ആദ്യ ഭര്‍ത്താവ് നേരത്തെ മരിച്ചു.... ഫേസ്ബുക്കിലൂടെ ചിഞ്ചു പരിചയപ്പെട്ട ഉണ്ണികൃഷ്ണനൂമായി അമ്പലത്തില്‍ വച്ച് വിവാഹിതരായി, ഗര്‍ഭിണിയായതോടെ ഉണ്ണികൃ്ണന്റെ അമ്മ ഈ ബന്ധം അംഗീകരിച്ചില്ല... കുഞ്ഞെന്ന ബാദ്ധ്യത ഒഴിവാക്കാന്‍ ചിഞ്ചുവുമായുള്ള ബന്ധം തുടര്‍ന്നാല്‍ നല്ലൊരു ജീവിതം ലഭിക്കില്ലെന്ന ചിന്ത ഉണ്ണികൃഷ്ണനെ അലട്ടി, ഒടുവില്‍ നൂലുകെട്ടിന് പിന്നാലെ 40 ദിവസം പ്രായമുള്ള പിഞ്ചുകുഞ്ഞിനെ പിതാവ് ആറ്റിലെറിഞ്ഞു കൊന്നു.

നെടുമങ്ങാട്, പനയമുട്ടം സ്വദേശിനി ചിഞ്ചുവിന്റെ ഇളയമകള്‍ ശിവഗംഗയുടെ മൃതദേഹമാണ് തിരുവല്ലം പള്ളത്തുംകടവിലെ ആറ്റില്‍ നിന്ന് കണ്ടെത്തിയത്. സംഭവത്തില്‍ പാച്ചല്ലൂര്‍ മാര്‍ക്കറ്റിന് സമീപം പേരയില്‍ വീട്ടില്‍ ഉണ്ണിക്കൃഷ്ണനെ (24) തിരുവല്ലം പൊലീസ് കസ്റ്റഡിയിലെടുത്തു. വ്യാഴാഴ്ച രാത്രിയായിരുന്നു സംഭവം. കുഞ്ഞിനെ കാണാനില്ലെന്ന ചിഞ്ചുവിന്റെ പരാതിയില്‍ പൊലീസ് നടത്തിയ അന്വേഷണത്തിലാണ് മൃതദേഹം കണ്ടെത്തിയത്.


ആറ് വയസുള്ള പെണ്‍കുട്ടിയുടെ അമ്മയായ ചിഞ്ചുവിന്റെ (27) ആദ്യ ഭര്‍ത്താവ് നേരത്തെ മരിച്ചിരുന്നു. വയറിംഗ് തൊഴിലാളിയായ ഉണ്ണിക്കൃഷ്ണനെ ഫേസ്ബുക്കിലൂടെയാണ് പരിചയപ്പെട്ടത്. തുടര്‍ന്ന് അമ്പലത്തില്‍ വച്ച് ഇരുവരും വിവാഹിതരായി. ഗര്‍ഭിണിയായ ശേഷം ഹോം ഗാര്‍ഡ് കൂടിയായ ചിഞ്ചു ഉണ്ണിക്കൃഷ്ണന്റെ വീട്ടിലെത്തിയെങ്കിലും അമ്മ സുഗുണ ഇവരുടെ ബന്ധത്തെ അംഗീകരിച്ചില്ല. ഇതിന്റെ പേരില്‍ തിരുവല്ലം പൊലീസില്‍ കേസും നിലവിലുണ്ട്. പിന്നീട് ചിഞ്ചു പനയമുട്ടത്തെ സ്വന്തം വീട്ടിലാണ് താമസിച്ചിരുന്നത്. വ്യാഴാഴ്ചയായിരുന്നു നൂലുകെട്ട്. ചടങ്ങിന് ശേഷം വൈകിട്ട് ആറോടെ കുഞ്ഞിനെ അമ്മയെ കാണിക്കണമെന്നുപറഞ്ഞ് പാച്ചല്ലൂരിലേക്ക് വരികയായിരുന്നു. ഉണ്ണിക്കൃഷ്ണന്‍ ബൈക്കിലും ചിഞ്ചുവും കുഞ്ഞും ഓട്ടോയിലുമായാണ് വന്നത്.

വീടെത്താറായപ്പോള്‍ ചിഞ്ചുവിനെ കണ്ടാല്‍ അമ്മ വഴക്കുണ്ടാക്കുമെന്ന് പറഞ്ഞ ഉണ്ണിക്കൃഷ്ണന്‍ കുഞ്ഞിരുന്ന ബാസ്‌കറ്റുമായി ബൈക്കില്‍ പോവുകയായിരുന്നു. രാത്രി ഒമ്പതായിട്ടും തിരിച്ചുവരാതായതോടെയാണ് പൊലീസില്‍ പരാതി നല്‍കിയത്. നിരവധി തവണ ഫോണില്‍ വിളിച്ച് കുഞ്ഞിനെ ആവശ്യപ്പെട്ടെങ്കിലും ഇയാള്‍ വ്യക്തമായ മറുപടി നല്‍കിയില്ല. തുടര്‍ന്ന് തിരുവല്ലത്തിന് സമീപത്തു നിന്ന് ഇയാളെ പൊലീസ് കസ്റ്റഡിയിലെടുത്തു. പൊലീസും ഫയര്‍ഫോഴ്‌സും നടത്തിയ തെരച്ചിലില്‍ പുലര്‍ച്ചെ രണ്ടോടെ കുഞ്ഞിന്റെ മൃതദേഹം ബാസ്‌കറ്റില്‍ അടച്ച നിലയില്‍ കണ്ടെത്തി.? ഉണ്ണികൃഷ്ണനെതിരെ മൊഴിരാത്രി ഏഴോടെ ഉണ്ണിക്കൃഷ്ണന്‍ ആറ്റില്‍ നിന്ന് കയറിവരുന്നത് കണ്ടതായും ചോദിച്ചപ്പോള്‍ ചവറു കളയാന്‍ വന്നതാണെന്ന് പറഞ്ഞതായും പ്രദേശവാസി രാജന്‍ മൊഴി നല്‍കി.

ആദ്യം കുഞ്ഞുമായി ആറ്റിനരികിലെത്തിയപ്പോള്‍ മണ്‍തിട്ടയിടിഞ്ഞ് വെള്ളത്തില്‍ വീഴുകയായിരുന്നെന്ന് പൊലീസിനോട് പറഞ്ഞ ഉണ്ണിക്കൃഷ്ണന്‍ പിന്നീട് കുഞ്ഞിനെ വെള്ളത്തിലെറിഞ്ഞ് കൊലപ്പെടുത്തിയതാണെന്ന് സമ്മതിച്ചു. മൃതദേഹം പോസ്റ്റ്‌മോര്‍ട്ടത്തിന് ശേഷം ബന്ധുക്കള്‍ക്ക് വിട്ടുകൊടുത്തു.? കൃത്യം കുഞ്ഞെന്ന ബാദ്ധ്യത ഒഴിവാക്കാന്‍ചിഞ്ചുവുമായുള്ള ബന്ധം തുടര്‍ന്നാല്‍ നല്ലൊരു ജീവിതം ലഭിക്കില്ലെന്ന ചിന്തയില്‍ നിന്നാണ് ഉണ്ണിക്കൃഷ്ണന്‍ കുഞ്ഞിനെ കൊന്നതെന്നാണ് പൊലീസ് പറയുന്നത്. മുന്‍കൂട്ടി പ്ലാന്‍ ചെയ്താണ് കൃത്യം നടത്തിയത്.