എം.ജി. സ്‌കൂള്‍ ഓഫ് ലെറ്റേഴ്സിന്റെ ബോര്‍ഡ് ഓഫ് സ്റ്റഡീസ് അംഗത്വത്തില്‍നിന്നു പിന്മാറുകയാണെന്ന് കെ.ആര്‍. മീര
എം.ജി. സര്‍വകലാശാല സ്‌കൂള്‍ ഓഫ് ലെറ്റേഴ്സിന്റെ ബോര്‍ഡ് ഓഫ് സ്റ്റഡീസില്‍ വിദഗ്ധസമിതി നല്‍കിയ പേരുകള്‍ വെട്ടി എഴുത്തുകാരി കെ.ആര്‍. മീരയെ നിയമിച്ചത് ചട്ടലംഘനമാണെന്നു വിമര്‍ശനമുണ്ടായതിനു പിന്നാലെ അംഗത്വത്തില്‍നിന്നു പിന്മാറുകയാണെന്ന് കെ.ആര്‍. മീര. അപേക്ഷിക്കാതെ ചാര്‍ത്തിത്തന്ന നിയമനത്തില്‍നിന്നു രാജിവയ്ക്കുകയാണെന്ന് അവര്‍ ഫെയ്സ് ബുക്കില്‍ കുറിച്ചു. ഉന്നതവിദ്യാഭ്യാസ വകുപ്പിന്റെ ഇടപെടലിലാണ് നിയമനമെന്ന ആരോപണമുയര്‍ന്നതോടെയാണ് രാജി പ്രഖ്യാപനം.
എഴുത്തു ജീവിതത്തിന്റെ തുടക്കത്തിലേ, സംസ്ഥാന, കേന്ദ്ര സര്‍ക്കാരുകളുടെ രാഷ്ട്രീയ നിയമനങ്ങള്‍ സ്വീകരിക്കില്ലെന്ന് തീരുമാനിച്ചതാണ്. പല ഔദ്യോഗിക സ്ഥാനങ്ങളിലേക്കും ക്ഷണം ലഭിച്ചെങ്കിലും സ്വീകരിച്ചില്ല. ഭാവിയിലും സ്വീകരിക്കില്ല. ബോര്‍ഡ് ഓഫ് സ്റ്റഡീസില്‍ പേരുള്‍പ്പെടുത്താന്‍ അനുവാദം ചോദിച്ച് വിളിച്ചതല്ലാതെ സര്‍വകലാശാലയില്‍നിന്ന് അറിയിപ്പ് ലഭിച്ചില്ല.
ബോര്‍ഡ് ഓഫ് സ്റ്റഡീസ് അംഗത്വത്തിന് രാഷ്ട്രീയ മാനം കല്‍പ്പിക്കാത്തതാണ് തനിക്കു സംഭവിച്ച അബദ്ധമെന്നും അതില്‍ ഇനി പ്രതികരിക്കില്ലെന്നും മീര വ്യക്തമാക്കി. സ്‌കൂള്‍ വിദ്യാഭ്യാസ കരിക്കുലം കമ്മിറ്റിയില്‍ തന്റെ പേര് ഉള്‍പ്പെടുത്തിയ കത്തു കിട്ടിയപ്പോള്‍ ഡയറക്ടറോട് ഒഴിവാക്കാന്‍ ആവശ്യപ്പെട്ടിരുന്നു. ഇതുവരെ ഒരു മീറ്റിങ്ങിലും പങ്കെടുത്തില്ല. അതിന്റെ പേരില്‍ ഒരുെപെസ പോലുംെകെപ്പറ്റിയുമില്ല.
മഹാത്മാഗാന്ധി സര്‍വകലാശാല നിയമത്തിലെ അനുഛേദം 28(1എ) പ്രകാരമാണു പുനസംഘടന നടത്തിയത്. ഇതു പൂര്‍ണമായും അക്കാഡമിക സമിതിയാണ്. സ്റ്റാറ്റിയൂട്ടില്‍ നിഷ്‌കര്‍ഷിച്ച യോഗ്യതയനുസരിച്ച് ചാന്‍സലര്‍ കൂടിയായ ഗവര്‍ണറാണ് അംഗങ്ങളെ നാമനിര്‍ദേശം ചെയ്യുന്നത്. ബോര്‍ഡിന്റെ വിഷയവുമായി ബന്ധപ്പെട്ട പ്രത്യേക അറിവുള്ളവരെ അംഗങ്ങളായി നിയോഗിക്കാമെന്നു വ്യവസ്ഥയുണ്ട്. ഇതനുസരിച്ചാണ് ബോര്‍ഡ് ഓഫ് സ്റ്റഡീസിലേക്ക് നിയോഗിക്കാന്‍ സര്‍വകലാശാല നിര്‍ദേശിച്ചതും ചാന്‍സലര്‍ നോമിനേറ്റ് ചെയ്തതെന്നും എം.ജി. സര്‍വകലാശാല വൈസ് ചാന്‍സലര്‍ പ്രൊഫ. സാബു തോമസ് പറഞ്ഞു.
https://www.facebook.com/Malayalivartha
