കാട്ടാനയ്ക്ക് പടക്കം നിറച്ച കൈതച്ചക്ക നല്കി കൊന്ന ആളെ കണ്ടെത്തുന്നവര്ക്ക് 50,000 രൂപ നല്കുമെന്ന് ഹ്യൂമന് സൊസൈറ്റി ഇന്റര്നാഷണല് ഇന്ത്യ
ഭക്ഷണം തേടിയിറങ്ങിയ ഗര്ഭിണിയായ കാട്ടാനയ്ക്ക് പടക്കം നിറച്ച കൈതച്ചക്ക നല്കി കൊന്ന ക്രൂരതക്കെതിരെ ഇന്ത്യയിലെമ്പാടും പ്രതിഷേധം. ഹോളിവുഡ്, ക്രിക്കറ്റ് താരങ്ങള്, മാധ്യമപ്രവര്ത്തകള് ഉള്പ്പെടെയുള്ളവര് ഈ ക്രൂരതക്കെതിരെ രംഗത്തുവന്നു. ഈ ക്രൂരസംഭവത്തിനെതിരെ വന് പ്രതിഷേധമാണ് സമൂഹമാധ്യമങ്ങളില് ഉയരുന്നത്.
അതേസമയം, ആനയെ കൈതച്ചക്കയ്ക്കുള്ളില് പടക്കം വെച്ച് കൊന്ന സാമൂഹിക വിരുദ്ധരെക്കുറിച്ച് വിവരം നല്കുന്നവര്ക്ക് പാരിതോഷികം പ്രഖ്യാപിച്ചു. ഹ്യൂമന് സൊസൈറ്റി ഇന്റര്നാഷണല് ഇന്ത്യയാണ് പാരിതോഷികം പ്രഖ്യാപിച്ചത്. പ്രതിയെക്കുറിച്ച് വിവിരം നല്കുന്നവര്ക്ക് 50,000 രൂപ നല്കുമെന്നാണ് സംഘടന അറിയിച്ചിരിക്കുന്നത്. സംഭവത്തില് ശക്തമായി അപലപിക്കുന്നുവെന്നും സംഘടന വ്യക്തമാക്കി.
സൈലന്റ് വാലി വനമേഖലയില്നിന്ന് പുറത്തിറങ്ങിയ 15 വയസ് തോന്നിക്കുന്ന പിടിയാനയാണ് നാല് ദിവസം മുന്പ് ചരിഞ്ഞത്.ആനയുടെ പോസ്റ്റ്മോര്ട്ടം റിപ്പോര്ട്ടില് സ്ഫോടകവസ്തു പൊട്ടിത്തെറിച്ച് ആനയുടെ മേല്ത്താടി തകര്ന്നതായി വ്യക്തമായി.
അമ്പലപ്പാറ വനമേഖലയിലെ കര്ഷകര് പന്നിയെ തുരത്താനായി കൃഷിയിടത്തില് പടക്കം ഉപയോഗിക്കാറുണ്ടായിരുന്നു. ഇതിനെ തുടര്ന്നാണ് പൈനാപ്പിളില് പടക്കം നിറച്ച് ആനയെ കൊന്നത് എന്ന വിവരം ലഭിച്ചത്. ഇതോടെയാണ് വനം വകുപ്പിന്റെ അന്വേഷണം പൈനാപ്പിളിലേക്ക് നീങ്ങിയത്. നാട്ടുകാരിലാരെങ്കിലും പടക്കം നിറച്ച പൈനാപ്പിള് ആനയ്ക്ക് നല്കിയിട്ടുണ്ടോയെന്നും വനം വകുപ്പ് അന്വേഷിക്കുന്നുണ്ട്. അവശനിലയില് കണ്ട ആനയ്ക്ക് ചികിത്സ നല്കാനായി രണ്ട് കുങ്കിയാനകളെ വനം വകുപ്പ് കൊണ്ടുവന്നെങ്കിലും വെള്ളത്തില് നില്ക്കുന്നതിനിടെ ഒരു മാസം ഗര്ഭിണിയായ ആന ചരിയുകയായിരുന്നു. 1996 -ല് പാലക്കയം ഇഞ്ചിക്കുന്ന് വനമേഖലയില് സമാന രീതിയില് കാട്ടാന ചരിഞ്ഞിരുന്നു.
സംഭവത്തില് അന്വേഷണം ശക്തമാകുന്നു. പ്രദേശത്തെ തോട്ടങ്ങള് കേന്ദ്രീകരിച്ചാണ് അന്വേഷണം നടക്കുന്നത്. പടക്കത്തിന്റെയോ കൈതച്ചക്കയുടെയോ അവശിഷ്ടങ്ങളൊന്നും ഇതുവരെ തോട്ടങ്ങളില്നിന്നു ലഭിച്ചിട്ടില്ല. സമീപ തോട്ടങ്ങളിലെ ആളുകളെയും മറ്റും ചോദ്യം ചെയ്യുന്നത് തുടരുകയാണ്. പൊതുവെ പന്നികളെ ഓടിക്കാന് പഴങ്ങളിലും മറ്റും പടക്കം നിറക്കുന്ന രീതി പാലക്കാടന് മേഖലകളിലുണ്ട്. പക്ഷെ ഇത്തരത്തില് ആനയുടെ വായ തകര്ന്ന് ചെരിയുന്ന സംഭവം ആദ്യമാണെന്ന് ഫോറസ്റ്റ് ഓഫീസര് ആഷിഖ് അലി പറഞ്ഞു.കപ്പക്കാടുകളില് പന്നികളെ ഓടിക്കാനാണ് ഇത് ഉപയോഗിച്ചിരുന്നത്. ഇപ്പോഴും തോട്ട മേഖലകളിലും പന്നിപ്പടക്കം കര്ഷകര് അനധികൃതമായി ഉപയോഗിക്കുന്നുണ്ട്.
https://www.facebook.com/Malayalivartha