മോദി ഷാ ഷോ തുടരുന്നു... ഗുജറാത്ത് മുഖ്യമന്ത്രി വിജയ് രുപാനി രാജി വച്ചതിനു പിന്നാലെ ആര് മുഖ്യമന്ത്രിയാകുമെന്ന ചര്ച്ച സജീവമാകുന്നു; ലക്ഷദ്വീപ് അഡ്മിനിസ്ട്രേറ്റര് പ്രഫുല് ഖോഡ പട്ടേലിന് സാധ്യതയേറുന്നു; മോദിയുടേയും അമിത് ഷായുടേയും മനസിലിരിപ്പറിയാതെ നേതാക്കള്
ലക്ഷദ്വീപില് വലിയ പരിഷ്ക്കാരങ്ങളുടെ പേരില് കുപ്രസിദ്ധനായ അഡ്മിനിസ്ട്രേറ്റര് പ്രഫുല് ഖോഡ പട്ടേലിന് മറ്റൊരു യോഗം വന്നെത്തുമോ എന്നറിയാന് ഇനി കുറച്ച് നാള് മാത്രം മതി.
ഗുജറാത്ത് മുഖ്യമന്ത്രി വിജയ് രുപാനി രാജി വച്ചതിനു പിന്നാലെ ആ സ്ഥാനത്തേക്ക് എത്തുന്ന നേതാവ് ആരായിരിക്കുമെന്ന തിരക്കുപിടിച്ച ചര്ച്ച ബി.ജെ.പിക്കുളളിലും പുറത്തും ചൂട് പിടിക്കുകയാണ്. മുഖ്യമന്ത്രി പട്ടികയിലേക്ക് പരിഗണിക്കാന് സാദ്ധ്യതയുളളവരുടെ പേരുകള് ഇതിനോടകം ദേശീയ മാദ്ധ്യമങ്ങള് പുറത്ത് വിട്ടുകഴിഞ്ഞു. ഗുജറാത്തില് നിന്നുള്ള രണ്ട് കേന്ദ്ര മന്ത്രിമാര്, ലക്ഷദ്വീപിലെ വിവാദ ഭരണാധികാരി പ്രഫുല് ഖോഡ പട്ടേല്, സംസ്ഥാന കൃഷി മന്ത്രി ആര്സി ഫല്ദു എന്നിവരുടെ പേരുകള് മുഖ്യമന്ത്രിസ്ഥാനത്തേക്ക് പരിഗണിക്കുന്നതായി ബി.ജെ.പി വൃത്തങ്ങളെ ഉദ്ധരിച്ച് റിപ്പോര്ട്ട് ചെയ്തു.
മുഖ്യമന്ത്രി സ്ഥാനത്തേക്ക് എം.എല്.എ അല്ലാത്ത ഗുജറാത്തിയും പരിഗണിക്കപ്പെടാമെന്നും ബി.ജെ.പി വൃത്തങ്ങള് പറഞ്ഞതായി റിപ്പോര്ട്ടുണ്ട്. ഇതോടെ, ലക്ഷദ്വീപ്, ദാദ്ര, നാഗര് ഹവേലി, ദാമന്, ദിയു എന്നീ കേന്ദ്രഭരണ പ്രദേശങ്ങളുടെ അഡ്മിനിസ്ട്രേറ്റര് പ്രഫുല് ഖോഡ പട്ടേല് പ്രധാന മത്സരാര്ത്ഥികളിലുണ്ടെന്ന ഊഹാപോഹങ്ങള്ക്ക് ആക്കം കൂട്ടി. അടുത്തിടെ ലക്ഷദ്വീപില് പ്രഫുല് ഖോഡ പട്ടേല് കൊണ്ടുവന്ന പരിഷ്കാരങ്ങള് വിവാദമായിരുന്നു. കേന്ദ്ര ഫിഷറീസ്, മൃഗസംരക്ഷണം, ക്ഷീരവികസന മന്ത്രി പര്ഷോത്തം രൂപാല, കേന്ദ്ര ആരോഗ്യമന്ത്രി മന്സുഖ് മാണ്ഡവ്യ എന്നിവരെയും പരിഗണിക്കുന്നതായി റിപ്പോര്ട്ടുണ്ട്. ഇരുവരും പട്ടേല് അഥവാ പട്ടീദാര് സമുദായത്തില് പെട്ടവരാണ്.
പട്ടേല് സമുദായത്തില് നിന്നുള്ള ഗുജറാത്ത് ഉപമുഖ്യമന്ത്രി നിതിന് പട്ടേലിന്റെയും സംസ്ഥാന കൃഷി മന്ത്രി ആര്.സി. ഫല്ഡുവിന്റെയും പേരുകള് മുഖ്യമന്ത്രി സ്ഥാനത്തേക്ക് പരിഗണിക്കുന്നതായി പറയപ്പെടുന്നു. പട്ടേല്, പര്ഷോത്തം രൂപാല, മാണ്ഡവ്യ എന്നിവരുടെ പേരുകള് ചര്ച്ച ചെയ്യപ്പെടുന്നു. എന്നാല് പ്രധാനമന്ത്രി നരേന്ദ്ര മോദി തീരുമാനമെടുക്കുന്നതിനാല് ആരാണ് മുഖ്യമന്ത്രി എന്ന് പറയാന് കഴിയില്ല എന്ന് ഒരു പാര്ട്ടി നേതാവ് പറഞ്ഞതായി പി.ടി.ഐ റിപ്പോര്ട്ട് ചെയ്തു.
ഗവര്ണര് ആചാര്യ ദേവ്റത്തിനു മുന്നില് രാജിക്കത്ത് സമര്പ്പിച്ച രുപാനി രാജിക്ക് പ്രത്യേകിച്ച് കാരണങ്ങള് ഒന്നും പറഞ്ഞിട്ടില്ല. കുറച്ചു ദിവസങ്ങളായി ഗുജറാത്ത് മന്ത്രിസഭയെ ചുറ്റിപറ്റി ബി.ജെ.പിക്കുള്ളില് ചര്ച്ചകള് നടക്കുന്നുണ്ടായിരുന്നുവെങ്കിലും അദ്ദേഹത്തിന്റെ രാജി തീര്ത്തും അപ്രതീക്ഷിതമായിരുന്നു. രാജിയുടെ കാരണം അന്വേഷിച്ച മാദ്ധ്യമപ്രവര്ത്തകരോട് ബി.ജെ.പിയില് നേതൃമാറ്റം സര്വസാധാരണമാണെന്നായിരുന്നു രുപാനിയുടെ മറുപടി.
ഗുജറാത്ത് ജനതയെ സേവിക്കാന് അവസരം നല്കിയ ബി.ജെ.പി നേതൃത്വത്തിന് നന്ദി പറഞ്ഞ രുപാനി എന്നാല് രാജിവയ്ക്കാനുണ്ടായ സാഹചര്യത്തെ കുറിച്ചുള്ള മാദ്ധ്യമപ്രവര്ത്തകരുടെ ചോദ്യങ്ങളില് നിന്ന് ഒഴിഞ്ഞുമാറി. കഴിഞ്ഞ അഞ്ചു വര്ഷമായി താന് ഗുജറാത്തിന്റെ മുഖ്യമന്ത്രി കസേരയില് ഇരിക്കുകയാണെന്നും അത് വളരെ ദീര്ഘമായ ഒരു കാലയളവാണെന്നും അദ്ദേഹം വ്യക്തമാക്കി. ബി.ജെ.പിയുടെ ദേശീയ നേതൃത്വത്തിനു കീഴില് താന് ഇനിയും പ്രവര്ത്തിക്കുമെന്നും ഗുജറാത്ത് ജനത ബി.ജെ.പിയില് അര്പ്പിച്ചിട്ടുള്ള വിശ്വാസം കാത്തുസൂക്ഷിക്കാന് താന് അടക്കമുള്ള പാര്ട്ടി പ്രവര്ത്തകര് പ്രതിജ്ഞാബദ്ധരാണെന്നും രാജി സമര്പ്പിച്ച ശേഷം രുപാനി മാദ്ധ്യമപ്രവര്ത്തകരോട് പറഞ്ഞു.
https://www.facebook.com/Malayalivartha
