കൊച്ചി പൊലീസ് തയാറാക്കിയ ആപ്പില്‍ ജില്ലകളിലെ കോവിഡ് ബാധിതരുടെ വിവരം പങ്കുവയ്ക്കണമെന്ന സിറ്റി പൊലീസ് കമ്മിഷണര്‍ വിജയ് സാഖറെയുടെ നിര്‍ദേശത്തിനെതിരെ സേനാ തലപ്പത്ത് കടുത്ത അതൃപ്തി. ദക്ഷിണമേഖല ഐജി ഹര്‍ഷിത അട്ടല്ലൂരി ഡിജിപിക്കു വാക്കാല്‍ പരാതി നല്‍കി. എഡിജിപി ഷേക്ക് ദര്‍വേഷ് സാഹിബും അതൃപ്തി അറിയിച്ചു. മറ്റു പല ജില്ലാ പൊലീസ് മേധാവികളും വിയോജിപ്പ് വാക്കാല്‍ പ്രകടിപ്പിച്ചു.

എഡിജിപിമാരും ഡിജിപിയുമൊക്കെ പൊലീസ് ആസ്ഥാനത്ത് ഉള്ളപ്പോള്‍ നിര്‍ദേശം ഒരു ഐജി എങ്ങനെ നല്‍കുമെന്നാണ് ഇവരുടെ ചോദ്യം. ആപ്പിലേക്ക് ആരും ഒരു വിവരവും നല്‍കേണ്ടതില്ലെന്നാണ് മറ്റു ജില്ലകളിലെ പൊലീസ് ഉന്നതര്‍ എടുത്തിട്ടുള്ള തീരുമാനം.

എഡിജിപി ഷേക്ക് ദര്‍വേഷ് സാഹിബാണ് ജില്ലാ പൊലീസ് മേധാവിമാര്‍ക്ക് നിര്‍ദേശങ്ങളും ഉപദേശങ്ങളും നല്‍കുന്നതിനുള്ള സംസ്ഥാനതല നോഡല്‍ ഓഫിസര്‍. വിവരങ്ങള്‍ ആപ്പിലേക്ക് നല്‍കണമെന്ന് 3 ദിവസം മുന്‍പാണ് സാഖറെ നിര്‍ദേശിച്ചത്. സര്‍ക്കാര്‍ ആപ്പുകളിലേക്ക് മാത്രമേ വിവരം കൈമാറൂ എന്നാണ് ഹര്‍ഷിത അട്ടല്ലൂരി വ്യക്തമാക്കിയത്. ആപ്പിലേക്ക് ഒന്നും നല്‍കരുതെന്ന് ഹര്‍ഷിത തന്റെ മേഖലയിലുള്ള എസ്പിമാര്‍ക്കു നിര്‍ദേശം നല്‍കി. സ്വകാര്യ കമ്പനിയാണു കൊച്ചി പൊലീസിന്റെ ആപ് തയാറാക്കിയത്.

സാഖറെ നിര്‍ദേശം നല്‍കിയത് ഡിജിപിയുടെ താല്‍പര്യ പ്രകാരമാണ് എന്നാണ് മറ്റുള്ളവര്‍ കരുതുന്നത്. ഇതുസംബന്ധിച്ച് പൊലീസില്‍ നിലനില്‍ക്കുന്ന ഭിന്നതയും ആശയക്കുഴപ്പവും വ്യക്തമാക്കുന്നതാണ് പുതിയ വിവാദം. കോവിഡ് രോഗികളുടെ കോള്‍ വിവരങ്ങള്‍ ശേഖരിക്കാന്‍ 11-ന് ഡിജിപി ലോക്‌നാഥ് ബെഹ്‌റ നിര്‍ദേശം നല്‍കിയിരുന്നു. ഇതു സ്വകാര്യതയുടെ ലംഘനമാണെന്ന് ഉന്നത പൊലീസ് ഉദ്യോഗസ്ഥര്‍ പറഞ്ഞു. ഭിന്നാഭിപ്രായം അവര്‍ ഡിജിപിയെ അറിയിച്ചിട്ടുണ്ട്. ലൊക്കേഷന്‍ പരിശോധിച്ചു രോഗിയുടെ നീക്കങ്ങള്‍ മനസ്സിലാക്കാമെന്നിരിക്കെ, കോള്‍ വിവരങ്ങള്‍ ശേഖരിക്കുന്നതിനോടാണ് എതിര്‍പ്പ്.

വ്യക്തി സ്വാതന്ത്ര്യത്തിനു മേല്‍ അനിവാര്യമായ ചില നിയന്ത്രണങ്ങള്‍ അസാധാരണമായ സാഹചര്യത്തില്‍ ആവശ്യമാണെന്നതിനാല്‍ അതിനെ സ്വകാര്യതയിലേയ്ക്കുള്ള കടന്നാക്രമണമായി വ്യാഖ്യാനിക്കുന്നതു ശരിയല്ലെന്നാണ് പൊലീസിന്റെ വിശദീകരണം. ടെലിഫോണ്‍ കോളുകളുടെ ഉള്ളടക്കം ശേഖരിക്കുന്നില്ല. അതിനാല്‍ ടെലിഗ്രാഫ് ആക്ട് 5(2) ബാധകമാകുന്നുമില്ലെന്നാണു പൊലീസ് വാദം. കേന്ദ്ര സര്‍ക്കാരിന്റെ ഉത്തരവുകളും മാനദണ്ഡങ്ങളും പാലിച്ചാണു സ്റ്റാര്‍ട്ടപ്പുകളുടെ സഹായത്തോടെ വികസിപ്പിച്ച പ്ലാറ്റ്‌ഫോം ഉപയോഗിച്ചു ട്രാക്കിങ് നടത്തുന്നത്.

മഹാമാരികള്‍ തടയുന്നതിനായി സ്വീകരിക്കുന്ന നടപടികള്‍ സ്വകാര്യതയുടെ ലംഘനമാകില്ലെന്നു സുപ്രീംകോടതി 2017-ലെ കെ.എസ്.പുട്ടസ്വാമി കേസിന്റെ വിധിയില്‍ വ്യക്തമാക്കിയിട്ടുണ്ടെന്നും പൊലീസ് ചൂണ്ടിക്കാട്ടി.