ലോക്‌സഭാ തിരഞ്ഞെടുപ്പില്‍ ഉത്തര്‍പ്രദേശിലെ ഫറൂഖാബാദ് ലോക്‌സഭാ മണ്ഡലത്തില്‍ വിവിധപോളിംഗ് ബൂത്തുകളില്‍ എട്ടുതവണ ബി.ജെ.പിക്ക് വേണ്ടി വോട്ടു ചെയ്യുന്ന യുവാവിന്റെ വീഡിയോ പുറത്ത്. സമാജ്വാദി പാര്‍ട്ടി നേതാവ് അഖിലേഷ് യാദവാണ് യുവാവ് നിരവധി തവണ വോട്ട്രു രേഖപ്പെടുത്തുന്ന വീഡിയോ എക്‌സില്‍ പങ്കുവച്ചത്.

വീഡിയോ പ്രചരിച്ചിട്ട് പോലും നടപടിയെടുക്കാത്ത തിരഞ്ഞെടുപ്പ് കമ്മിഷന്‍ ഉറങ്ങുകയാണോ എന്ന് പ്രതിപക്ഷ നേതാക്കള്‍ ചോദിച്ചു. ഉത്തര്‍പ്രദേശിലെ വിവിധ മണ്ഡലങ്ങളില്‍ നിരവധി ചട്ട ലംഘനങ്ങള്‍ റിപ്പോര്‍ട്ട് ചെയ്യപ്പെട്ടതായി നേതാക്കള്‍ ആരോപിക്കുന്നു. അതേസമയം രാജന്‍സിംഗ് താക്കൂര്‍ എന്ന 16കാരനാണ് വീഡിയോയില്‍ ഉള്ളതെന്ന വിവരവും പുറത്തുവന്നു, രാജന്റെ പിതാവ് അനില്‍സിംഗാണ് തന്റെ മകന് 16വയസേ ഉള്ളൂവെന്ന് മാദ്ധ്യമങ്ങളോട് വെളിപ്പെടുത്തിയത്. ഖിരി പരാമന്‍ ഗ്രാമത്തിലെ ഗ്രാമപ്രധാന്‍ ആണ് അനില്‍സിംഗ്. ബി.ജെ.പി നേതാവാണ് ഇദ്ദേഹം.

വീഡിയോ വൈറലായതിന് പിന്നാലെ സംഭവത്തില്‍ കടുത്ത നടപടി എടുക്കണമെന്ന് അഖിലേഷ് യാദവ് തിരഞ്ഞെടുപ്പ് കമ്മിഷനോട് ആവശ്യപ്പെട്ടു. ഗുരുതരമായ വീഴ്ചയാണ് തിരഞ്ഞെടുപ്പ് ഉദ്യോഗസ്ഥരില്‍ നിന്ന് ഉണ്ടായതെന്നും അദ്ദേഹം ചൂണ്ടിക്കാണിച്ചു. യുവാവ് തന്നെയാണ് വീഡിയോ പകര്‍ത്തിയിരിക്കുന്നത്. ഫറൂഖാബാദ് മണ്ഡലത്തില്‍ പെടുന്ന ഇറ്റാജില്ലയിലെ ഖിരി പരാമന്‍ ഗ്രാമത്തിലെ ഒരു ബൂത്തിലാണ് സംഭവം. സിറ്റിംഗ് എം..പിയായ മുകേഷ്ര് രാജ്പുത് ആണ് മണ്ഡലത്തിലെ ബി.ജെ.പി സ്ഥാനാര്‍ത്ഥി. തിരഞ്ഞെടുപ്പിന്റെ നാലാംഘട്ടത്തില്‍ മേയ് 13നാണ് ഇവിടെ വോട്ടെടുപ്പ് നടന്നത്.