കോട്ടയം മെഡി. കോളജില്‍ രണ്ടു ദിവസം പ്രായമുള്ള കുഞ്ഞിന് വിജയകരമായി ഹൃദയശസ്ത്രക്രിയ നടത്തി
കോട്ടയം മെഡിക്കല്‍ കോളജ് ആശുപത്രിയിലെ കാര്‍ഡിയോളജി വിഭാഗത്തിന് അഭിമാനനേട്ടം. രണ്ടു ദിവസം പ്രായമായ ശിശുവിനു കാര്‍ഡിയോളജി കാര്‍ഡിയോ തൊറാസിക് (ഹൃദയ ശസ്ത്രക്രിയാവിഭാഗം) വിഭാഗം ഗൈനക്കോളജി, അനസ്തേഷ്യ വിഭാഗങ്ങളുടെ സഹകരണത്തോടെ നടത്തിയ ഹൃദയ ശസ്ത്രക്രിയ പൂര്‍ണ വിജയമായി.
കാഞ്ഞിരപ്പള്ളി ഊരയ്ക്കനാട് സ്വദേശികളായ അജു - സുമി ദമ്പതികളുടെ ആണ്‍കുഞ്ഞിന് ശുദ്ധരക്തക്കുഴലിന്റെയും അശുദ്ധ രക്തക്കുഴലിന്റെയും സ്ഥാനംമാറുന്ന 'ട്രാന്‍സ്പൊസിഷന്‍ ഓഫ് ഗ്രേറ്റ് ആര്‍ട്ടറി വിത്ത് ഇന്‍ടാക്റ്റ് വെന്‍ട്രികുലാര്‍ സെപ്റ്റം' എന്ന രോഗമായിരുന്നു. സങ്കീര്‍ണമായ ഈ പ്രശ്നം പരിഹരിക്കാനാണ് 'ആര്‍ട്ടറി സ്വിച്ച്' എന്ന ശസ്ത്രക്രിയ നടത്തിയത്.
സുമി ഗര്‍ഭിണിയായിരിക്കുമ്പോള്‍ നടത്തിയ സ്‌കാനിങ്ങില്‍ തന്നെ ഗര്‍ഭസ്ഥശിശുവിനു ഹൃദയത്തിനു തകരാറുണ്ടെന്നു കണ്ടെത്തിയിരുന്നു. പിന്നീട് കോട്ടയം മെഡിക്കല്‍ കോളജ് ഗൈനക്കോളജി വിഭാഗത്തില്‍ ചികിത്സ തേടി. കഴിഞ്ഞ ദിവസം ജനിച്ചയുടന്‍ കുട്ടിയുടെ ശരീരത്തിലെ ഓക്സിജന്റെ അളവു ഗണ്യമായി കുറയാന്‍ തുടങ്ങി. തലച്ചോറിനടക്കം കേടുപാടുണ്ടാകാനും മരണംവരെ സംഭവിക്കാനും സാധ്യതയേറിയതോടെ ഗൈനക്കോളജി വിഭാഗത്തിലെ ഡോ. സോണിയയുടെയും നവജാതശിശു ശസ്ത്രക്രിയാ വിദഗ്ധന്‍ ഡോ. വീരേന്ദ്രകുമാറിന്റേയും നേതൃത്വത്തില്‍ ശസ്ത്രക്രിയയ്ക്കുള്ള ക്രമീകരണം നടത്തി.
കുഞ്ഞിനെ തീവ്രപരിചരണ വിഭാഗത്തിലേക്കു മാറ്റുകയും ശരീരത്തിന്റെ ഊഷ്മാവും ഓക്സിജനും നിലനിര്‍ത്താനുള്ള മരുന്നുകള്‍ നല്‍കുകയും ചെയ്തു. രാത്രിയോടെ കുഞ്ഞിന്റെ നില മോശമായതിനാല്‍ കാര്‍ഡിയോ തൊറാസിക് വിഭാഗത്തിലെ ശിശുക്കളുടെ തീവ്ര പരിചരണ വിഭാഗത്തിലേക്കു മാറ്റി. അനസ്തേഷ്യ വിഭാഗം അസിസ്റ്റന്റ് ഡോ. മഞ്ജുഷയുടെ നേതൃത്വത്തില്‍ വെന്റിലേറ്റര്‍ ഘടിപ്പിക്കുകയും ചെയ്തു.
രണ്ടാം ദിവസം രാവിലെ എട്ടിനു ഡോ. തോമസിന്റെ നേതൃത്വത്തില്‍ അഞ്ചു മണിക്കൂര്‍ നീണ്ടുനിന്ന ഹൃദയ ശസ്ത്രക്രിയ നടത്തുകയായിരുന്നു. ശസ്ത്രക്രിയ വിജയമായതോടെ കുട്ടിയും മാതാപിതാക്കളും ഇന്നലെ ആശുപത്രി വിട്ടു. ഒരു സര്‍ക്കാര്‍ സംവിധാനത്തില്‍ ഇത്രയും സങ്കീര്‍ണമായ ശസ്ത്രക്രിയ ചെയ്യാന്‍ സാധിക്കുന്നത് വിവിധ വിഭാഗങ്ങളുടെ പൂര്‍ണ സഹകരണം കൊണ്ടാണെന്ന് ഹൃദയശസ്ത്രക്രിയാ വിഭാഗം മേധാവിയും ആശുപത്രി സൂപ്രണ്ടുമായ ഡോ. ടി.കെ. ജയകുമാര്‍ പറഞ്ഞു.
ഡോ. തോമസ്, ഡോ.ആകാശ് ബാബു, ഡോ. ജയപ്രസാദ്, ഡോ.മഞ്ജു.എസ്.പിള്ള, ഡോ.സോണി, ഡോ. നിതീഷ്, പെര്‍ഫ്യൂഷനിസ്റ്റ്മാരായ രാജേഷ്, മെല്‍വില്‍ എന്നിവരും നഴ്സുമാരുമാണു ശസ്ത്രക്രിയാ സംഘത്തിലുണ്ടായിരുന്നത്.
https://www.facebook.com/Malayalivartha
