ഐടി വകുപ്പ് ; കരാര് നിയമനങ്ങള് ഇനി അഞ്ചംഗം സമിതി നിരീക്ഷിക്കും
ഐടി വകുപ്പിലെ നിയമനങ്ങള് നിരീക്ഷിക്കുന്നതിനായി സര്ക്കാര് സമിതിയെ നിയോഗിച്ചു. സ്പേസ് പാര്ക്കില് സ്വര്ണക്കടത്തു കേസിലെ പ്രതി സ്വപ്ന സുരേഷിനു വ്യാജ സര്ട്ടിഫിക്കറ്റുകളുടെ അടിസ്ഥാനത്തില് നിയമനം നല്കിയതു വിവാദമായിരുന്നു. ഇതിനു പിന്നലെയാണ് നടപടി.
ഇലക്ട്രോണിക്സ്- ഐടി വകുപ്പിന് കീഴിലുള്ള വിവിധ സ്ഥാപനങ്ങളിലെ കരാര് നിയമനങ്ങള്ക്കും കരാര് കാലാവധി പുതുക്കുന്നതിനുമായി അഞ്ചംഗ ഉദ്യോഗസ്ഥതല നിരീക്ഷണ സമിതിയെ നിയോഗിച്ചു. വകുപ്പിനു കീഴിലെ ഓരോ പ്രോജക്ടിന്റെയും ആവശ്യകതയ്ക്കനുസരിച്ച് വേണ്ടിവരുന്ന ഭാവിനിയമനങ്ങള് സമിതിയുടെ സൂക്ഷ്മപരിശോധനയ്ക്ക് വിധേയമാക്കും. ഇത്തരത്തില് നിയമിതരാവുന്നവരുടെ പ്രവര്ത്തനവും സമിതി വിലയിരുത്തും. ഓരോ സ്ഥാപനങ്ങള്ക്കും പ്രത്യേകമായിരിക്കും പരിശോധന. അതതു സ്ഥാപനങ്ങളുടെ മേധാവികളാകും സമിതി കണ്വീനര്മാര്.
ഇലക്ട്രോണിക്സ്- ഐടി വകുപ്പ് സെക്രട്ടറിയാണ് സമിതി ചെയര്മാന്. ഇലക്ട്രോണിക്സ്- ഐടി വകുപ്പ് അഡിഷണല് സെക്രട്ടറി അല്ലെങ്കില് ജോയിന്റ് സെക്രട്ടറി, സ്റ്റേറ്റ് ഇ-ഗവേണന്സ് മിഷന് ടീം മേധാവി, ഉദ്യോഗസ്ഥ- ഭരണപരിഷ്കാര വകുപ്പ് പ്രതിനിധി എന്നിവര് അംഗങ്ങളായിരിക്കും.
വകുപ്പിന് കീഴിലെ എല്ലാ കരാര് ജീവനക്കാരുടെയും പ്രവര്ത്തനങ്ങള് സമിതി നിശ്ചിത ഇടവേളകളില് വിലയിരുത്തും. സമിതിയുടെ അനുമതിയുണ്ടെങ്കില് മാത്രമേ കരാര് കാലാവധി നീട്ടി നല്കുകയുള്ളു. കരാര് ജീവനക്കാരുടെ കാലാവധി നീട്ടുന്നത് സംബന്ധിച്ച് ഡയറക്ടര് ബോര്ഡ് തീരുമാനത്തിന്റെ കുറിപ്പു സഹിതം ബന്ധപ്പെട്ട സ്ഥാപന മേധാവി റിപ്പോര്ട്ട് സമര്പ്പിക്കണം.
കരാര് അടിസ്ഥാനത്തില് നിയമിക്കപ്പെടുന്നവര് പുതുതായി നിയമനം നേടുന്ന സമയത്തും കാലാവധി നീട്ടുന്പോഴും ബന്ധപ്പെട്ട സ്ഥാപനവുമായി ധാരണാപത്രത്തില് ഒപ്പിടുന്നത് സ്ഥാപനമേധാവി ഉറപ്പാക്കണം. ഇതില് വീഴ്ചയുണ്ടായാല് സര്ക്കാര് അത് ഗൗരവമായെടുക്കുമെന്നു ഐടി വകുപ്പിന്റെ ചുമതല വഹിക്കുന്ന അഡിഷണല് സെക്രട്ടറി കെ. മുഹമ്മദ് വൈ. സഫിറുള്ളയുടെ ഉത്തരവില് പറയുന്നു.
https://www.facebook.com/Malayalivartha
