ഷാഫിക്ക് കസ്റ്റംസ് നോട്ടീസ്..... സ്വര്ണക്കടത്ത് കേസില് ടി.പി വധക്കേസ് പ്രതി മുഹമ്മദ് ഷാഫിയെ കസ്റ്റംസ് ഇന്ന് ചോദ്യം ചെയ്തേക്കും....
സ്വര്ണക്കടത്ത് കേസില് ടി.പി വധക്കേസ് പ്രതി മുഹമ്മദ് ഷാഫിയെ കസ്റ്റംസ് ഇന്ന് ചോദ്യം ചെയ്തേക്കും. പരോളിലുള്ള ഷാഫിയോട് ഇന്ന് ഹാജരാകണമെന്ന് ആവശ്യപ്പെട്ട് കസ്റ്റംസ് നോട്ടീസ് നല്കിയിട്ടുണ്ട്.
അര്ജുന്റെ കസ്റ്റഡി അവസാനിച്ചതിനാല് ഷാഫിക്കൊപ്പം ഇരുത്തി ചോദ്യം ചെയ്യാനാകില്ല. അര്ജുന് ആയങ്കിയുടെ കസ്റ്റഡി നീട്ടികിട്ടാന് കസ്റ്റംസ് നല്കിയ അപേക്ഷ കോടതി ഇന്നലെ തള്ളിയിരുന്നു. ഇതോടെ അര്ജുനെ എറണാകുളത്തെ ജില്ലാ ജയിലിലേക്ക് മാറ്റി. ഇതിന് പിന്നാലെയാണ് ടിപി ചന്ദ്രശേഖരന് വധക്കേസിലെ പ്രതി മുഹമ്മദ് ഷാഫിക്കൊപ്പം അര്ജുന് ആയങ്കിയേയും ചോദ്യം ചെയ്യാമെന്ന കസ്റ്റംസിന്റെ നീക്കം പാളിയത്.
ഇന്ന് രാവിലെ 11 മണിക്ക് കൊച്ചിയിലെ കസ്റ്റംസ് ഓഫീസില് ഹാജരാകാന് ആവശ്യപ്പെട്ടാണ് ഷാഫിക്ക് കസ്റ്റംസ് നോട്ടിസ് നല്കിയത്. മുഹമ്മദ് ഷെഫീഖിന്റെ മൊഴിയുടെ പശ്ചാത്തലത്തില് ആണ് ചോദ്യം ചെയ്യല്. സ്വര്ണക്കടത്തിന് ചുക്കാന് പിടിക്കുന്നത് ഷാഫിയും കൊടി സുനിയും ആണെന്ന് അര്ജുന് തന്നോട് പറഞ്ഞെന്നായിരുന്നു ഷെഫീഖിന്റെ മൊഴി.
അര്ജുനുമായുള്ള ഷാഫിയുടെ ബന്ധവും ചോദിച്ചറിയും. ജയിലിലുള്ള കൊടി സുനിയെയും ചോദ്യം ചെയ്യാന് കസ്റ്റംസ് തീരുമാനിച്ചിട്ടുണ്ട്. കോടതിയുടെ അനുമതി ലഭിക്കുന്ന മുറക്കാകും ഇത്.
കണ്ണൂരിലെ സ്വര്ണക്കടത്തു സംഘങ്ങള്ക്ക് ജയിലിലുള്ള കൊടി സുനിയുടെയും ഷാഫിയുടെയും സംരക്ഷണം ലഭിച്ചിരുന്നുവെന്ന് കസ്റ്റംസിന് അന്വേഷണത്തില് ബോധ്യപ്പെട്ടിട്ടുണ്ട്. കൂടുതല് തെളിവുകളും മൊഴികളും ലഭിക്കുന്ന മുറക്ക് അര്ജുനെ വീണ്ടും കസ്റ്റംസ് കസ്റ്റഡിയില് ആവശ്യപ്പെട്ടേക്കും
https://www.facebook.com/Malayalivartha
