്തില്‍ നിന്നും കരകയറിയ യുവാവ് തൂങ്ങിമരിച്ചതെന്തിന്?
കേരളത്തില്‍ പഞ്ചായത്ത് ഉപ തെരഞ്ഞെടുപ്പ് അടുത്തിരിക്കുന്ന സാഹചര്യത്തില്‍ രാഷ്ട്രീയ പോര് തുടരുകയാണ്. നിയമസഭയ്ക്കകത്ത് ഭരണപക്ഷവും പ്രതിപക്ഷവും ഏറ്റുമുട്ടുമ്പോള്‍ പുറത്ത് സര്‍ക്കാരിനെതിരെ ആഞ്ഞടിക്കുകയാണ് കേന്ദ്ര മന്ത്രി വി. മുരളീധരന്‍. മുഖ്യമന്ത്രി പിണറായി വിജയന്‍ രണ്ട് ലക്ഷത്തോളം പേര്‍ക്ക് വീട് നല്‍കിയെന്ന് പറയുമ്പോള്‍ അതിനെ യുഡിഎഫും ബിജെപിയും ഒരുപോലെ എതിര്‍ക്കുകയാണ്.
അതിനിടെ ഇപ്പോള്‍ സംസാര വിഷയമായിരിക്കുന്നത് മഹാപ്രളയത്തില്‍ നിന്നും കരകയറിയ യുവാവിന്റെ ആത്മഹത്യയാണ്. ഇതോടെ പ്രളയദുരിതാശ്വാസ പ്രവര്‍ത്തനങ്ങളുമായി ബന്ധപ്പെട്ട് മുഖ്യമന്ത്രി പിണറായി വിജയനെതിരെ രൂക്ഷ വിമര്‍ശനവുമായി വി.മുരളീധരന്‍ രംഗത്തെത്തി. ഫേസ്ബുക്കില്‍ പോസ്റ്റിലൂടെയായിരുന്നു മുരളീധരന്റെ വിമര്‍ശനം. പ്രളയദുരിതാശ്വാസ കാലത്ത് പ്രഖ്യാപിച്ചിരുന്ന അടിയന്തരസഹായമായ പതിനായിരം രൂപ ലഭിക്കാത്തതില്‍ മനംനൊന്ത് വയനാട് സ്വദേശിയായ സനല്‍ ആത്മഹത്യ ചെയ്താണെന്ന് ആരോപണം ഉയര്‍ന്നിരുന്ന സാഹചര്യത്തിലാണ് മുഖ്യമന്ത്രിക്കെതിരായുള്ള കേന്ദ്രമന്ത്രിയുടെ വിമര്‍ശനം . ഇത് കേരളമാണ് എന്ന് ആവര്‍ത്തിച്ചു കൊണ്ടിരിക്കുന്ന മുഖ്യമന്ത്രിയുടെ ഉള്ളു പൊള്ളയായ വാഗ്ദാനക്കൂമ്ബാരത്തിന്റെ യാഥാര്‍ത്ഥ്യം ജനം തിരിച്ചറിയുകയാണെന്ന് മുരളീധരന്‍ പറഞ്ഞു.
മുരളീധരന്റെ ഫേസ്ബുക്ക് പോസ്റ്റ് ഇങ്ങനേയാണ്
മഹാപ്രളയത്തില്‍ വീട് നഷ്ടപ്പെട്ട യുവാവിനെ തൂങ്ങിമരിച്ച നിലയില്‍ കണ്ടെത്തിയെന്ന വാര്‍ത്ത വയനാട് മേപ്പാടി തൃക്കൈപ്പറ്റയില്‍ നിന്ന് ഇന്ന് കേട്ടു. പള്ളിക്കവല മൂഞ്ഞനാലില്‍ സനലിനെയാണ് മരിച്ച നിലയില്‍ കണ്ടെത്തിയത്.
പ്രളയത്തില്‍ എല്ലാം നഷ്ടപ്പെട്ടിട്ടും 10,000 രൂപ അടിയന്തര ധനസഹായം പോലും ലഭിച്ചിരുന്നില്ലെന്നും, ഇതില്‍ മനംനൊന്താണ് യുവാവ് മരിച്ചതെന്നും കുടുംബം ആരോപിച്ചത് വെറുതെയല്ല.തഹസില്‍ദാര്‍ റവന്യു പ്രിന്‍സിപ്പല്‍ സെക്രട്ടറിക്ക് നല്‍കിയ റിപ്പോര്‍ട്ടില്‍ പറയുന്നതിങ്ങനെ, 'അക്കൗണ്ടുമായി ബന്ധപ്പെട്ട സാങ്കേതികത്വം കാരണം പാസായ ധനസഹായം സനലിന് കൈമാറാന്‍ കഴിഞ്ഞില്ല'
ദാഹിക്കമ്‌ബോഴാണ് വെള്ളം കൊടക്കേണ്ടത്, അല്ലാതെ മരിച്ചിട്ടല്ല എന്ന വാചകമാണ് എനിക്കും ശ്രീ. പിണറായി വിജയനോട് പറയാനുള്ളത്. ലൈഫ് പദ്ധതിയില്‍ നിങ്ങള്‍ കഴിഞ്ഞ ദിവസം അവകാശപ്പെട്ട രണ്ടു ലക്ഷം പുഞ്ചിരിയുടെയും ശോഭ കെടുത്തുകയാണ് സനലിന്റെ കുടുംബത്തിന്റെ കണ്ണീര്‍. പ്രളയ സഹായം അര്‍ഹരിലെത്തിക്കാതെ സ്വന്തം അക്കൗണ്ടിലെത്തിച്ച ഭാരവാഹിയെ സിപിഎം അംഗത്വത്തില്‍ നിന്ന് പുറത്താക്കിയത് അധിക ദിവസം മുമ്ബല്ല. ഇത് കേരളമാണ് എന്ന് ആവര്‍ത്തിച്ചുകൊണ്ടിരിക്കുന്ന മുഖ്യമന്ത്രിയുടെ ഉള്ളു പൊള്ളയായ വാഗ്ദാനക്കൂമ്ബാരത്തിന്റെ യാഥാര്‍ത്ഥ്യം ജനം തിരിച്ചറിയുകയാണ്. തീരാനഷ്ടം, പാവപ്പെട്ട ആ കുടുംബത്തിനാണ്. സനലിന്റെ ജീവനെടുത്തവര്‍ സഹായപ്പെരുമഴയുമായി ഓടിക്കൂടുകയാണിപ്പോള്‍. ഇനിയെങ്കിലും പിണറായി സര്‍ക്കാര്‍ പ്രഹസനമവസാനിപ്പിച്ച് പ്രവൃത്തിയിലേക്ക് കടക്കണം എന്നേ എനിക്ക് പറയാനുള്ളൂ . ചുവപ്പുനാടക്കുരുക്കില്‍ പൊലിഞ്ഞ സനിലിന്റെ കുടുംബത്തിന്റെ ദു:ഖത്തില്‍ പങ്കചേരുന്നു, ആദരാഞ്ജലിയര്‍പ്പിക്കുന്നു'.
അതേസമയം രണ്ട് ലക്ഷം പേര്‍ക്ക് വീട് നല്‍കിയെന്ന വാദത്തിനെതിരെയും വി. മുരളീധരന്‍ രംഗത്തെത്തിയിരുന്നു. ലൈഫ് പദ്ധതിയുമായി ബന്ധപ്പെട്ട യഥാര്‍ത്ഥ വസ്തുതകള്‍ സംസ്ഥാന സര്‍ക്കാര്‍ മറച്ചുവെക്കുകയാണെന്ന് വി മുരളീധരന്‍ പറഞ്ഞു. പദ്ധതിക്കായി കേന്ദ്ര സര്‍ക്കാരില്‍ നിന്ന് എത്ര വിഹിതം കിട്ടിയെന്ന് വ്യക്തമാക്കണം. ലൈഫ് സംസ്ഥാന സര്‍ക്കാരിന്റെ സ്വന്തം പദ്ധതിയായി ചിത്രീകരിക്കുകയാണെന്നും വി മുരളീധരന്‍ ആരോപിച്ചു. അതിന് പിന്നാലെയാണ് പ്രളയ ദുരിതാശ്വാസത്തെ പറ്റിയുള്ള വിവാദം പുകയുന്നത്.
"
https://www.facebook.com/Malayalivartha
