ആകെ ശിവശങ്കര്‍ എന്ന ഐഎഎസ് ഉദ്യോഗസ്ഥന്‍ ചെയ്തത് സ്വപ്നയുടെ പുറകേ പോയി എന്നതാണ്. പകരമോ ശിവശങ്കറിനെ സ്വപ്ന ഊറ്റി പണവും സ്വാധീനവും ഉപയോഗപ്പെടുത്തി. പണം ഇന്ന് വരും നാളേം വരും എന്ന അവസ്ഥയിലുള്ള ശിവശങ്കറിനെ സംബന്ധിച്ച് സ്വപ്ന ചോദിച്ച കടങ്ങളെല്ലാം നല്‍കി. മാത്രമല്ല അത് കിട്ടുമെന്ന പ്രതീക്ഷ ഇല്ലാത്തതിനാല്‍ ആ കടങ്ങളെല്ലാം എഴുതി തള്ളുകയും ചെയ്തു. പിന്നെ പദവി അതുപയോഗിക്കാനുള്ളതാണ്. സൗഹൃദം വച്ച് ആരോടും ഒന്നു വിളിച്ച് പറഞ്ഞാല്‍ തീരാവുന്ന കാര്യം. പക്ഷെ സ്വപ്നയുടെ ഊരാക്കുരുക്കില്‍ ശിവശങ്കര്‍ പെട്ടതോടെ ആ പണവും പദവിയും സ്വാഹയായി. അങ്ങനെ സ്വപ്നയും ശിവശങ്കറും ഒരുമിച്ചുള്ള ചോദ്യം ചെയ്യല്‍ വൈകാരിക നിമിഷങ്ങള്‍ക്ക് വേദിയായി. വേറെ മുറിയിലാണ് ഇരുന്ന് ചോദ്യം ചെയ്തതെങ്കിലും പഴയ കാര്യങ്ങള്‍ മനസില്‍ തികട്ടി വന്നു. എങ്കിലും ഒരിക്കല്‍ പോലും ശിവശങ്കര്‍ സാറിനെ തള്ളിപ്പറയാന്‍ സ്വപ്ന തയ്യാറായില്ല.

എന്‍.ഐ.എയുടെ ഒടുവിലത്തെ ചോദ്യംചെയ്യലിലും ശിവശങ്കറെ സ്വപ്ന സുരേഷ് സഹായിച്ചു. ശിവശങ്കറുമായി നല്ല സൗഹൃദമായിരുന്നു. എന്നാല്‍ സ്വര്‍ണക്കടത്ത് പോലുള്ള കാര്യങ്ങളില്‍ സഹായം തേടിയിട്ടില്ല. സ്വര്‍ണക്കടത്ത് ശിവശങ്കറിന് അറിയില്ലായിരുന്നു. സ്വര്‍ണക്കടത്തുമായി ബന്ധപ്പെട്ട ഒരു ചര്‍ച്ചയിലും ഒത്തുചേരലിലും അദ്ദേഹം പങ്കെടുത്തിട്ടില്ല സ്വപ്ന പറഞ്ഞു.

ലൈഫ് മിഷന്‍ പദ്ധതിയില്‍ യു.എ.ഇ റെഡ്ക്രസന്റ് സര്‍ക്കാര്‍ ധാരണപത്രമുണ്ടാക്കാന്‍ ഇടപെട്ടിട്ടുണ്ടെന്ന് സമ്മതിച്ച ശിവശങ്കര്‍ പക്ഷേ, കമീഷന്‍ കാര്യങ്ങളെക്കുറിച്ച് അറിവില്ലായിരുന്നെന്ന് മൊഴി നല്‍കി. യു.എ.ഇ കോണ്‍സുലേറ്റിലെ ഉന്നതരാണ് കാര്യങ്ങള്‍ ആസൂത്രണം ചെയ്തതെന്ന് സ്വപ്ന പറഞ്ഞു. തങ്ങള്‍ക്ക് കുറച്ചുതുക മാത്രമാണ് ലഭിച്ചത്.കോണ്‍സല്‍ ജനറല്‍, ഫിനാന്‍സ് ഓഫിസറായ ഈജിപ്ഷ്യന്‍ പൗരന്‍ ഖാലിദ് തുടങ്ങിയവരാണ് യൂനിടാക്കുമായി ചര്‍ച്ച ചെയ്തതും തുടര്‍നടപടി കൈക്കൊണ്ടതും. ബാങ്ക് ലോക്കറില്‍നിന്ന് കണ്ടെടുത്ത ഒരു കോടിയോളം രൂപ ലൈഫ്മിഷന്‍ പദ്ധതിയുമായി ബന്ധപ്പെട്ട കമീഷന്‍ അല്ലെന്നും അവര്‍ ആവര്‍ത്തിച്ചു.

കോണ്‍സുലേറ്റിന്റെ പേരില്‍ വന്ന നയതന്ത്ര ബാഗേജ് കസ്റ്റംസ് തടഞ്ഞുവെച്ചപ്പോള്‍ ശിവശങ്കറെ അറിയിച്ചെന്ന് പറഞ്ഞ സ്വപ്ന ബാഗേജില്‍ സ്വര്‍ണം ആയിരുന്നെന്ന കാര്യം അദ്ദേഹത്തോട് പറഞ്ഞിരുന്നില്ലെന്നും വ്യക്തമാക്കി.വിവരം അറിഞ്ഞിട്ടും ബാഗേജ് വിട്ടുകിട്ടാന്‍ ശിവശങ്കര്‍ ആരെയും വിളിച്ചിട്ടില്ല. തങ്ങളുടെ ഫോണ്‍ വിളികളും ചാറ്റും തികച്ചും വ്യക്തിപരമാണെന്നും ഇരുവരും മൊഴിനല്‍കി. ശിവശങ്കറും സമാനമൊഴി നല്‍കിയതിനാല്‍ പ്രതിചേര്‍ക്കാന്‍ തെളിവ് ലഭിച്ചില്ലെന്ന നിലയിലാണ് എന്‍.ഐ.എ. ഇതിന് പിന്നാലെയാണ് മലപോലെ കണ്‍മുമ്പില്‍ സിബിഐ പുലികളിറങ്ങിയത്.

അതേസമയം യു.എ.ഇ കോണ്‍സുലേറ്റിന്റെ നയതന്ത്ര ചാനല്‍ വഴി സ്വര്‍ണം കടത്തിയ കേസിലെ മുഖ്യപ്രതി സ്വപ്ന സുരേഷിനെ എറണാകുളം പ്രത്യേക എന്‍.ഐ.എ കോടതി അടുത്തമാസം എട്ട് വരെ റിമാന്‍ഡ് ചെയ്തു. നാല് ദിവസത്തെ കസ്റ്റഡിയിലെ ചോദ്യം ചെയ്യലിനുശേഷം തിരികെ ഹാജരാക്കിയപ്പോഴാണ് റിമാന്‍ഡ് ചെയ്ത് ജയിലിലേക്ക് അയച്ചത്.

വ്യാഴാഴ്ച സ്വപ്നയെ ശിവശങ്കറിനൊപ്പം എന്‍.ഐ.എ വിശദമായി ചോദ്യം ചെയ്തിരുന്നു. ചോദ്യം ചെയ്യലിന്റെ വിശദാംശങ്ങള്‍ റിമാന്‍ഡ് റിപ്പോര്‍ട്ടില്‍ വ്യക്തമാക്കിയിട്ടില്ല. അതിനിടെ, വിയ്യൂര്‍ ജയിലില്‍ പ്രയാസമുണ്ടെന്ന് സ്വപ്ന അറിയിച്ചതിനെത്തുടര്‍ന്ന് കാക്കനാട് ജയിലിലേക്കാണ് അയച്ചത്.

എന്തായാലും തന്റെ കള്ളമൊഴിയൊന്നും സിബിഐയുടെ അടുത്ത് നടക്കുമെന്ന് സ്വപ്നയ്ക്ക് നന്നായറിയാം. ലൈഫ് പദ്ധതിയിലെ കമ്മീഷന്‍ അന്വേഷിക്കുന്ന സിബിഐ സ്വപ്ന സുരേഷിനേയും ശിവശങ്കറിനേയും ചോദ്യം ചെയ്യും. ഇതേരീതിയിലൊന്നുമല്ല ചോദ്യം ചെയ്യല്‍. ഇതിനെക്കാളും കൊടികെട്ടിയ കൊമ്പന്‍മാരെ ചോദ്യം ചെയ്ത സിബിഐയ്ക്ക് സ്വപ്ന വെറും ചീള് കേസാണ്. എന്തായാലും വരും നാളുകളില്‍ സ്വപ്ന ഒളിപ്പിച്ചത് മണിമണിപോലെ പുറത്തറിയാം.