വയലിനിസ്റ്റ് ബാലഭാസ്‌കറിന്റെ മരണത്തില്‍ വിഷ്ണു സോമസുന്ദരം നുണപരിശോധനയ്ക്ക് ഹാജരായി. കൊച്ചിയിലെ സി.ബി.ഐ ഓഫീസിലാണ് വിഷ്ണു സോമസുന്ദരം ഹാജരായത്. ബാലഭാസ്‌കറിന്റെ മാനേജറായിരുന്ന വിഷ്ണു സ്വര്‍ണക്കടത്തുകേസിലെ പ്രതിയാണ്. ബാലഭാസ്‌കറിനെ സ്വര്‍ണക്കടത്തുസംഘം അപായപ്പെടുത്തിയെന്ന് ബന്ധുക്കള്‍ പരാതി ഉന്നയിച്ചിരുന്നു. ഈ സാഹചര്യത്തിലാണ് വിഷ്ണുവിനെ നുണപരിശോധനയ്ക്ക് വിധേയനാക്കുന്നത്.

ബാലഭാസ്‌കറിന്റെ മരണം ആസൂത്രിതമായ കൊലപാതകമാണെന്നാരോപണമുന്നയിച്ച കലാഭവന്‍ സോബിയേയും നുണ പരിശോധനയ്ക്ക് വിധേയനാക്കും. ബാലഭാസ്‌കറിനെ ഒരു സംഘം ആളുകള്‍ ആക്രമിക്കുന്നത് കണ്ടെന്നും സോബി മൊഴി നല്‍കിയിരുന്നു. സിബിഐ അനുമതി നല്‍കിയാല്‍ ബാലഭാസ്റിനെ ആക്രമിച്ച സംഘത്തിലുള്ളവരുടെ പേരുകള്‍ മാധ്യമങ്ങള്‍ക്ക് മുമ്പില്‍ വെളിപ്പെടുത്താമെന്ന് സോബി ശനിയാഴ്ച രാവിലെ പറഞ്ഞിരുന്നു. ഈയൊരു സാഹചര്യത്തില്‍ സോബിയുടെ നുണ പരിശോധന നിര്‍ണായകമാകും. ഉച്ചയ്ക്ക് ശേഷമാണ് സോബിയുടെ നുണപരിശോധന തീരുമാനിച്ചിട്ടുള്ളത്.