ലോക്ഡൗണ് നീട്ടിയതോടെ പൂരം നടത്തിപ്പ് ദുഷ്ക്കരമായി. മേളം കലാകാരന്മാരുടെ പ്രതീക്ഷകളും അസ്തമിക്കുന്നു. ചരിത്രം കാണാത്ത പ്രതിസന്ധിയില് തൃശൂര്.
ലോക ശ്രദ്ധയാകര്ഷിക്കുന്ന പൂരങ്ങളുടെ പൂരമാണ് തൃശൂര് പൂരം. ഏകദേശം 200 വര്ഷത്തെ ചരിത്ര പാരമ്പര്യമുള്ള തൃശൂര് പൂരത്തിനുള്ളത്. ഇതില് അണിനിരക്കുന്ന ആനകളേയും കുടമാറ്റവും മേളവും വെടിക്കെട്ടുമൊക്കെ കാണാനായി വിദേശത്തു നിന്നും സ്വദേശത്തു നിന്നും പതിനായിരക്കണക്കിന് ആളുകളാണ് തൃശൂര് നഗരിയിലേക്ക് ഒഴുകിയെത്തുന്നത്. ഒരോ പൂരക്കാലത്തിനായും അക്ഷമരായാണ് പൂരപ്രേമികള് കാത്തിരിക്കുന്നത്. എന്നാലിപ്പോള് കലാകാരന്മാര്ക്കും പൂരപ്രേമികള്ക്കും നിരാശപകരുന്ന ഒരു വാര്ത്തയാണ് ഇപ്പോള് പുറത്തുവരുന്നത്. കൊറോണ വ്യാപനം തടയുന്നതിന്റെ ഭാഗമായി ഏര്പ്പെടുത്തി ലോക്ഡൗണ് മേയ് മൂന്നു വരെ നീട്ടിയതോടെ തൃശൂര് പൂരം നടക്കില്ലെന്ന് ഏറെക്കുറെ ഉറപ്പായി.
ലോക്ഡൗണ് നീട്ടി പ്രധാനമന്ത്രി നരേന്ദ്രമോദിയുടെ പ്രഖ്യാപനം വന്നതോടെ തൃശൂര് പൂരം നടത്തിപ്പ് ദുഷ്ക്കരമായി. ആദ്യഘട്ട ലോക്ഡൗണ് പ്രഖ്യാപിച്ചപ്പോള് തന്നെ പൂരത്തിന്റെ ഒരുക്കങ്ങള് മന്ദഗതിയിലായിരുന്നു. സാമൂഹിക അകലം നിര്ബന്ധമായതിനാല് പൂരം നടത്താന് കഴിയില്ലെന്ന് ഏകദേശം ഉറപ്പായിരുന്നു. തിരുവമ്പാടി, പാറമേക്കാവ് ദേവസ്വം ഭാരവാഹികള് അനൗദ്യോഗികമായി ഇക്കാര്യം ചര്ച്ച ചെയ്തിരുന്നു. അതിനിടെ കൊച്ചിന് ദേവസ്വം ബോര്ഡുമായി ജില്ലാ ഭരണകൂടവുമായി വ്യാഴാഴ്ച പതിനൊന്നു മണിക്ക് പ്രത്യേക യോഗം ചേരും. പൂരം ചടങ്ങു മാത്രമായി എങ്ങനെ നടത്താന് കഴിയുെമന്നാണ് ചര്ച്ച. കൊച്ചി രാജാവായിരുന്ന ശക്തന് തമ്പുരാന് തുടക്കം കുറിച്ച എകദേശം 200 വര്ഷത്തെ ചരിത്ര പാരമ്പര്യമുള്ള പൂരം കഴിഞ്ഞ 58 വര്ഷത്തിനിടെ ചടങ്ങ് മാത്രമായി ചുരുക്കിയത് ഒരു തവണ മാത്രമായിരുന്നു. ഇതിനു മുമ്പ് 1962ലെ ഇന്ത്യ-ചൈന യുദ്ധകാലത്ത് ചടങ്ങു മാത്രമായിട്ടായിരുന്നു പൂരം നടത്തിയത്. എന്തായാലും ജില്ലയിലെ മന്ത്രിമാരുടെ നേതൃത്വത്തില് ചേരുന്ന യോഗത്തിലെ ചര്ച്ചകള്ക്കു ശേഷം അന്തിമ തീരുമാനം പ്രഖ്യാപിക്കും.
അതേസമയം, തൃശൂര് പൂരത്തിന്റെ ചരിത്രത്തില് ഇന്നേവരെ കാണാത്ത പ്രതിസന്ധിയാണിത്. മേയ് രണ്ടിനാണ് പൂരം നടക്കേണ്ടത്. വെടിക്കെട്ട്, കുടമാറ്റം തുടങ്ങി ഓരോന്നു നിറപകിട്ടോടെ നടത്തണമെങ്കില് ദീര്ഘനാള് നീണ്ട അധ്വാനം വേണം. മാസങ്ങള്ക്കുമുമ്പ് ആരംഭിച്ച ഉത്സവത്തിനുള്ള തയാറെടുപ്പ് കൊറോണ വൈറസുമായി ബന്ധപ്പെട്ട നിയന്ത്രണങ്ങള് കാരണംനിര്ത്തിവച്ചു. ലോക്ഡൗണ് തുടങ്ങിയ ശേഷം ഒരു പണിയും നടന്നിട്ടില്ല. ഏപ്രില് ഒന്നിന് നടക്കാനിരുന്ന രണ്ട് മാസം നീളുന്ന പൂരം പ്രദര്ശനം റദ്ദാക്കിയിരുന്നു. വടക്കുംനാഥ ക്ഷേത്രത്തിന് സമീപം തേക്കിന്കാട് മൈതാനത്ത് നടക്കുന്ന പ്രദര്ശനം ഏറ്റവും വലിയ വ്യാപാര മേളകളിലൊന്നാണ്.
അതേസമയം, പൂരം നടക്കില്ലെന്ന് ഉറപ്പായതോടെ മേളം കലാകാരന്മാരുടെ പ്രതീക്ഷകളും അസ്തമിച്ചിരിക്കുകയാണ്. ഉല്സവ സീസണ് കോവിഡ് കൊണ്ടുപോയതിനാല് തന്നെ മേളം കലാകാരന്മാര് ദുരിതത്തിലായിരുന്നു. ഇത്തവണ പ്രധാനപ്പെട്ട ഉല്സവങ്ങള് എല്ലാം മുടങ്ങി. ആഘോഷങ്ങള്ക്കു വിലക്കു വീണതോടെ മേളം കലാകാരന്മാരുടെ കീശയും കാലിയായി. കോവിഡിന്റെ വിലക്ക് കഴിയുമ്പോഴേക്കും ഉല്സവ സീസണ് അവസാനിക്കും. പിന്നെ, ജീവിതം തിരിച്ചുപിടിക്കാന് ഡിസംബര് വരെ കാത്തിരിക്കണം. അതിനിടെ, രണ്ടു മാസത്തേയ്ക്കു ആയിരം രൂപ വീതം വാദ്യ കലാകാരന്മാര്ക്കു നല്കുമെന്ന് സര്ക്കാര് പ്രഖ്യാപിച്ചിട്ടുണ്ട്. മേളം കലാകാരന്മാര്ക്കായി പ്രത്യേക പാക്കേജ് അനുവദിക്കമെന്ന ആവശ്യമാണ് ഈ മേഖലയിലുള്ളവര്ക്കുള്ളത്.
https://www.facebook.com/Malayalivartha