വ്യക്തമായ പ്ലാനിംഗ് ഇല്ലാതെ പടച്ചട്ട ഊരി തലങ്ങും വിലങ്ങും അടി കിട്ടിയ ദേഷ്യത്തിലാണ് പ്രതിപക്ഷ നേതാവ് രമേഷ് ചെന്നിത്തല. സമരം നിര്‍ത്തിയത് താന്‍ പോലും അറിഞ്ഞില്ലെന്ന് കെ. മുരളീധരന്‍ പറയുമ്പോള്‍ പാവപ്പെട്ട കോണ്‍ഗ്രസ് അണികളുടെ കാര്യം പറയാനുണ്ടോ. പടത്തലവനായ ചെന്നിത്തല അല്ലെങ്കിലും എപ്പോഴും അങ്ങനെയാണ്, മുഖ്യമന്ത്രി ഒന്ന് ഫോണ്‍ വിളിച്ചാല്‍ എല്ലാം തീര്‍ന്നു. പണ്ട് ഇതുപോലെയാണ് കോണ്‍ഗ്രസ് അണികളും നേതാക്കളും അറിയാതെ പിണറായിക്കൊപ്പം രക്തസാക്ഷി മണ്ഡപത്തില്‍ പോയി കുത്തിയിരുന്നത്. അത് വലിയ വിമര്‍ശനം നേരിട്ടുവെങ്കിലും പിന്നെ ചെന്നിത്തലയല്ലേയെന്ന് കരുതി എല്ലാവരും പൊറുത്തു.

ഇത്തവണത്തെ കാര്യം അങ്ങനെയല്ല സ്വപ്ന വിഷയത്തിലും സ്വര്‍ണക്കടത്ത് വിഷയത്തിലും ബിജെപി പ്രസിഡന്റ് കെ. സുരേന്ദ്രന്‍ തുടങ്ങി വച്ചവ ഏറ്റ് പിടിച്ച് ജനകീയമാക്കാന്‍ ചെന്നിത്തലയ്ക്ക് കഴിഞ്ഞു. എന്തിന് തീപിടിച്ചപ്പോള്‍ പോലും ആദ്യം ഓടിയെത്തി തീ ആളിക്കത്തിച്ചത് സുരേന്ദ്രനാണ്. എന്നാല്‍ സുരേന്ദ്രനെ പോലീസുകാര്‍ വാനിലാക്കിയപ്പോള്‍ രാത്രിയുടെ മറവില്‍ ചെന്നിത്തലയെത്തി സെക്രട്ടറിയേറ്റിനെ പ്രകാശമാനമാക്കി. ചെന്നിത്തലയുടെ തീപ്പൊരി ഡയലോഗ്‌സ് കണ്ട് കൊട്ടിയടച്ച സെക്രട്ടറിയേറ്റ് ഗേറ്റ് താനെ തുറന്നു. അതോടെ ചെന്നിത്തല ഹീറോയായി.

ഇതിന് പിന്നാലെ മന്ത്രി ജലീലിന്റെ ഖുറാന്‍ വിഷയം വന്നപ്പോഴും കോണ്‍ഗ്രസുകാര്‍ക്ക് കോളായിരുന്നു. ബിജെപിക്കാര്‍ സുരേന്ദ്രന്റെ നേതൃത്വത്തില്‍ എല്ലാം മറന്ന് സമരം ചെയ്തു. യുവാക്കള്‍ക്ക് പുറമേ യുവതികളേയും ചങ്കൂറ്റത്തോടെ സുരേന്ദ്രന്‍ രംഗത്തിറക്കി സ്‌കോര്‍ ചെയ്തു. ഇത് കണ്ട് നിന്ന കോണ്‍ഗ്രസുകാരുടേയും ലീഗുകാരുടേയും രക്തം തിളച്ചു. അവരും കുറേ നാളുകള്‍ക്ക് ശേഷം പോലീസിന്റെ തല്ലും ജല പീരങ്കിയും ഏറ്റുവാങ്ങി സായൂജ്യമടഞ്ഞു.

ഇങ്ങനെയിരിക്കുമ്പോഴാണ് മന്ത്രി ജലീല്‍ ഖുറാന്‍ ആയുധമാക്കിയത്. അതോടെ മുസ്ലിം വോട്ടുകള്‍ ചോരുമോയെന്ന ഭയത്താല്‍ മുസ്ലീം ലീഗുകാരും കോണ്‍ഗ്രസുകാരും ഉള്‍വലിഞ്ഞു. എന്നിട്ടും ഇടയ്ക്കിടയ്ക്ക് പുട്ടിന് തേങ്ങാപ്പീര പോലെ കരിങ്കൊടിയും കോലം കത്തിപ്പുമായി കോണ്‍ഗ്രസുകാര്‍ കൊറോണ കാലം തള്ളി നീക്കി.

അതിനിടേയാണ് മുഖ്യമന്ത്രിയുടെ അതിരാവിലെ ചെന്നിത്തലയെ വിളിച്ചത്. പ്രതിപക്ഷ നേതാവെന്ന നിലയില്‍ നാട്ടിലെ കൊറോണ പ്രശ്‌നം ചര്‍ച്ച ചെയ്യാനാണ് വിളിച്ചത്. പിന്നെന്ത്. എല്ലാം മറന്ന് ചെന്നിത്തല അത് പത്രക്കാരുടെ മുന്നിലെത്തിച്ചു. യുഡിഎഫ് സമരം പിന്‍വലിക്കുന്നു. കൊറോണ പടരുന്ന സമയത്ത് ഞങ്ങള്‍ സമരം ചെയ്യില്ല.

അതേസമയം കെ. സുരേന്ദ്രനാകട്ടെ സമരം നിര്‍ത്തില്ല എന്ന് തീര്‍ത്തു പറഞ്ഞു. കോവിഡ് പ്രോട്ടോകോള്‍ മാനിച്ച് സമരം ചെയ്യും. ഇത്രയും വലിയ പ്രശ്‌നമുണ്ടാകുമ്പോള്‍ എങ്ങനെ സമരം ചെയ്യാതിരിക്കും. സുരേന്ദ്രന്റെ സമരത്തെ പറ്റി മുഖ്യമന്ത്രിയോട് പത്രക്കാര്‍ ചോദിച്ചപ്പോഴും പറഞ്ഞത് സമരം ചെയ്യുക രാഷ്ട്രീയ പാര്‍ട്ടിക്കാരുടെ അവകാശമാണ്. കോവിഡ് പ്രോട്ടോകോള്‍ പാലിച്ച് ചെയ്യുന്നതില്‍ തെറ്റില്ല. അതോടെ ചെന്നിത്തല ശൂ ആയി.

തൊട്ടടുത്ത ദിവസം ദേ മലപോലെ വരുന്നു ഐ ഫോണ്‍. യൂണിടെക് ഉടമ സന്തോഷ് ഈപ്പന്‍ കോടതിയില്‍ നല്‍കിയ ഹര്‍ജിയിലാണ് 5 ഐ ഫോണ്‍ സ്വപ്നയ്ക്ക് നല്‍കിയെന്നും ഒരു ഫോണ്‍ സ്വപ്ന ചെന്നിത്തലയ്ക്ക് നല്‍കിയെന്നും പറയുന്നത്. സ്വപ്നയ്ക്ക് എതിരെ പടനയിക്കുന്ന പട നായകനാണ് സ്വപ്നയുടെ കറക്ക് കമ്പനിക്ക് വേണ്ടി സമ്മാനം നല്‍കിയതും ആരോപണം വരുന്നതും. സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍ കൂടി രംഗത്തെത്തിയതോടെ ചെന്നിത്തല ഫ്‌ളാറ്റ്. സമരം നിര്‍ത്തിയ ചെന്നിത്തലയ്ക്കിട്ട് തന്നെ കൊടുത്തു. ഇത് തന്നെ വേണം. നന്ദിയുണ്ട് സഖാവേ.

സുരേന്ദ്രനാകട്ടെ ഇരട്ട ആയുധം കിട്ടിയ മട്ടായി. അങ്ങനെ സുരേന്ദ്രന്‍ ഒറ്റയ്ക്ക് എല്ലാം കൊണ്ടുപോയാലെങ്ങനെ. പുതുതായി വന്ന യുഡിഎഫ് കണ്‍വീനറായ എംഎം ഹസന് ബുദ്ധിയുദിച്ചു. സുരേന്ദ്രന്റെ വഴിയാണ് നല്ലത്. സമരം തുടരണം. ചെന്നിത്തല എതിര്‍ക്കരുത്. അടി കിട്ടിയ ചെന്നിത്തലയുണ്ടോ എതിര്‍ക്കുന്നു. നൂറ് പ്രാവശ്യം സമ്മതം. അഞ്ച് പേരെ വച്ച് സമരം ചെയ്യുമെന്ന്. അഞ്ചെങ്കില്‍ അഞ്ച്. സുരേന്ദ്രാ ക്ഷമിക്കണേ...