മതമേതായാലും മനുഷ്യന്‍ നന്നായാല്‍ മതി എന്ന് ചിന്തിക്കുന്നവരുടെ നാട്ടില്‍ പാല പൂത്തുലഞ്ഞ് നില്‍ക്കുകയാണ്. ലൗ ജിഹാദും നാക്കോട്ടിക് ജിഹാദും ഉണ്ടാക്കിയ വിവാദം ഇപ്പോഴും അവസാനിച്ചിട്ടില്ല. മാത്രമല്ല മറ്റ് മത നേതാക്കള്‍ കൂടി അത് ഏറ്റെടുത്തതോടെ വിഷയം കൂടുതല്‍ സങ്കീര്‍ണവുമായി. അതിനിടയിലാണ് നടി ലക്ഷ്മി പ്രിയയുടെ സബീനയില്‍ നിന്നുള്ള പേരു മാറ്റം.

ഒരു പേരില്‍ എന്തിരിക്കുന്നു എന്ന ചിന്ത കൊണ്ട് മാത്രം കൊണ്ടു നടന്നിരുന്ന എന്റെയാ പഴയ പേര് ഞാന്‍ ഉപേക്ഷിച്ചിരിക്കുന്നു എന്നാണ് ഔദ്യോഗികമായി പേര് മാറിയ വിവരം അറിയിച്ച് ലക്ഷ്മി പ്രിയ രംഗത്തെത്തിയത്.

നീണ്ട 18 വര്‍ഷം സബീനയും 19 വര്‍ഷം ലക്ഷ്മി പ്രിയയായി ജീവിച്ച താന്‍ ഔദ്യോഗികമായി ലക്ഷ്മി പ്രിയ എന്ന് തന്റെ പേര് മാറ്റിയെന്നാണ് ലക്ഷ്മി പ്രിയ പറയുന്നത്. ഫേസ്ബുക്കിലൂടെയാണ് നടി വിവരം അറിയിച്ചത്. കല്ലെറിഞ്ഞതിനും ആര്‍ത്തു വിളിച്ചതിനും തീര്‍ത്താല്‍ തീരാത്ത നന്ദിയുണ്ടെന്നും കാരണം ആ കല്ലെറിയല്‍ കൊണ്ടാണ് പൂര്‍ണ്ണമായും ഹിന്ദു എന്ന തന്റെ സ്വത്വം രേഖാമൂലം അങ്ങനെ തന്നെ ആവട്ടെ എന്ന് തീരുമാനിച്ചതെന്നും നടി അറിയിച്ചു.

ഒറ്റ മുറിയില്‍ നിന്നും തന്നെ ചേര്‍ത്തു പിടിച്ച് കൃത്യമായ ഒരു മേല്‍വിലാസം ഉണ്ടാക്കിത്തന്ന ഭര്‍ത്താവിനോടുള്ള സ്‌നേഹം അറിയിക്കാന്‍ വാക്കുകളില്ലെന്ന് പറഞ്ഞ ലക്ഷ്മി പ്രിയ മതമേതായാലും മനുഷ്യന്‍ നന്നായാല്‍ മതി എന്ന ഗുരുവചനം ഓര്‍മ്മിപ്പിച്ചാണ് ഫേസ്ബുക്ക് പോസ്റ്റ് അവസാനിപ്പിക്കുന്നത്.

ലക്ഷ്മി പ്രിയയുടെ ഫേസ്ബുക്ക് പോസ്റ്റ് പൂര്‍ണരൂപം ഇങ്ങനെ

I officially announced yes I am Lakshmi priyaa. ഒരു പേരില്‍ എന്തിരിക്കുന്നു എന്ന ചിന്ത കൊണ്ട് മാത്രം കൊണ്ടു നടന്നിരുന്ന എന്റെയാ പഴയ പേര് ഞാന്‍ ഉപേക്ഷിച്ചിരിക്കുന്നു. നീണ്ട പതിനെട്ടു വര്‍ഷം ഞാന്‍ സബീന ആയിരുന്നു.19 വര്‍ഷമായി ഞാന്‍ ലക്ഷ്മി പ്രിയയും. ഇത് രണ്ടും ചേരുന്ന ഒരാളിനെ കൊണ്ടു നടക്കാന്‍ എനിക്ക് യാതൊരു ബുദ്ധിമുട്ടും തോന്നിയിരുന്നില്ല. കാരണം ഞാന്‍ എന്നും ഞാന്‍ ആയിരുന്നു. എത്ര വലിയ പ്രതിസന്ധി വരുമ്പോഴും ദൈവത്തിന്റെ മാത്രം കരം പിടിച്ചു മറു കര നീന്തിയ വളരെ കരുത്തുള്ള ഒരു സ്ത്രീ.

കല്ലെറിഞ്ഞതിനും ആര്‍ത്തു വിളിച്ചതിനും നിങ്ങളോട് എനിക്ക് തീര്‍ത്താല്‍ തീരാത്ത നന്ദിയുണ്ട്. കാരണം നിങ്ങളുടെ ആ കല്ലെറിയല്‍ കൊണ്ടാണ് പൂര്‍ണ്ണമായും ഹിന്ദു എന്ന എന്റെ സ്വത്വം രേഖാമൂലം അങ്ങനെ തന്നെ ആവട്ടെ എന്ന് ഞാന്‍ തീരുമാനിക്കുന്നത്.

കല്ലെറിഞ്ഞവര്‍ക്കും ചേര്‍ത്തു പിടിച്ചവര്‍ക്കും നന്ദി അറിയിക്കട്ടെ. ഒറ്റ മുറിയില്‍ നിന്നും എന്നെ ചേര്‍ത്തു പിടിച്ചു കൃത്യമായ ഒരു മേല്‍വിലാസം ഉണ്ടാക്കി തന്ന എന്റെ ഭര്‍ത്താവിനോടുള്ള എന്റെ സ്‌നേഹം അറിയിക്കാന്‍ എനിക്ക് വാക്കുകളില്ല.

ഒറ്റ കൂടിക്കാഴ്ചയില്‍ എന്റെ പേര്, മതം, ഒപ്പ് എന്നിവ ചേഞ്ച് ചെയ്യേണ്ടതിന്റെ ആവശ്യകതയെക്കുറിച്ച്, ഒരുപേരില്‍ ഒരുപാടുണ്ട് എന്ന് എനിക്ക് ബോധ്യപ്പെടുത്തി തന്ന അഡ്വക്കേറ്റ് കൃഷ്ണ രാജിനാണ് ഇപ്പൊ ഈ മാറ്റത്തിന്റെ മുഴുവന്‍ ക്രെഡിറ്റ്‌സും ഞാന്‍ കൊടുക്കുക. ഒപ്പം അതിന് എന്നെ സഹായിച്ച സൈനേഷ് തത്വമയി ന്യൂസ്, Binil Somasundaram ബിനില്‍ ജി, ശ്രീ ഗിരീഷ് ജി വിശ്വ ഹിന്ദു പരീക്ഷിത് എന്നിവര്‍ക്കും ഹൃദയം നിറഞ്ഞ നന്ദി അറിയിക്കുന്നു.

ഹിന്ദു ആയാലും മുസ്ലിം ആയാലും ഞാന്‍ ഞാനായിരിക്കും. മതമേതായാലും മനുഷ്യന്‍ നന്നായാല്‍ മതി എന്ന ഗുരുവചനം ഓര്‍മ്മിപ്പിച്ചുകൊണ്ട്

ലക്ഷ്മി പ്രിയ.