നെടുമങ്ങാട് മണ്ഡലത്തിലെ പൊതുമരാമത്ത് റോഡ് അറ്റകുറ്റപ്പണികൾ ഒരുമാസത്തിനകം പൂർത്തിയാക്കണമെന്നു ഭക്ഷ്യ-പൊതുവിതരണ വകുപ്പ് മന്ത്രി ജി.ആർ. അനിൽ ഉദ്യോഗസ്ഥർക്കു നിർദേശം നൽകി.

ജില്ലാ വികസന സമിതിയുടെ തുടർ നടപടികളുടെ ഭാഗമായി നെടുമങ്ങാട് മണ്ഡലത്തിലെ റോഡ് വികസന പ്രവർത്തനങ്ങൾ വിലയിരുത്തുന്നതിനു മന്ത്രിയുടെ അധ്യക്ഷതയിൽ കളക്ടറേറ്റിൽ യോഗം ചേർന്നു. അറ്റകുറ്റപ്പണികളുടെ പുരോഗതി വിലയിരുത്തുന്നതിന് അടുത്തമാസം വീണ്ടും യോഗം ചേരുമെന്നും മന്ത്രി അറിയിച്ചു.

റോഡ് വികസന പ്രവർത്തനങ്ങളുടെ തടസങ്ങൾ മാറ്റാൻ ആവശ്യമായ ഇടപെടലുകൾ നടത്തുമെന്ന് മന്ത്രി പറഞ്ഞു. പൊതുമരാമത്ത് റോഡ് പ്രവൃത്തികൾ, ആസ്തി വികസന ഫണ്ടുപയോഗിച്ചും പ്രളയ ഫണ്ട് ഉപയോഗിച്ചു നിർമിക്കുന്ന റോഡുകൾ എന്നിവയെ സംബന്ധിച്ചു യോഗം വിലയിരുത്തി. റോഡ് അറ്റകുറ്റപ്പണികളുമായി ബന്ധപ്പെട്ട വിവിധ പ്രവർത്തനങ്ങളിൽ ഉദ്യോഗസ്ഥർ സമയപരിധി പാലിക്കണമെന്നു ജില്ലാ കളക്ടർ ഡോ. നവ്ജ്യോത് ഖോസ പറഞ്ഞു.

ജില്ലാ വികസന കമ്മീഷണർ ഡോ. വിനയ് ഗോയൽ, ദുരന്തനിവാരണ വിഭാഗം ഡെപ്യൂട്ടി കളക്ടർ ടി.കെ. വിനീത്, അസി. ഡവലപ്മെന്റ് കമ്മിഷണർ (ജനറൽ) ജി. സുധാകരൻ, ജില്ലാ പ്ലാനിങ് ഓഫിസർ വി. ജഗൽകുമാർ, നെടുമങ്ങാട് തഹസിൽദാർ ജി. മോഹനകുമാരൻ നായർ, ജില്ലാ പഞ്ചായത്ത് എക്സി. എഞ്ചിനീയർ ഡി. രാജേഷ്, ബ്ലോക്ക് ഡവലപ്മെന്റ് ഓഫീസർമാർ തുടങ്ങിയവർ യോഗത്തിൽ പങ്കെടുത്തു.