ഇടുക്കി ചതുരംഗപ്പാറ കാട്ടാനക്കൂട്ടം കീഴടക്കി
നെടുങ്കണ്ടത്തിനടുത്ത് ചതുരംഗപ്പാറയില് കഴിഞ്ഞ ദിവസങ്ങളില് കാട്ടാനക്കൂട്ടം കൂട്ടമായെത്തി. ചതുരംഗപ്പാറ കാറ്റാടിപ്പാടത്തോട് ചേര്ന്ന സ്ഥലത്താണ് ആനക്കൂട്ടം തമ്പടിച്ചത്. സ്ഥലത്ത് ഉടുമ്പന്ചോല ഫോറസ്റ്റര് കെ.എന്.സാബു, ഫോറസ്റ്റ് ഓഫിസര്മാരായ ബി.ഉണ്ണിക്കൃഷ്ണന്, ഇ.എസ്.ഷൈജു, പി.എസ്.നിഷാദ് എന്നിവരടങ്ങിയ സംഘം പരിശോധന നടത്തി. വനം വകുപ്പ് മേഖലയില് 4 ഷിഫ്റ്റുകളിലായി 24 മണിക്കൂര് പരിശോധന ആരംഭിച്ചു.
കേരള തമിഴ്നാട് അതിര്ത്തിയില് കഴിഞ്ഞ 6 മാസമായി കാട്ടാനശല്യം വ്യാപകമായ സാഹചര്യത്തില് ട്രഞ്ച് സ്ഥാപിക്കാന് നീക്കം ആരംഭിച്ചു. കഴിഞ്ഞ മാസം പുഷ്പകണ്ടം അണക്കരമെട്ടില് കാട്ടാന ആക്രമണം നടത്തിയ പ്രദേശങ്ങള് വനംവകുപ്പ് ഉദ്യോഗസ്ഥര് സന്ദര്ശിച്ചിരുന്നു. തുടര്ന്നു തമിഴ്നാട് വനം വകുപ്പുമായി നടത്തിയ ചര്ച്ചയിലാണ് നിലവില് കഴിഞ്ഞ ഏതാനും വര്ഷങ്ങളായി ആനശല്യം തുടരുന്ന സ്ഥലങ്ങളില് നിലവില് ട്രഞ്ച് നിര്മ്മിക്കാന് തീരുമാനമെടുത്തത്. പ്രദേശത്തു കാട്ടാന ശല്യം രൂക്ഷമായ വാര്ത്ത മനോരമ റിപ്പോര്ട്ട് ചെയ്തിരുന്നു.
കാട്ടാന പതിവായി മേഖലയില് എത്തിയതോടെ പ്രദേശവാസികളും ഭീതിയിലാണ്. ഏലത്തോട്ടങ്ങളില് വന് കൃഷി നാശമാണ് സംഭവിച്ചത്. അണക്കരമെട്ട് സ്വദേശി അജീഷിന്റെ ഉടമസ്ഥതയിലുള്ള വീട് കാട്ടാനക്കൂട്ടം 2 മാസം മുന്പ് തകര്ത്തിരുന്നു. അര്ധരാത്രിയാണ് ആനക്കൂട്ടം പുരയിടങ്ങളില് നാശം വിതച്ചത്. 2 മാസം മുന്പ് കേരള തമിഴ്നാട് അതിര്ത്തിയിലൂടെ കടന്നുപോകുന്ന അണക്കരമെട്ട് - തൂക്കുപാലം റോഡിലും ആനക്കൂട്ടം നിലയുറപ്പിച്ചിരുന്നു. കേരള - തമിഴ്നാട് അതിര്ത്തിയായ പ്രദേശത്ത് കാട്ടാന ആക്രമണം പതിവാണ്. കഴിഞ്ഞ മാസം ഇവിടെ ഒരു വീട് തകര്ക്കുകയും നിരവധി ആളുകളുടെ കൃഷി ദേഹണ്ഡങ്ങള് നശിപ്പിക്കുകയും ചെയ്തിരുന്നു.
ജനവാസ മേഖലയില് കാട്ടാന ആക്രമണം പതിവായതോടെ പ്രദേശവാസികളും പരിഭ്രാന്തിയിലാണ്. പ്രദേശത്ത് ട്രഞ്ച് സ്ഥാപിച്ച് കര്ഷകരുടെ ഭൂമി സംരക്ഷിക്കണമെന്ന ആവശ്യം ശക്തമായിരുന്നു. ഏലം, കാപ്പി, ചേന, ചേമ്പ്, വാഴ, കപ്പ എന്നീ കൃഷികളാണ് കാട്ടാനകള് പിഴുതെറിഞ്ഞത്. തമിഴ്നാട് വനത്തില് നിന്നെത്തിയ കാട്ടാനകളാണ് നാശം വിതയ്ക്കുന്നത്. കൃഷിഭൂമിയിലെത്തിയ ആനക്കൂട്ടം ഏലച്ചെടികള് പിഴുതുമാറ്റിയിരുന്നു. മേഖലയിലെ കര്ഷകര്ക്കു ലക്ഷക്കണക്കിനു രൂപയുടെ നാശനഷ്ടമാണ് ഉണ്ടായത്.
https://www.facebook.com/Malayalivartha