പാര്‍ട്ടി നിര്‍ദേശിച്ചാല്‍ മത്സരിക്കാന്‍ തയ്യറാണെന്ന തീരുമാനവുമായി സ്പീക്കര്‍ പി ശ്രീരാമകൃഷ്ണന്‍ രംഗത്ത്. ഒരു തരത്തിലും ആശങ്കയില്ല. എന്നാൽ മത്സരിക്കേണ്ടി വന്നാല്‍ ആത്മവിശ്വാസം ഉണ്ടെന്നും അദ്ദേഹം വ്യക്തമാക്കി. ഒരു അഭിമുഖത്തിലാണ് അദ്ദേഹം തന്റെ നിലപാട് തുറന്നടിച്ചത്. മത്സരിക്കണോ എന്ന് പാര്‍ട്ടി തീരുമാനിച്ചാല്‍ മാത്രമേ പറയാന്‍ സാധിക്കൂ. മല്‍സരിക്കേണ്ടി വന്നാല്‍ നല്ല ആത്മവിശ്വാസം ഉണ്ടാകും . കഴിഞ്ഞ എത്രയോ കാലമായി ജനങ്ങളുടെ കൂടെയായിരുന്നു. ജനങ്ങളോട് ഇഴുകി ചേര്‍ന്നായിരുന്നു പ്രവര്‍ത്തിച്ചിട്ടുള്ളത്. അതിലൊരു ആശങ്കയും ഇത് വരെയില്ലെന്നും ആ കാര്യത്തിൽ ആത്മ വിശ്വാസമുണ്ടെന്നും ശ്രീരാമകൃഷ്ണന്‍ പറഞ്ഞു.

എന്നാൽ പൊന്നാനിക്ക് പകരം പെരിന്തല്‍മണ്ണ മല്‍സരിക്കുമോ എന്ന ചോദ്യത്തിന് ജനിച്ചു എന്നുള്ളതല്ല, എവിടെ ജീവിക്കുന്നു എന്നതാണ് നാട് നിശ്ചയിക്കുന്നത് എന്നായിരുന്നു മറുപടി . പെരിന്തല്‍മണ്ണയില്‍ ആണ് ജനിച്ചത്, പക്ഷേ ഇപ്പോള്‍ പൊന്നാനിയിലാണ്. പൊന്നാനി ഇപ്പോള്‍ പെരിന്തല്‍മണ്ണയെക്കാള്‍ പ്രിയങ്കരമായ മണ്ണ് ആണെന്നും അദ്ദേഹം പറഞ്ഞു. അന്വേഷണ ഏജന്‍സികള്‍ ചോദ്യം ചെയ്യും എന്നുള്ള പ്രചരണത്തില്‍ വാസ്തവം ഇല്ലെന്നും സ്പീക്കര്‍ വ്യക്തമാക്കി . ഒരു കട ഉദ്ഘാടനം ചെയ്യാന്‍ പോയ ഒരാളെ ചുറ്റിപ്പറ്റി ശൂന്യതയില്‍ നിന്നും കഥകള്‍ സൃഷ്ടിച്ച്‌ വിവാദമാക്കുകയാണെന്നും പക്ഷേ കുറ്റം ചെയ്തു എന്ന തോന്നല്‍ ഉളവാക്കുന്ന നിലയില്‍ വാര്‍ത്തകള്‍ കൊടുക്കുന്നു എന്നതാണ് നിര്‍ഭാഗ്യകരം ആണെന്നും അദ്ദേഹം വ്യക്തമാക്കി.