എഐഎസ്എഫ് രൂപീകരണത്തിന്റെ 85-ാം വാര്‍ഷിക ദിനമായ ഓഗസ്റ്റ് 12-ന് എസ്എഫ്‌ഐ ദേശീയ ജോയിന്റ് സെക്രട്ടറി ദിപ്‌സിത ജോയി, എസ്എഫ്‌ഐ പതാകയേന്തിയ വിദ്യാര്‍ഥികളുടെ ചിത്രം 'സംഘടിത വിദ്യാര്‍ഥി പ്രസ്ഥാനത്തിന്റെ 85 വര്‍ഷം' എന്ന അടിക്കുറിപ്പോടെ ഫെയ്‌സ്ബുക്കിലിട്ടിരുന്നു. ഈ പോസ്റ്റിലെ പിഴവിനെതിരെ വിമര്‍ശനമുന്നയിച്ച എഐഎസ്എഫ് നേതാവിനു നേരെ സൈബര്‍ ആക്രമണം. എഐഎസ്എഫ് കോഴിക്കോട് ജില്ലാ വൈസ് പ്രസിഡന്റ് അശ്വിന്‍ ആവളയുടെ ഫെയ്‌സ്ബുക്ക് പോസ്റ്റിനു കീഴിലാണ് അസഭ്യമായ ഭാഷയിലുള്ള ആക്രമണം. ആക്രമണത്തിനു പിന്നില്‍ സൈബര്‍ സഖാക്കളാണെന്ന് അശ്വിന്‍ പറയുന്നു.

ദിപ്‌സിത ജോയിയുടെ പോസ്റ്റ് എസ്എഫ്‌ഐ നേതാക്കള്‍ വ്യാപകമായി ഷെയര്‍ ചെയ്തു. പിന്നാലെ 1936-ല്‍ രൂപീകരിച്ച സംഘടന എസ്എഫ്‌ഐ അല്ല എഐഎസ്എഫ് ആണെന്നു ചൂണ്ടിക്കാട്ടി എഐഎസ്എഫ്, എഐവൈഎഫ് നേതാക്കള്‍ രംഗത്തെത്തി.

ദിപ്‌സിതയുടെ പോസ്റ്റിന്റെ സ്‌ക്രീന്‍ ഷോട്ട്, '1936 ഓഗസ്റ്റ് 12-ന് എസ്എഫ്‌ഐ രൂപീകരിച്ചു പോലും' എന്ന അടിക്കുറിപ്പോടെ എഐഎസ്എഫ് ജില്ലാ വൈസ് പ്രസിഡന്റ് അശ്വിന്‍ ഫെയ്‌സ്ബുക്കിലിട്ടു. ഈ പോസ്റ്റിനു കീഴിലാണ് അശ്വിനു നേരെയുള്ള സൈബര്‍ ആക്രമണം. കുടുംബാംഗങ്ങളെ ഉള്‍പ്പെടെ അസഭ്യം പറഞ്ഞാണ് പല കമന്റുകളും. അക്രമണം അസഹ്യമായതോടെ അശ്ലീല കമന്റുകളുടെ സ്‌ക്രീന്‍ഷോട്ട് അശ്വിന്‍ ഫെയ്‌സ്ബുക്കില്‍ പോസ്റ്റ് ചെയ്തു' സൈബര്‍ സഖാക്കള്‍ ആണു പോലും.

ബംഗാളിനും ത്രിപുരയ്ക്കും പിന്നാലെ കേരളത്തിലും വെട്ടുകിളി ആക്രമണം. സംഘപരിവാറുകാര്‍ക്ക് നിങ്ങളെക്കാള്‍ മാന്യത ഉണ്ട്' എന്ന അടിക്കുറിപ്പോടെ. സംഭവത്തില്‍ അശ്വിന്‍ മേപ്പയ്യൂര്‍ പൊലീസില്‍ പരാതി നല്‍കി. പരാതിയുടെ പകര്‍പ്പ് മുഖ്യമന്ത്രി, ഡിജിപി, ജില്ലാ പൊലീസ് മേധാവി എന്നിവര്‍ക്ക് അയച്ചിട്ടുണ്ട്.